«كەزدەسۋ ورنىن وزگەرتۋگە بولمايدى»
اقش پرەزيدەنتى دونالد ترامپ پەن كحدر كوسەمى كيم چەن ىننىڭ كەزدەسۋىنە دايىندىق قىزۋ ءجۇرىپ جاتىر.
اق ءۇيدىڭ ءباسپاسوز حاتشىسى سارا ساندەرستىڭ مالىمدەۋىنشە, كەزدەسۋدىڭ ورنى مەن ۋاقىتى وزگەرگەن جوق. ءبىرىنشى كەزدەسۋ, الدىن الا بەلگىلەنگەن كەستەگە ساي, 12 ماۋسىم كۇنى شامامەن سينگاپۋر ۋاقىتى بويىنشا تاڭەرتەڭگى 9-دا (استانا ۋاقىتىمەن 07:00) باستالۋعا ءتيىس. بىراق ول جۋرناليستەرگە كيم چەن ىن جازعان حاتتىڭ مازمۇنىن ايتىپ بەرۋدەن باس تارتتى. سارا ساندەرس سول سياقتى اقش-تىڭ سولتۇستىك كورەياعا سالىپ وتىرعان سانكتسيالارىن ءازىر الىپ تاستامايتىنىن دا جەتكىزدى. بۇل شەشىم كحدر يادرولىق قارۋىن تولىق جويعاننان كەيىن عانا قابىلدانادى.
ماۋسىمنىڭ 4-ءى كۇنى سولتۇستىك كورەيا باسشىسىنىڭ امەريكا پرەزيدەنتى كولىگىنەن كەم تۇسپەيتىن اۆتوموبيل ىزدەستىرىپ جاتقانى بەلگىلى بولدى. ال ترامپ دەلەگاتسياسى سينگاپۋرگە پرەزيدەنتتىڭ Cadillac كومپانياسى شىعارعان ماشيناسىن جەتكىزىپ بەرەدى. سونداي-اق كەلىسسوز جۇرگىزۋ ءۇشىن بەلگىلەنەتىن بولمەنىڭ بىرنەشە ەسىگى بولۋى كەرەكتىگى دە ايتىلىپ جاتىر. بۇل ءبىر ليدەردىڭ ەكىنشىسىن كۇتىپ تۇرماۋى ءۇشىن قاجەت.
يران قۋاتتى قارۋدى قايتا قولعا الدى
الەمنىڭ بارلىق الپاۋىت ەلدەرى بىلدىرگەن قاۋىپ راسقا اينالدى – يران ۋران بايىتۋدى قايتا قولعا الدى.
تەگەران بۇعان بۇدان ءبىر ايداي ۋاقىت بۇرىن اقش-تىڭ يرانمەن يادرولىق كەلىسىم باعدارلاماسىنان ءوز ەركىمەن شىعىپ كەتۋىنەن كەيىن بارىپ وتىر. سول كەزدە مۇنىڭ سوڭى وسىعان اپاراتىنىن رەسەي, قىتاي, ۇلىبريتانيا, گەرمانيا جانە فرانتسيا باسشىلارى ەسكەرتىپ ەدى.
«كەشە ءبىز اتوم ەنەرگياسى جونىندەگى حالىقارالىق اگەنتتىككە يادرولىق باعدارلاما كونتەكسىندەگى جۇمىسىمىزدى باستايتىنىمىز تۋرالى حات جولدادىق. بۇگىن اگەنتتىك ونى الدى. سوندىقتان بۇگىننەن باستاپ ىسكە قايتا كىرىسەمىز» دەدى يران اتوم ەنەرگياسى جونىندەگى ۇيىم باسشىسى ءالي اكبار سالەحي. ول سونىمەن بىرگە 6 ماۋسىمدا ناتانز قالاسىندا جاڭا تسەنتريفۋگا ءوندىرىسىنىڭ اشىلاتىنىن جەتكىزدى.
يراننىڭ رۋحاني كوسەمى اياتوللا ءالي حامەنەي 4 ماۋسىم كۇنى اتوم ەنەرگەتيكاسىنا جاۋاپ بەرەتىن مينيسترلىككە ۋراندى بايىتۋ ارقىلى قۋاتىن كۇشەيتۋ ءۇشىن دايىندالۋعا بۇيرىق بەردى. ول ەلدىڭ «ءبىر مەزگىلدە سانكتسيانىڭ استىندا قالىپ, ءبىر جاعىنان يادرولىق باعدارلامادان باس تارتىپ» وتىرا المايتىنىن اشىپ ايتتى.
قىتايدىڭ تۇستىگى تايفۋنعا تاپ بولدى
قىتايدىڭ وڭتۇستىك جاعالاۋى سەيسەنبىدەن بەرى كۇشتى نوسەر جاۋىن مەن قاتتى جەل ارالاسقان سۇراپىل داۋىلدىڭ استىندا قالدى.
ەلدىڭ گۋاندۋن پروۆينتسياسىن تۇگەل شارپىعان تروپيكالىق تايفۋن وسىمەن بيىلدىققا ءتورتىنشى مارتە قايتارا سوعىپ جاتىر. ول سيۋيۆەن ۋەزىنىڭ مۇحيت جاعالاۋىنداعى اۋداندارىنا قاتتىراق سالماق سالدى. مۇندا جەلدىڭ قۋاتى ساعاتىن 70 شاقىرىمعا دەيىن بارعان. جەرگىلىكتى
بيلىك بۇل جەردەن 400-دەن استام كەمەنى قاۋىپسىز اۋداندارعا قاراي جىبەرگەن.
ۇكىمەت زارداپ شەككەندەرگە 2,7 ملرد دوللار شاماسىندا اقشا ءبولدى. سينوپتيكتەر تايفۋننىڭ بۇدان ارى لەيچجوۋبانداو تۇبەگىنە جىلجىپ, بەيسەنبىدە ءتۇس اۋا سولتۇستىك-باتىسقا اۋاتىنىن ايتادى.
