بيىلعى جولداۋ ەلىمىزدىڭ ەكونوميكالىق الەۋەتىن ارتتىرۋ جولىنداعى الداعى ءۇش جىلدا قارجى-نەسيە سالاسىنان باستاپ قوعام ءومىرىنىڭ بارلىق سالاسىن قامتىدى. زامانىندا ءجۇسىپ بالاساعۇن بابامىزدىڭ «كەز كەلگەن مەملەكەتتىڭ قۋاتى ونىڭ قازىناعا تۇسەتىن سالىعى, جولدارىنىڭ ساپاسى مەن اسكەرىنىڭ ايبىنىنان بايقالادى» دەگەن ەكەن. ۇلى تۇلعانىڭ وسى سوزدەرى ارادا نەشە عاسىر وتسە دە وزەگىن جويماي كەلەدى.
مەملەكەت باسشىسى كەشەگى جولداۋىندا بۇعان دەيىن كوپ كوتەرىلمەگەن ەل ەكونوميكاسىن جانداندىرۋدىڭ جاڭا باعىتتارىن اتاپ ءوتتى. سونىڭ ءبىرى – پرەزيدەنتىمىز كوتەرگەن «جاڭا زاماننىڭ مۇنايى» تۋرالى.
«جاڭا زامان مۇنايىنا» اينالعان سيرەك جانە جەردە سيرەك كەزدەسەتىن مەتالل كەنىشتەرىن يگەرۋ باستى باعىتتىڭ ءبىرى بولۋى كەرەك. ءوزىنىڭ وسى سالاداعى الەۋەتىن اشا العان ەلدەر كەلەشەكتە بۇكىل الەمنىڭ تەحنولوگيالىق دامۋ باعدارىن ايقىندايتىن بولادى» دەپ اتاپ ءوتتى پرەزيدەنت.
«جاڭا زامان مۇنايىنىڭ» قورعانىس سالاسىن دامىتۋ جولىنداعى ورنىنا توقتالا كەلە, ونىڭ ارميامىزدى جوعارى تەحنولوگيالى قارۋ-جاراقپەن جانە اسكەري تەحنيكامەن قامتاماسىز ەتۋدەگى رولىنە توقتالدى. سونىمەن بىرگە قورعانىس سالاسىن كۇشەيتۋ ءۇشىن بروندى تەحنيكامەن, ۇشقىشسىز باسقارىلاتىن ۇشۋ اپپاراتتارىمەن, قازىرگى زامانعى اتىس قارۋلارىمەن جابدىقتالۋعا ءتيىس ەكەنىن ۇكىمەتكە تاپسىردى. سونداي-اق ارناۋلى قورعانىس-ونەركاسىپ كەشەنىن دامىتۋ قورى ارقىلى ءوز كاسىپورىندارىمىزعا تىكەلەي قارجىلىق قولداۋ كورسەتۋ كەرەكتىگىنە ەرەكشە نازار اۋداردى.
تاۋ-كەن ءوندىرىسىن دامىتۋ جولىندا سالىق جانە ونى رەتتەۋ شارتتارى وزگەرىسكە يكەمدى بولۋىنا جانە ينۆەستورلار وسى سالانى ءارى قاراي ءوز قارجىسىنا گەولوگيالىق زەرتتەۋ جۇرگىزگەن جاعدايدا, ولار ءۇشىن جەر قويناۋىن پايدالانۋ كەزىندە باسىم قۇقىققا يە بولۋىن قامتاماسىز ەتكەن ءجون دەپ ۇكىمەتتىڭ نازارىنا سالدى. سونىمەن قاتار جوبالاردى كەلىسۋگە قاجەتتى راسىمدەر مەن ونىڭ مەرزىمىن كەشەندى مەملەكەتتىك ساراپتاما جاساۋ جانە تولىق تسيفرلاندىرۋ ءتاسىلىن ەنگىزۋ ارقىلى ەكى ەسە ازايتۋ كەرەكتىگىنە جانە قازىر ەلىمىزدىڭ 1,5 ميلليون شارشى شاقىرىم اۋماعىنا گەولوگيالىق جانە گەوفيزيكالىق بارلاۋ جاسالعانىن ەسكەرتە كەلە, ەندىگى جەردە ۇكىمەتتىڭ مىندەتى 2026 جىلعا قاراي ونىڭ كولەمىن كەمىندە 2 ميلليون 200 مىڭعا جەتكىزۋ كەرەك دەپ ناقتى تاپسىرما جۇكتەدى.
سونىمەن قاتار ۇكىمەتكە جىل سوڭىنا دەيىن سالانى دامىتۋعا قاتىستى ناقتى ۇستانىمىمىزدى انىقتاۋدى, وڭدەۋ ونەركاسىبىن قولداۋ ءۇشىن شەتەلدىڭ جانە ەلىمىزدىڭ ينۆەستورلارىن باستاپقى ءۇش جىلدا سالىقتان جانە باسقا دا مىندەتتى تولەمدەردەن بوساتۋدى تاپسىردى. بۇل وڭدەۋ يندۋسترياسىنا ايتارلىقتاي سەرپىن بەرۋگە ارنالعان وتە ماڭىزدى شارا ەكەنىن دە اتاپ ءوتتى.
سونىمەن بىرگە پرەزيدەنتىمىز وتاندىق كاسىپورىندارعا بارىنشا قولداۋ كورسەتۋ ماقساتىندا تەحنيكانى شۇعىل جوندەيتىن ءوندىرىس ورىندارىنىڭ قۋاتىن ارتتىرۋدى قولعا الۋدى تاپسىردى. ول ءۇشىن ەلىمىزدە قاجەتتى ماتەريالدىق-تەحنيكالىق بازا مەن بىلىكتى, تاجىريبەلى مامانداردىڭ بار ەكەنىن, ول ءۇشىن قۇزىرلى مەكەمەلەردىڭ تاپسىرىسى كەرەك ەكەنىن شەگەلەپ ايتتى.
اتالعان ماقساتقا جەتۋ جولىندا بارشا قازاقستاندىقتى بىرلىك پەن تىرلىككە شاقىرا كەلە, پرەزيدەنتىمىز «قازاقستان – ءبىزدىڭ جالعىز عانا وتانىمىز. ونىڭ ىرگەسى بەرىك, كەرەگەسى كەڭ, ءتورت قۇبىلاسى تۇگەل بولۋى – ءوز قولىمىزدا. بابالاردان ميراس بولعان ۇلان-عايىر جەردى قورعاۋ, ونى وركەندەتۋ – ءبىزدىڭ پەرزەنتتىك پارىزىمىز» دەپ بارشا قازاقستاندىققا ۇندەۋ تاستادى.
زۋلفۋحار عايىپوۆ,
استانا قالاسى قوعامدىق كەڭەسىنىڭ توراعاسى
