پرەزيدەنت قاسىم-جومارت توقاەۆتىڭ قازاقستان حالقىنا جولداۋىن ۇلكەن قىزىعۋشىلىقپەن تىڭدادىم. وسىعان وراي, ءبىر شاڭىراقتىڭ وتاعاسى رەتىندە ءارى شاعىن جانە ورتا بيزنەس سالاسىنداعى كاسىپكەر رەتىندە جەكە وزىمە قاتىستى پىكىرىمدى قىسقاشا جەتكىزگىم كەلەدى.
قاي كەزەڭدە دە قوعامنىڭ ءومىر ءسۇرۋ ساپاسى, ەڭ الدىمەن, ۇلتتىڭ بىلىمىمەن جانە دەنساۋلىعىمەن باعالانادى. ەلىمىزدە 2020 جىلدان باستاپ مۇعالىمدەر مەن دارىگەرلەردىڭ جالاقىسى 2-3 ەسە ءوستى, بۇل وسى ماماندىقتاردىڭ بەدەلىن ەداۋىر ارتتىرىپ, جاستاردىڭ نازارىن پەداگوگيكالىق جانە مەديتسينالىق ماماندىقتارعا اۋداردى. ۇلكەن ۇلىمنىڭ مەديتسيناعا, گەندىك ينجەنەرياعا بارۋ تۋرالى شەشىمىنە وسى سالالارداعى بەلسەندى مەملەكەتتىك ساياسات اسەر ەتكەنىنە سەنىمدىمىن.
ەكونوميكانى, ونىڭ ىشىندە شاعىن جانە ورتا بيزنەستى دامىتۋعا كەلەتىن بولساق, بيۋدجەتكە سالىقتىق جانە باسقا دا مىندەتتى تولەمدەردىڭ جالپى سانىن ازايتۋعا بولادى جانە ازايتۋ قاجەت دەپ ويلايمىن. بۇل رەتتە پرەزيدەنت شاعىن كاسىپكەرلىك ءۇشىن سالىقتاردى ازايتىپ قانا قويماي, كاسىپكەر مەن فيسكالدىق ورگاندار اراسىندا قولايلى قارىم-قاتىناس ورناتۋدى ۇسىنىپ وتىر. مەملەكەت باسشىسى ءوز جولداۋىندا «سالىقتىق باقىلاۋدى تولىق تسيفرلاندىرۋ سالىقتىق ەسەپتىلىك نىساندارىن 30%-عا قىسقارتادى» دەدى. بۇل ءسوزىنىڭ دە جانى بار. شىن مانىندە, جەكە كاسىپكەر ءۇشىن ۋاقىت دەگەن – ەڭ قۇندى فاكتور.
«بانكتەردى كورپوراتيۆتىك نەسيەلەندىرۋگە بەلسەندى قاتىسۋعا ىنتالاندىرۋ, كاسىپكەرلەرگە كومەكتەسۋ» تارماقتارى دا پرەزيدەنتتىڭ رەسپۋبليكاداعى شاعىن جانە ورتا بيزنەستى دامىتۋعا بەي-جاي قاراماي, بۇل سالاداعى قيىندىقتاردى كورىپ, تۇسىنەتىنىن كورسەتەدى. جاقىن ارادا بۇل ماسەلە ءوز شەشىمىن تابادى دەپ ۇمىتتەنەمىن.
رەتتەلەتىن ساتىپ الۋلارداعى قازاقستاندىقتاردىڭ ۇلەسىن ارتتىرۋ وتاندىق كاسىپكەرلەر ءۇشىن كەرەمەت ىنتالاندىرۋ ەكەنى بەلگىلى. پرەزيدەنتتىڭ IT-تەحنولوگيالار, اۋىل شارۋاشىلىعى, كولىك, سۋ رەسۋرستارى, قۇرىلىس سالالارىنىڭ دامۋىنا دا ەرەكشە كوڭىل ءبولىپ وتىرعانىن قۋانا قۇپتايمىن. اەس بويىنشا ايتارىم, قازاقستان جاڭارتىلاتىن ەنەرگەتيكانى ورنالاستىرۋ جانە دامىتۋ بويىنشا ۇلكەن الەۋەتكە يە. سوندىقتان بۇل جولعى جولداۋدا ەل ءۇشىن ماڭىزدى ستراتەگيالىق باستامالار ايتىلعانىن اتاپ وتكىم كەلەدى. بۇل شارالار ءومىر ءسۇرۋ ساپاسىن جاقسارتۋعا, ءبىلىم بەرۋ مەن دەنساۋلىق سالاسىنىڭ دامۋىن قامتاماسىز ەتۋگە, سونداي-اق كاسىپكەرلەر ءۇشىن قولايلى جاعداي جاساۋعا باعىتتالعان.
قازاقستان مىقتى, يننوۆاتسيالىق جانە ورنىقتى ۇلت بولۋعا ۇمتىلىپ كەلەدى. ءبىز وسى جولداۋ مىندەتتەرى ورىندالىپ, قازاقستاندىقتاردىڭ تۇرمىس ساپاسىن ارتتىرۋ, كاسىپكەرلىكتى قولداۋ, ينفراقۇرىلىمدى دامىتۋ, باسپانا ماسەلەسىن شەشۋ سىندى تەگەۋرىندى باسىمدىقتار جۇزەگە اسقان جاعدايدا ەلدىڭ تۇرمىسى تۇزەلىپ, جاعدايىمىزدىڭ جاقساراتىنىنا سەنەمىز.
ماير رزاەۆ,
«حازار» ازەربايجان ەتنومادەني
بىرلەستىگىنىڭ توراعاسى
