استانادا الەۋمەتتىك از قامتىلعان 100 وتباسى گازعا تەگىن قوسىلادى. ولاردىڭ ىشىندە زەينەتكەرلەر, مۇگەدەكتىگى بار ادامدار, كوپبالالى جانە ت.ب. بار. قالا اكىمدىگى Halyk بانكىمەن بىرلەسىپ الماتى جانە سارىارقا اۋداندارىنداعى ءجۇز جەكە ءۇيدى تەگىن گازداندىرۋ تۋرالى مەموراندۋمعا قول قويدى.
جالپى بيۋدجەتى 230 ملن تەڭگەنى گازداندىرۋ جوباسى Halyk بانكىنىڭ 100 جىلدىعىنا ارنالعان «100 يگى ءىس» اۋقىمدى ناۋقانى اياسىندا ىسكە اسىرىلۋدا. 2023 جىلى Halyk Bank قاراجاتى ەسەبىنەن مۇقتاجدىعى بار وتباسىلار اراسىندا 230-عا جۋىق تۇرعىن ءۇي – استاناداعى 100 ءۇيدى جانە الماتى قالاسىنىڭ ناۋرىزباي, الاتاۋ جانە مەدەۋ اۋداندارىندا تۇراتىن 130 ءۇيدى گازعا تولىقتاي قوسۋ ءۇشىن قارجىلاندىرۋ جوسپارلانىپ وتىر.
– استانا قالاسىنداعى الماتى جانە سارىارقا اۋداندارى گازبەن تولىق قامتاماسىز ەتىلگەن. مۇندا شامامەن 12 مىڭ ابونەنت بولسا, سونىڭ ىشىندە 8 مىڭنان استام ابونەنت گازعا قوسىلدى. ۇيلەردى گازعا قوسۋ شىعىندارىن ازايتۋ ءۇشىن جۇيەلى جۇمىستار جۇرگىزۋدەمىز. حالىقتىڭ الەۋمەتتىك وسال توپتارى ءۇشىن 450 مىڭ تەڭگەگە جۋىق سوماعا گازداندىرۋ شىعىندارىنا وتەماقى بەرۋ كوزدەلگەن, سونداي-اق قۇنى 150 مىڭ تەڭگەگە جۋىق ەسەپتەۋ اسپاپتارى تەگىن بەرىلەدى. بۇرىن بانك ارقىلى پايىزسىز نەسيەلەۋ باعدارلاماسى ىسكە قوسىلعان بولاتىن. ەندى Halyk-پەن ەلورداداعى 100 ءۇيدى تەگىن گازداندىرۋ جوباسىن ىسكە اسىرۋعا كىرىسەمىز. قالعان اۋداندار بويىنشا گاز قۇبىرىن جەتكىزۋ جەلىلەرىن, كۆارتالىشىلىك جەلىلەردى سالۋ جۇمىستارى كەلەسى جىلى جۇرگىزىلەدى. گازداندىرۋ پروتسەسى – مەملەكەت باسشىسىنىڭ باقىلاۋىندا, – دەدى استانا قالاسىنىڭ اكىمى جەڭىس قاسىمبەك.
ەلوردا اكىمشىلىگى الەۋمەتتىك وسال توپتار ساناتىنا جاتاتىن مۇقتاج ادامداردىڭ ءتىزىمىن ۇسىندى. ولارعا گازداندىرۋدى ءوز بەتىنشە تولەۋگە مۇمكىندىگى جوق تۇرعىندار ەنگىزىلدى. بانكتىڭ باسقارما توراعاسى ءۇمىت شاياحمەتوۆانىڭ ايتۋىنشا, اتالعان بانك بىرنەشە جىل بويىنا گازداندىرۋ ماسەلەسىن شەشۋگە ءوز رەسۋرستارىن سالىپ كەلەدى.
