«AMANAT» پارتياسى نۇر-سۇلتان قالالىق فيليالىنىڭ اتقارۋشى حاتشىسى بەرىك جاكەنوۆ «جاستار رۋحىنىڭ» كەزەكتەن تىس VI سەزىنە قاتىسقان دەلەگاتتارمەن كەزدەستى.
بيىل 19 شىلدەدە پارتيانىڭ ەلوردالىق فيليالىندا وتكەن كەزدەسۋدە ادەمى اڭگىمە ءوربىپ, جاڭاشىل باستامالار كوتەرىلدى. كەزدەسۋ بارىسىندا بەرىك جاكەنوۆ, ەڭ الدىمەن, ۇيىمنىڭ جاڭا اتاۋىمەن قۇتتىقتاپ, سەزد دەلەگاتتارىمەن ەركىن فورماتتا اڭگىمە قۇردى.
جاستار بۇگىندە ماڭىزدى بولىپ تۇرعان تايم-مەنەدجمەنت جانە PR سالالارى بويىنشا العان شەبەرلىك ساباقتارى تۋرالى, سونىمەن قاتار پارتيا توراعاسى ەرلان قوشانوۆ, قر پرەزيدەنتى اكىمشىلىگى باسشىسىنىڭ ورىنباسارى ايدا بالاەۆا, پرەمەر-ءمينيستردىڭ ورىنباسارى ەرالى توعجانوۆ سىندى بەلدى تۇلعالاردىڭ سوزدەرىنەن العان اسەرىمەن بولىسە كەتتى.
ويتالقىدا جاستار اقپاراتتىق تولقىننىڭ قارقىندى دامىپ كەلە جاتقانىن, سوندىقتان اقپاراتتىق كەڭىستىكتە ءوز ويىن ورتاعا سالۋعا, بلوگينگ سالاسىن دامىتۋعا كوڭىل ءبولىپ جاتقانىن جەتكىزدى.
جاستار جاڭاشىل جوبالاردى قولعا الۋ كەرەك ەكەنىن, ءار ءوڭىردىڭ باسقا ايماقتان الار جوبالارى بار ەكەنىن اتاپ ءوتىپ, ويلارىن ورتاعا سالدى. كەزدەسۋدە پارتيانىڭ قوعامدا الاتىن ءرولى دە قوزعالدى.
«ساياسي پارتيا تۇراقتىلىق پەن بىرلىكتىڭ, باقىتتى دا بەيبىت ءومىردىڭ كەپىلى ءارى وعان جاۋاپتى. ءبىز كوزى اشىق, كوكىرەگى وياۋ, ەل ەرتەڭى ءۇشىن ماڭىزدى قادامعا بارا الاتىن, ەل يگىلىگى جولىندا تىڭ يدەيا ۇسىنا الاتىن ازاماتتارعا, جاستارعا ارقاشان اشىقپىز. جاستارمەن تۇراقتى تۇردە وسىنداي باسقوسۋ وتكىزۋدى ادەتكە اينالدىرۋعا كەلىستىك. قالامىزداعى وتىز التى مىڭ پارتيالاستاردىڭ جيىرما بەس پايىزى – جاستار. ءبىز ءۇشىن ەل قامىن ويلايتىن, وتانشىل ازاماتتاردى تاربيەلەۋ, پارتيانىڭ وقىپ-ۇيرەتۋ مەكتەبىنەن ءتالىم العىزىپ, ەلدىڭ پايداسىنا قىزمەت ەتەتىن ازاماتتاردى تاربيەلەۋ – پارىز.
NEET ساناتىنداعى, ياعني جاستار اراسىنداعى ماسىل توپتارداعى ازاماتتارمەن ءبىز مۇمكىندىگىنشە جۇيەلى جۇمىس جاساۋدىڭ جولىن قاراستىرعانىمىز ءجون. ەڭبەك ەتكەن ادامنىڭ قاشان دا ەڭسەسى بيىك, ءارى قاشان دا قوعامداعى قۇرمەتى بولەك. ۇلى اباي ايتقانداي: «ءبىرىڭدى, قازاق, ءبىرىڭ دوس كورمەسەڭ, ءىستىڭ ءبارى بوس» دەمەكشى, جاستاردىڭ قوعامدا جالعىز ەمەس ەكەنىن ءبىز دە سەزىندىرە ءبىلۋىمىز كەرەك.
كەشەگى قاسىرەتتى قاڭتار وقيعاسىندا الاڭعا كىمدەر شىقتى, ەڭ الدىمەن, الەۋمەتتىك جاعدايى تومەن جاستار شىقتى. ولاردىڭ ءبارى – ءبىز ءۇشىن باۋىر ەتى بالالارىمىز, ءىنى-قارىنداسىمىز. سوندىقتان وسى ساناتتاعى جاستاردى الەۋمەتتەندىرۋ, جۇمىسسىزدىق دەڭگەيىن تومەندەتۋ – ماڭىزدى شارا» دەپ اتاپ ءوتتى بەرىك ورالۇلى.
ءوز كەزەگىندە ويتالقىدا ەلوردالىق فيليال الاڭىن كەڭەيتۋ, قوعامدىق بىرلەستىك باقىلاۋشى نەمەسە ورىنداۋشى ورگان رەتىندە ەمەس, كونسترۋكتيۆتى الاڭ رەتىندە, شىعارماشىل جاستاردى بىرىكتىرەتىن, ەل دامۋىنا اتسالىسا الاتىن ۇيىم رەتىندە ودان ءارى دامىتۋ كەرەكتىگى ايتىلدى.
كەزدەسۋ سوڭىندا: «ەلدى العا باستايتىن سىزدەرسىزدەر, سىزدەردەن بارشا ەل تىڭ باستاما مەن وزىق يدەيا كۇتەدى. ادىلەتتى جاڭا قازاقستاندى قۇرۋ بۇگىنگى جاستاردان باستالادى. ادىلەتتى جاڭا قازاقستان – ەرتەڭگى جاستاردىكى» دەدى اتقارۋشى حاتشى.
بايان اسىلبەكوۆا
