زيمبابۆە پرەزيدەنتى ەلدى بىرلىككە شاقىردى
كەشە زيمبابۆەدە پرەزيدەنت ەممەرسون منانگاگۆا ەلدىڭ حالقىن بارلىق قيىندىقتى بىرلەسىپ جەڭۋ جولىندا كۇرەسۋگە ۇندەدى.
دۇيسەنبى كۇنى وتكەن پرەزيدەنت سايلاۋىندا جەڭىسكە جەتكەن ول مۇنى جاڭا ءداۋىردىڭ باسى دەپ مالىمدەدى.
سايلاۋ كوميسسياسىنىڭ مالىمەتىنشە, منانگاگۆا سايلاۋشىلاردىڭ 50,8 پايىز داۋىسىن الىپ, مەملەكەت باسشىسى ورىنتاعىنا قايتا وتىرعان. بۇل ءىس باسىنداعى پرەزيدەنت ءۇشىن 2,46 ملن سايلاۋشىنىڭ داۋىس بەرگەنىن كورسەتەدى. ال MDC پارتياسىنان تۇسكەن قارسىلاسى نەلسون چاميزا 2,13 ملن ادامنىڭ قولداۋىنا يە بولىپ, 47,3 پايىز داۋىس جيناعان. ول ەلدىڭ استاناسى – حارارە قالاسىنداعى ەلەكتورات داۋىسىن الۋدا قارسىلاسىن ەكى وراپ كەتكەن. مۇندا وعان 548 مىڭ ادام داۋىس بەرسە, منانگاگۆانى 204 مىڭ ادام قولداعان.
كيم چەن ىن ترامپقا تاعى حات جازدى
كحدر باسشىسى كيم چەن ىن اقش پرەزيدەنتى دونالد ترامپقا تاعى دا ءۇشبۋ حات جولداپ, ءوزىنىڭ ويلارىن قاعاز ارقىلى جەتكىزىپتى.
بۇل تۋرالى مالىمدەگەن اق ءۇيدىڭ ءباسپاسوز حاتشىسى سارا ساندەرس سولتۇستىك كورەيا ليدەرىنەن كەلگەن حاتتىڭ ترامپقا جەتكىزىلگەنىن, ەندى ونىڭ جاۋابى دا كەشىكتىرىلمەي بەرىلەتىنىن ايتتى. بۇعان ول حاتتىڭ تاقىرىبى «سينگاپۋردەگى سامميتتەن كەيىن جاريالانعان بىرلەسكەن مالىمدەمەگە قوسىمشا اڭگىمە» بولىپ وتىرعانىن قوستى.
بۇدان بۇرىن ساندەرس كحدر ليدەرىنەن كەلگەن حاتتىڭ 1 تامىزدا قولعا تيگەنىن مالىمدەگەن ەدى. بۇل ونىڭ ءبىرىنشى حاتى ەمەس. كيم چەن ىن بيىلعى 1 ماۋسىمدا ترامپقا جازعان ءبىرىنشى حاتىن كحدر ەڭبەك پارتياسى توراعاسىنىڭ ورىنباسارى كيم يون چحول ارقىلى بەرىپ جىبەرگەن بولاتىن. ال اق ءۇيدىڭ قوجايىنى ونى «جىلى دا سۇيكىمدى حات» دەپ باعالاعان ەدى.
