نۇر-سۇلتان قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ەرلان ءجۇسىپوۆ اعىمداعى جىلدىڭ ءبىرىنشى جارتىجىلدىعىندا اتقارىلعان باسقا دا جۇمىستار تۋرالى مالىمەت بەردى.
جالپى ەلوردادا وسى جىلدىڭ 1 شىلدەسىندەگى مالىمەتتەرگە سايكەس, 5584 ادام جۇمىسپەن قامتىلدى. جۇمىسپەن قامتىلعانداردىڭ جارتىسىنان استامى, اتاپ ايتقاندا, تۇراقتى جۇمىس ورىندارىنا 2804 ادام ورنالاستى, ونىڭ 1120-سى – جاستار. تاعى 2046 ادام قوعامدىق جۇمىستارعا, 270-ءى – جاستار پراكتيكاسىنا, 128-ءى – الەۋمەتتىك جۇمىس ورىندارىنا, 39-ى – «العاشقى جۇمىس ورنى» جوباسى بويىنشا, 10-ى «كۇمىس جاس» جوباسى بويىنشا جۇمىسقا ورنالاستى. جۇمىس بەرۋشىلەردىڭ سۇرانىسى بويىنشا قىسقا مەرزىمدى كۋرستاردان 129 ەلوردا تۇرعىنى ءوتىپ جاتىر, skills.enbek.kz پورتالى ارقىلى ونلاين-وقىتۋ 232 ادامعا ارنالدى.
جاڭا بيزنەس-يدەيالاردى ىسكە اسىرۋ ءۇشىن 5 ادام مەملەكەتتىك گرانتتى جەڭىپ الدى. سونىمەن قاتار قالادا مۇمكىندىگى شەكتەۋلى ازاماتتار ءۇشىن ارنايى جۇمىس ورىندارى ۇيىمداستىرىلدى.
– جىل سوڭىنا دەيىن 28000 جۇمىس ورنىن, ونىڭ ىشىندە 17000-ى – تۇراقتى, 11000-ى – ۋاقىتشا جۇمىس ورنىن (ۇلتتىق جوبالاردى ىسكە اسىرۋ اياسىندا – 14180, جەكە باستامالار اياسىندا – 14098) قۇرۋ جوسپارلانىپ وتىر. 1 شىلدەدەگى جاعداي بويىنشا 12390 جۇمىس ورنى قۇرىلدى. Enbek.kz پورتالىندا جۇمىس ىستەپ تۇرعان 7 مىڭنان استام بوس جۇمىس ورنىن 1000-عا جۋىق جۇمىس بەرۋشى جاريالادى, – دەدى ە.ءجۇسىپوۆ.
بۇگىندە ۇلتتىق ستاتيستيكا بيۋروسىنىڭ دەرەكتەرىنە سايكەس, 2022 جىلدىڭ ءى توقسانىنىڭ قورىتىندىسى بويىنشا ەلوردادا جۇمىسسىزدىق دەڭگەيى 4,6%-دى قۇرايدى, بۇل رەسپۋبليكالىق كورسەتكىشتەن 0,3%-عا تومەن (قر بويىنشا – 4,9%).
«قازىرگى تاڭدا حالىقتى جۇمىسپەن قامتۋ ورتالىعىندا تىركەلگەن جۇمىسسىزدار سانى 4873 ادامدى قۇرايدى, ونىڭ ىشىندە جاستار سانى – 1249. سول سياقتى 2 مىڭنان استام ادام (2147) جۇمىسىنان ايىرىلۋ بويىنشا الەۋمەتتىك تولەمدەردى الۋشىلار بولىپ سانالادى جانە 2247 ادام جۇمىسپەن قامتۋدىڭ بەلسەندى شارالارىنا قاتىسادى. جۇمىس ىزدەپ جۇرگەن تاعى 479 ادام بار» دەدى باسقارما باسشىسىنىڭ ورىنباسارى.
ەرلان ءجۇسىپوۆ ەلوردالىق جاستاردى, ناقتىراق ايتقاندا, ەلوردانىڭ جوعارى وقۋ ورىندارى مەن كوللەدجدەرىنىڭ تۇلەكتەرىن «جاستار پراكتيكاسى», «العاشقى جۇمىس ورنى», «ۇرپاقتار كەلىسىمشارتى» جوبالارىنا بەلسەندى قاتىسۋعا شاقىردى. ايتۋىنشا, بۇل – تاجىريبە جيناۋعا, رەسمي ەڭبەك ءوتىلىن الۋعا جانە ءوزىنىڭ باسەكەگە قابىلەتتىلىگىن دالەلدەۋگە تاماشا مۇمكىندىك. وسىعان دەيىنگى تاجىريبە كورسەتكەنىندەي, اتالمىش جوبالارعا قاتىسقاننان كەيىن ءوز قابىلەتىن كورسەتكەن جاستاردىڭ كوپشىلىگى تۇراقتى ورىندارعا جۇمىسقا ورنالاسادى.
