ەلوردادا ىرىسى مەن ىنتىماعى جاراسىپ, اۋىزبىرشىلىگىمەن كوپكە ۇلگى بولعان وتباسى كوپ. سولاردىڭ ءبىرى – ءداستۇرلى «مەرەيلى وتباسى» بايقاۋىنىڭ بىلتىرعى جەڭىمپازدارى استانالىق ايناگۇل جانە دۋلات ساعيتوۆتار.
قازاق ۇعىمىندا وتباسىنىڭ ورنى ەرەكشە. ادام بالاسىنىڭ ءوسىپ-ونەر, قاز تۇرىپ, قانات قاعار وشاق قاسى, التىن بەسىگى سانالاتىن كيەلى ورتانى شايقالتپاي, شىنى-اياعىن سىلدىرلاتپاي, شاڭىراقتىڭ بەرەكەسىن كىرگىزىپ وتىرۋ وڭاي شارۋا ەمەس. وتباسىنىڭ ءتۇتىنىن ءتۇزۋ شىعارىپ, شاڭىراقتىڭ شاتتىعىن شالقىتۋ جۇبايلاردىڭ ەكەۋىنە دە تىكەلەي بايلانىستى. وتاسقانىنا ون ءۇش جىلدان استام ۋاقىت وتكەن ايناگۇل مەن دۋلات ساعيتوۆتار مۇنىڭ سىرىن جاقسى بىلەدى.
ستەپنوگورسك قالاسىندا دۇنيەگە كەلگەن دۋلات ەرالىۇلى ورتا مەكتەپتى بىتىرگەننەن كەيىن وتان الدىنداعى ازاماتتىق بورىشىن وتەپ, ەلگە ابىرويمەن امان-ەسەن ورالادى. تۋىپ-وسكەن قالاسىنداعى اۆتوموبيل كولىگى تەحنيكۋمىن بىتىرگەن جىلى تۋىسىنىڭ تويىندا بولاشاق جارىمەن تانىسادى.
كۇيەۋ ءجىگىت جاقتان كەلگەن بوزبالا بەيتانىس قۇداشاعا ءبىر كورگەننەن عاشىق بولادى. تسەلينوگرادتا دۇنيەگە كەلىپ, استاناداعى №27 ورتا مەكتەپتى, كەيىن جوعارى وقۋ ورنىن قارجى جانە نەسيە ماماندىعى بويىنشا بىتىرگەن ارۋدىڭ دا جۇرەگى ءبىر ءتۇرلى شىم ەتە تۇسەدى. ولار قىز-جىگىت بولىپ كوپ جۇرمەدى دە.
– العاش تانىسقان كەزىمىزدە مەن الماتىدا تۇرىپ, جۇمىس ىستەدىم. ۇيلەنۋ تويىنان كەيىن جۇمىسقا قايتا ورالدىم, ءار دەمالىس سايىن استاناعا كەلىپ تۇراتىنمىن. قوشتاسۋ قيىنعا سوعا بەردى, كوپ ۇزاماي جۇمىستان شىعىپ, استاناعا ءبىرجولا كوشىپ كەلدىم. بۇل قالادا ودان باسقا ەشكىمىم جوق ەدى. ءبىز ءبىر-بىرىمىزگە تەز ۇيرەنىسىپ, تەز ءتىل تابىسىپ كەتتىك. ءالى كۇنگە دەيىن ءبىر-ءبىرىمىزدى قاباعىمىزدان تانيمىز. ونىڭ نە ايتقىسى كەلىپ وتىرعانىن مەن, مەنىڭ نە ويلاپ وتىرعانىمدى ول الدىن الا ءبىلىپ قويامىز. سەزىمىمە سەنگەننەن كەيىن, بىردەن ۇسىنىس جاسادىم. احات بولىمىنە ءوتىنىش بەردىك. بىرنەشە كۇننەن كەيىن ءبىز قالا كۇنى مەرەكەسىنە قاتىسۋعا شاقىرتۋ الدىق. سول كۇنى نەكەلەسۋگە نيەت بىلدىرگەن 30 جۇپپەن بىرگە اسەم استانانىڭ كورىكتى جەرلەرىن ارالاپ, ادەمى ەسكەرتكىشتەردىڭ جانىندا سۋرەتكە تۇستىك. كوپ ۇزاماي جاس جۇبايلار رەتىندە ءبىزدىڭ جۇپ ەسىل وزەنىنىڭ جاعالاۋىنداعى ۇلكەن كەمەنى ىسكە قوسۋ راسىمىنە شاقىرىلدى. جۇبايلىق عۇمىرىمىز وسىلايشا سالتاناتتى ساتتەرمەن باستالىپ ەدى. ءبارىن جاقسىلىققا جورىعانمىن, تەك تاعدىر ءبىز ويلاعانداي وپ-وڭاي ەمەس ەكەن. ايناگۇلمەن تاعدىر قوسقانىما ەش وكىنبەيمىن. كەرىسىنشە, ونى جولىقتىرعان جاراتقانعا ريزامىن, – دەدى دۋلات ساعيتوۆ.
ادەتتە, جاس شاڭىراق يەلەرى ءومىردىڭ توسىننان كەلەر سىناقتارىنا توتەپ بەرە الماي, ورتاداعى بالاعا دا قاراماي, ءوز قاراقان باسىنىڭ قامىن كۇيتتەپ, ەكىگە ءبولىنىپ كەتىپ جاتادى. وكىنىشكە قاراي, بۇگىندە مۇندايلار تىم كوپ. ال ساعيتوۆتار بولسا تاعدىردىڭ سىناعىنا سىنبادى.
سول ءبىر كۇندى ەسكە ءتۇسىرۋدىڭ ءوزى ولار ءۇشىن تىم اۋىر. 2010 جىلدىڭ 15 ناۋرىزى, تۇڭعىش قىزىنىڭ بىردەن جاڭا اسىپ, ءتاي-ءتاي باسىپ, بىلدىرلاپ جۇرگەن كەزى بولاتىن. ول كەزدە دۋلات «قازاقسەلماش» زاۋىتىندا جۇمىس ىستەدى. باسشىلىقتىڭ تاپسىرماسىمەن 10 كۆت تاراتۋ قوسالقى ستانساسىنداعى توك ترانسفورماتورلارىن تەكسەرۋ كەزىندە, نۇسقاۋلاردى ورىنداي وتىرىپ, ۇياشىقتى اجىراتىپ, ونى اينالدىرىپ, كەيىن تەكسەرۋگە كىرىسەدى. قىسقاسى, جوعارى ۆولتتى توك ۇرىپ, اۋىر جاراقات الادى. يەككە كىرگەن توك باس پەن تىزە ارقىلى شىعىپ, وڭ قولدى كەسۋگە تۋرا كەلەدى. جانساقتاۋ بولىمىندە 40 كۇن جاتقاندا, دارىگەرلەر ونىڭ امان قالاتىنىنا كۇماندى ەدى. ەكى ايدان كەيىن اۋرۋحانادان 40 كگ سالماقتا مۇگەدەكتەر ارباسىمەن شىققاندا, بۇلشىق ەتتەرى اتروفيالانىپ, جۇرە الماي قالادى. ءتىلسىز جاۋ قوس جانارىن دا جاعىپ جىبەرگەن. قاس-قاعىم ساتتە ءومىرىنىڭ استان-كەستەنى شىققان جىگىت وتە ۇزاق ۋاقىت ەمدەلىپ, ءبىر-بىرىنە قيىن ساتتە دەمەۋ بولىپ, جىگەرىن قايراپ, سەزىمىنە سەلكەۋ تۇسىرمەي, اقىرى الدىمەن اللانىڭ, ودان سوڭ ايناگۇل عۇمىرلىقىزىنىڭ شىدامدىلىعى مەن تاباندىلىعىنىڭ ارقاسىندا بەتى بەرى قارايدى. تەرى ترانسپلانتاتسياسى بويىنشا كوپتەگەن وپەراتسيا جاسالدى. بالداققا تۇرۋى ءۇشىن قانشا كۇش-جىگەر جۇمسالدى. سانكت-پەتەربۋرگكە قوڭىراۋ شالىپ, بارلىق مۇمكىندىكتى پايدالانۋعا تىرىستى. قولىنا پروتەز كيدى. قىسقاسى, قيىندىققا قاسقايىپ قارسى تۇرا ءبىلدى. اقىرى, بىرلەسىپ باسقا تۇسكەن اۋىرتپالىقتىڭ ءبارىن دە جەڭدى.
بۇگىندە ولار التى بالانىڭ اتا-اناسى. ءۇش قىز, ءۇش ۇل تاربيەلەپ وتىرعان باقىتتى جاندار. وزدەرى بالالارىنىڭ ەسىمىنە ەرەكشە ءمان بەرەدى. ماسەلەن, تۇڭعىشى – اديا. بۇل – ايناگۇل مەن دۋلات ەسىمدەرىندەگى ارىپتەر جيىنتىعىنان تۋعان ات. ماعىناسى دا جاقسى, سىيلىق, سىياقى دەگەندى بىلدىرەدى. شىنىمەن دە, اديا ولار ءۇشىن اللانىڭ سىيى ەدى. ەكىنشى قىزى – ءاليا. قازاقتىڭ باتىر قىزى سەكىلدى باتىل ءارى سەنىمدى بولسىن دەگەن نيەتپەن وسىلاي اتاپتى. ءۇشىنشى قىزىن اتاسى نۇرلاننىڭ قۇرمەتىنە نۇريا دەپ قويىپتى.
ۇلدارىنىڭ ۇلكەنى الديار – اتاسى مەن اجەسىنىڭ بالاسى. بۇل ارقاشان كۇشتى بولۋ دەگەندى بىلدىرسە, ەكىنشى ۇلى ءابىلمانسۇر جانە كەنجەسى نۇريسلام – بارلىعى دا سپورتپەن شۇعىلدانادى ءارى وقۋ وزاتى. اديا 4 جاسىنان كوركەم گيمناستيكاعا بارسا, قازىرگى ۋاقىتتا وق اتۋ جانە شاڭعى جارىسىمەن اينالىسادى. بياتلوندا وينايدى. №6 گيمنازيانىڭ 7-سىنىبىندا وقيدى. ءاليا دا 4 جاسىنان باستاپ كوركەم گيمناستيكاعا بارادى. سونىمەن قاتار بالەت جانە فورتەپيانومەن قوسىمشا اينالىسادى. №46 گيمنازيا مەكتەبىنىڭ 4-سىنىبىندا وقيدى. نۇريا كونكيمەن سىرعاناۋعا بارادى. سونداي-اق بالەتپەن اينالىسۋدى جالعاستىرۋدا. №6 گيمنازيا مەكتەبىنىڭ 2-سىنىبىندا ءدارىس الىپ ءجۇر. الديار 5 جاسىنان باستاپ شايبالى حوككەي بويىنشا سپورت مەكتەبىنە قاتىسسا, ءابىلمانسۇر №4 «ارۋجان» مەملەكەتتىك بوبەكجايىندا, نۇريسلام ءالى كىشكەنتاي.
«اكەگە قاراپ ۇل وسەر, شەشەگە قاراپ قىز وسەر» دەگەندەي, بۇل وتباسىندا ءبىر ءسات بوس وتىرۋ دەگەن جوق. قاي-قايسى دا تىنىمسىز ەڭبەك ەتۋدە. مۇمكىندىگى شەكتەۋلى بولعانىنا قاراماستان, وتاعاسى ەكى جەردە – «كاسپي» سپورتتى دامىتۋ قورى پاراوليمپيادالىق جاتتىعۋ ورتالىعىندا اكىمشى جانە ەلوردالىق تسيركتە ديسپەتچەر بولىپ جۇمىس ىستەيدى. ايناگۇل – ەسەپشى.
– ايرانداي ۇيىعان بەرەكەلى وتباسى بولۋ, ارينە, وڭاي ەمەس. وعان ەرلى-زايىپتىنىڭ ەكەۋى بىردەي اتسالىسۋى كەرەك. وتباسىنىڭ بەرەكەلى بولۋى ءوزارا سىيلاستىققا, قاناعات پەن اۋىزبىرشىلىككە بايلانىستى. كەشىرىمدى بولا بىلگەننەن كىشىرەيىپ قالمايسىڭ. قانشا قيىندىقتى باستان وتكەرسەك تە, ءبىز اجىراسۋ دەگەن ۇعىمدى مۇلدەم ويلاماپپىز. قايعىدا دا, قۋانىشتا دا بىرگە بولدىق. سوندىقتان دا بولار, ءالى كۇنگە دەيىن تاتۋ-ءتاتتى ءومىر ءسۇرىپ, بالا-شاعانىڭ قىزىعىن بىرگە كورىپ كەلەمىز, – دەدى ايناگۇل ساعيتوۆا.
