ەلوردانىڭ سول جاعالاۋىنداعى الماتى مەن اقمەشىت كوشەلەرىنىڭ قيىلىسىنداعى جاڭا ساياباقتا ۇلتتىق عىلىمي مەديتسينالىق ورتالىقتىڭ 20 جىلدىق مەرەيتويىنا وراي 20 ءتۇپ اعاش وتىرعىزىلدى.
وعان ەسىل اۋدانى اكىمىنىڭ ورىنباسارى دارمەنيار العاتبەكۇلى جانە ۇلتتىق عىلىمي مەديتسينالىق ورتالىعىنىڭ قىزمەتكەرلەرى قاتىستى.
«مۇنداي سەنبىلىك شارالارىنىڭ ءوتۋى وتە ورىندى دەپ سانايمىن. ۇلتتىق عىلىمي مەديتسينالىق ورتالىعى حابارلاسقان ەدى. بۇل ورتالىقتىڭ قۇرىلعانىنا بيىل 20 جىل, سول سەبەپتەن 20 تال ەگىلەدى. ونى 50 جاس دارىگەر وتىرعىزىپ جاتىر. جاقىندا وسى جەردە قر پرەزيدەنتى قاسىم-جومارت توقاەۆ «التىن جۇرەك» دەگەن ەسكەرتكىشتى اشقان ەدى. وسى الاڭ مەديتسينا قىزمەتكەرلەرىنىڭ ساياباعى دەپ اتالادى. ءبىزدىڭ بيىلعى جوسپارىمىز – ەسىل اۋدانى بويىنشا 22 مىڭ تال ەگۋ. سول سەبەپتەن جوسپارىمىزدى ورىنداپ, اعاشتاردى وتىرعىزىپ جاتىرمىز, وسى الاڭدى جانداندىرۋىمىز كەرەك. بۇل ءبىزدىڭ دارىگەرلەرگە دەگەن العىسىمىز بولادى» دەيدى ەسىل اۋدانى اكىمىنىڭ ورىنباسارى دارمەنيار العاتبەكۇلى.
ال ۇلتتىق عىلىمي مەديتسينالىق ورتالىقتىڭ قىزمەتكەرى تەمىرلان ءسىبىرۇلىنىڭ ايتۋىنشا, مۇنداي شارالار كەلەشەك ۇرپاعىمىزعا قالادى.
«بۇل ەندى مەديتسينا قىزمەتكەرلەرىنە ارنالعان ساياباق. ءبىز – استانامىزبەن بىرگە تۋعان مەكەمەمىز. وسىدان 20 جىل بۇرىن قر تۇڭعىش پرەزيدەنتى-ەلباسى ن.نازارباەۆتىڭ باستاماسىمەن اشىلعان ەدىك. بيىل 20 جىل مەرەيتويىمىزعا وراي, اكىمشىلىككە ۇسىنىس ايتىپ, ەستەلىك رەتىندە تال ەگۋدى ءجون سانادىق. بۇل كەلەشەك ۇرپاق ءۇشىن, ەكولوگيالىق تازالىق ءۇشىن ماڭىزدى. مۇندا بالالارىمىز, نەمەرەلەرىمىز دەمالۋعا كەلەدى. سول ءۇشىن جاس دارىگەرلەرىمىزدى شاقىرىپ, تال وتىرعىزىپ جاتىرمىز» دەيدى دارىگەر ت.ءسىبىرۇلى.
https://www.youtube.com/watch?v=ni-0hAFTZgc
