استانا قالاسى ءماسليحاتىنىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسياسى ەلورداداعى سالاۋاتتى ءومىر سالتىن قالىپتاستىرۋعا بايلانىستى اتقارىلىپ جاتقان شارالاردى تالقىلادى. بۇل جونىندە دەنساۋلىق ساقتاۋ باسقارماسى باسشىسىنىڭ ورىنباسارى ساۋلە نۇراشەۆا بايانداما جاسادى.
– بيىلعى جىلعا ارنالعان سالاۋاتتى ءومىر سالتىن قالىپتاستىرۋ جانە اۋرۋلاردىڭ الدىن الۋ جونىندەگى ءىس-شارالار جوسپارىنا ساي, جۇمىستار 29 باعىت بويىنشا جۇرگىزىلىپ كەلەدى. ولاردىڭ ىشىندە ونكولوگيالىق اۋرۋلاردىڭ, تۋبەركۋلەزدىڭ, استمانىڭ, قان قىسىمىنىڭ, باسقا دا ادام ومىرىنە قاۋىپتى سىرقاتتاردىڭ الدىن الۋعا باعىتتالعان شارالار جەتكىلىكتى, – دەيدى ساۋلە قۋانىشقاليقىزى.
بىراق مەملەكەت تاراپىنان جۇرتشىلىقتىڭ دەنساۋلىعىن قورعاۋعا بايلانىستى قولعا الىنعان مۇنداي شارۋالارعا قاراماستان, تۇرعىندار تەگىن مەديتسينالىق تەكسەرىلۋگە ونشا قۇلىقتى ەمەس. «اۋىرىپ ەم ىزدەگەنشە, اۋىرماۋدىڭ جولىن ىزدە» دەگەن قاعيدات ءاربىر ازاماتتىڭ قاپەرىندە جۇرۋگە ءتيىس. ويتكەنى دەنساۋلىقتىڭ كىلتى الدىمەن ادامنىڭ وزىنە, ءجۇرىس-تۇرىسىنا, تاماقتانۋ جاعدايىنا بايلانىستى. الايدا جۇمىسباستى جۇرتتىڭ كوبى سالاۋاتتى ءومىر سالتىن ۇستانۋدى, دارىگەرگە دەر كەزىندە كورىنۋدى قاجەت دەپ ساناي بەرمەيدى. بۇل ماسەلەگە ۇيىمدار مەن ءوندىرىس ورىندارى دا ءمان بەرە بەرمەيتىنى وكىنىشتى» دەيدى باسقارما باسشىسىنىڭ ورىنباسارى.
كوپشىلىكتى سالاۋاتتى ءومىر سالتىنا باۋلۋدىڭ توتە جولىن ىزدەستىرگەن دەنساۋلىق ساقتاۋ باسقارماسى
«سالاۋاتتى ءومىر سالتىن قالىپتاستىرۋ ورتالىعى» جشس-مەن بىرلەسىپ, حالىقتى اقپاراتتاندىرۋدىڭ بىرنەشە زاماناۋي ءادىسىن ۇسىنىپ وتىر. ونىڭ ءبىرىنشىسى – سالاۋاتتى ءومىر سالتىن ۇستانۋعا جانە سكرينينگتىك تەكسەرۋدەن وتۋگە شاقىرعان اقپاراتتاردى كوپشىلىككە SMS-حابارلاما ارقىلى تاراتۋ.
ەكىنشى, قوعامدىق ورىنداردا دەنساۋلىق دۇڭگىرشەكتەرىن اشۋ قاجەت. بۇل – دامىعان مەملەكەتتەردە بار تاجىريبە.
وسى دۇڭگىرشەكتەردە ادام كۇندەلىكتى قىسىمىن, دەنە قىزۋىن, سالماعىن, بويىن ولشەپ قانا قويماي, دەنساۋلىعىندا قانداي دا ءبىر كىنارات بولسا, ءتيىستى مەكەمەگە جولداما دا الا الادى. وسى جوبانى جۇزەگە اسىرۋداعى قارجى شىعىنىن وڭتايلاندىرۋ ءۇشىن ماماندار دۇڭگىرشەكتەردى ەلەكتروندىق نۇسقادا اشۋدى ۇسىنىپ وتىر.
ءۇشىنشى, اۋرۋلاردىڭ الدىن الۋعا, دەنساۋلىقتى ساقتاۋعا قاتىستى بىلگىر دارىگەرلەردىڭ اقىل-كەڭەسىن جۇرتشىلىققا جەتكىزۋ ءۇشىن تەلەارنالاردان بايىپتى باعدارلاما اشۋ جانە وسى تاقىرىپتا الەۋمەتتىك بەينەجازبالار ازىرلەپ, تەلەكورەرمەنگە ۇسىنۋ.
ماسليحاتتاعى الەۋمەتتىك-مادەني دامۋ ماسەلەلەرى جونىندەگى تۇراقتى كوميسسيانىڭ توراعاسى, دەپۋتات ءماجيت شايداروۆ تۇرعىن ۇيلەردەگى پاتەر يەلەرى كووپەراتيۆتەرىمەن, اۋلا كلۋبتارىمەن تىعىز بايلانىس ورناتىپ, بالالاردى جاستايىنان دەنساۋلىعىنا جاۋاپكەرشىلىكپەن قاراۋعا ۇيرەتۋ ماسەلەسىنە كوڭىل ءبولۋ كەرەكتىگىنە توقتالدى. ال دەپۋتات, №17 مەكتەپ-گيمنازياسىنىڭ ديرەكتورى رامزيا ومىرباەۆا «سالاۋاتتى ءومىر سالتىن قالىپتاستىرۋ ورتالىعى» ماماندارى مەكتەپپەن دۇرىس بايلانىس ورناتپاعانىن سىنعا الدى. دەپۋتاتتىڭ ايتۋىنشا, بالالارىن قالاداعى سپورت كەشەندەرىنە جاتتىعۋعا اپارۋعا كەز كەلگەن اتا-انانىڭ قالتاسى كوتەرمەيدى. سوندىقتان سپورتتىڭ تۇرلەرىن
مەكتەپتەردە دامىتقان ءجون.
جيىنعا قاتىسۋشىلار سالاۋاتتى ءومىر سالتىن قالىپتاستىرۋعا بايلانىستى شارالاردى وتكىزۋدى تەك دەنساۋلىق ساقتاۋ باسقارماسىنا عانا جۇكتەپ قويماي, باسقا مەملەكەتتىك مەكەمەلەر دە وعان اتسالىسۋ كەرەكتىگىن ەسكە سالدى.
قىمبات توقتامۇرات
