27-28 تامىزدا ەلوردادا «Astana Food and Fashion Festival» اتتى تاعام مەن ءسان فەستيۆالى وتەدى
ىس-شارا قر كونستيتۋتسياسى كۇنىنە ورايلاستىرىلدى.
دەمالىس كۇندەرى – 27 جانە 28 تامىزدا «اراي» ساياباعىندا ساعات 12.00-دەن 20.00-گە دەيىن «Astana Food and Fashion Festival» اتتى تاعام مەن ءسان فەستيۆالى وتەدى. ءدال ءبىر جىل بۇرىن «Astana Food Festival» ۇيىمداستىرىلىپ, وعان قالانىڭ 3000 تۇرعىنى قاتىستى. بيىل فەستيۆال ەكى كۇنگە جالعاسىپ, جاڭا سيپاتتا بولماق: «تاعام ءساننىڭ ءتىلىن تابادى». بۇل – «Astana Food Festival» جانە «Astana Pop Up Shop» جوبالارىنىڭ بىرىگۋىنەن تۋىنداعان فەستيۆال. ەكى باستامانىڭ دا يدەياسى ۇندەس. اتاپ ايتقاندا, وتاندىق ءونىمدى قولداۋ, ەلىمىزدىڭ ەكونوميكاسىنا سەرپىن بەرۋ, وتباسىلىق بۇقارالىق دەمالىستى قالىپتاستىرۋ. الەمدە وسى سىندى شارالار ءجيى وتكىزىلىپ تۇرادى. ەندى, مىنە, ءبىزدىڭ استانا دا ولاردىڭ قاتارىنا قوسىلدى.
فەستيۆالدىڭ ديرەكتورى ءاليا ساپاروۆانىڭ ايتۋىنشا, شارا 10000 تۇرعىندى قامتىماق. جالپىقالالىق شارا استانا قالاسى اكىمدىگى مەن «استانا ەكسپو-2017» كومپانياسىنىڭ قولداۋىنا يە بولدى.
فەستيۆال 11 الاڭعا بولىنەدى:
«كوك بازار» – اۋىل شارۋاشىلىعىنىڭ تازا ونىمدەرى ۇسىنىلادى
«جەرۇيىق» – ءدامحانا, كوفەحانا وكىلدەرى بولادى
«شاتىر» – ءىرى مەيرامحانا جەلىلەرىنە ارنالعان الاڭ
«استانالىق» – اس ۇيگە ارنالعان ونىمدەر كورسەتىلەدى
Pop Up Shop Astana – ديزاينەرلىك كيىمدەر, اشەكەيلەر ۇسىنادى
سپورت الاڭى – يوگا, زۋمبا, ستريت ۋورك اۋت, كروسسفيت بويىنشا كاسىبي جاتتىقتىرۋشىلاردىڭ شەبەرلىك سىنىپتارى
داستارحان – بەلگىلى استانالىق شەف-اسپازداردىڭ جارىسى
ەكسپو-2017 – كورمە تۋرالى پرومو-روليك كورسەتىلىپ, دجاز مۋزىكاسىنىڭ كونتسەرتى ۇيىمداستىرىلادى
چيللاۋت ايماعى – شىعارماشىلىققا ەركىندىك بەرىلگەن الاڭ
بوتاقان – بالالارعا ارنالعان ويىن-ساۋىق شارالارى ۇسىنىلادى
كينوتەاتر – «ءسان مەن تاعامدانۋ» تاقىرىبىندا فيلمدەر كورسەتىلەدى
تۇرعىندار ءۇشىن فەستيۆالگە كىرۋ تەگىن. ال قاتىسۋشىلاردان جينالعان جارنانىڭ 10%-ى قايىرىمدىلىق قورلارىنا اۋدارىلادى.
گۇلدانا تالعاتقىزى
