130 پاتەر كىلتىن تابىستادى
قالا اكىمى اسەت يسەكەشەۆ 130 استانالىق وتباسىعا پاتەر كىلتىن تابىستادى. كەنەن ازىرباەۆ كوشەسى, 14 مەكەنجايىندا سالىنعان تۇرعىن ءۇي «نۇرلى جەر» باعدارلاماسى اياسىندا پايدالانۋعا بەرىلدى.
باسپانالى بولعانداردىڭ قۋانىشىنا ورتاقتاسۋعا كەلگەن اسەت يسەكەشەۆ:
– ەلباسىنىڭ «نۇرلى جەر» باعدارلاماسى بويىنشا 130 وتباسىنا پاتەر بەرىلدى. قۋانىشتارىڭىز باياندى بولسىن. شاڭىراقتارىڭىز بيىك, جاڭا قونىستارىڭىز قۇتتى بولسىن! – دەدى.
بۇل جولى پاتەر يەلەرى اتانعاندار – كەزەكتە تۇرعان حالىقتىڭ الەۋمەتتىك از قامتىلعان ساناتىنا جاتاتىن ازاماتتار جانە بيۋدجەتتىك مەكەمە قىزمەتكەرلەرى. بيىل 1000-نان استام پاتەرى بار 6 تۇرعىن ءۇيدى پايدالانۋعا بەرۋ جوسپارلانىپ وتىر. ونىڭ ىشىندە 386 پاتەر «نۇرلى جەر» باعدارلاماسى بويىنشا, ال 677 پاتەر كەزەكتەگىلەر ءۇشىن جالعا بەرىلمەك.
№63 مەكتەپ-گيمنازياسىندا مۇعالىم بولىپ ىستەيتىن دينارا تابىلدىقىزى 10 جىل مەرزىمىندە كەزەكتە تۇرىپ, باسپانالى بولدى. «قاسيەتتى رامازان ايىندا, استانانىڭ 20 جىلدىعى قارساڭىندا پاتەر كىلتىن الىپ جاتقانىما ريزامىن. الدىمەن ەلباسىمىزعا, قالا اكىمىنە ۇلكەن العىس ايتقىم كەلەدى. مەملەكەتتىك باعدارلامانىڭ ارقاسىندا مۇعالىمدەر مەن دارىگەرلەرگە باسپانانىڭ قولجەتىمدى بولعانى قۋانتادى» دەدى ول.