ەلدى ەلەڭ ەتكىزگەن
اقش بوسقىنداردى قابىلدامايدى
اقش-قا مەكسيكا ارقىلى مىڭداعان زاڭسىز بوسقىن باس ساۋعالاپ بارماق. ولاردىڭ باسىم بولىگى ورتالىق امەريكا ەلدەرىنەن جەتىپ وتىر.
وسىنى توقتاتپاق ماقساتىندا ءارى قاۋىپسىزدىكتى قامتاماسىز ەتۋ ءۇشىن پەنتاگون شەكاراعا 7 مىڭنان استام جاياۋ جانە تەڭىز كۇشتەرىنىڭ ساربازدارىن ورنالاستىردى. باس ساۋعالاپ جەتكەندەردىڭ قاتارى كۇن ساناپ ارتىپ بارادى. BBC اگەنتتىگى مەحيكو بيلىگىنىڭ مالىمەتى بويىنشا 4,5 مىڭ ادام بولعانىن, جاقىن كۇندەرى ولاردىڭ سانى 6 مىڭعا جەتۋى مۇمكىن ەكەنىن حابارلادى.
ايتا كەتەرلىگى, مەكسيكا بيلىگى 3,23 مىڭ بوسقىننىڭ رەسمي تۇردە پانا سۇراعانىن, قازىرگى ۋاقىتتا 2,7 مىڭ ادام ۋاقىتشا قۇجات الىپ, سول ارقىلى جۇمىس ىستەپ جۇرگەنىن ءمالىم ەتتى.
سۋپەركومپيۋتەر ىسكە قوسىلدى
Daily Mail باسىلىمى بۇرىن-سوڭدى بولماعان, قۇنى 19,5 ملن دوللار بولاتىن سۋپەركومپيۋتەر ىسكە قوسىلعانىن حابارلادى.
جاڭا قۇرىلعى ءبىر سەكۋندتا 200 ملن جۇمىستى اتقارۋعا قابىلەتتى. ال ونىڭ ءار ءچيپى 100 ملن بولشەكتەن تۇرادى. ول ادام ميىنىڭ قىزمەتىنە ۇقساس جۇمىس ىستەيدى. «ءبىز قاراپايىم كومپيۋتەردى ەمەس, مي قىزمەتىنە ۇقساس ناعىز ماشينانى دايىنداپ شىعاردىق» دەيدى پروفەسسور ستيۆ فۋربەر.
SpiNNaker (Spiking Neural Network Architecture) دەپ اتالاتىن سۋپەركومپيۋتەردىڭ كونتسەپتسياسىن ازىرلەۋ ءۇشىن ماماندار 20 جىل, سونداي-اق قۇراستىرىپ شىعۋعا 10 جىل ۋاقىتىن جۇمساپتى. قۇراستىرۋشىلاردىڭ ايتۋىنشا, بۇل ەڭ ءبىرىنشى كەزەكتە ادام ميىنىڭ قالاي جۇمىس ىستەيتىنىن ءبىلۋ ءۇشىن نەيروبيولوگتارعا قاجەت.
قىتاي رەسەيدەن قارۋ-جاراق الادى
رەسەي قىتايعا قارۋ-جاراق جەتكىزۋ جونىندە كەلىسىمگە كەلدى. بۇل تۋرالى ريا «نوۆوستي» اگەنتتىگى حابارلادى.
– ءبىز اسكەري قارۋ-جاراق سالاسىندا قحر-مەن ىنتىماقتاستىقتا جۇمىس ىستەپ كەلەمىز. س-400 جانە سۋ-35 جوباسىنان بولەك, ءتۇرلى جوبالارىمىز بار. ءبارىن ەگجەي-تەگجەيلى ايتقىم كەلمەيدى. دەگەنمەن جاقىندا جاڭادان ءۇش كەلىسىمشارتقا قول قويعانىمىزدى جاسىرا المايمىن, – دەدى رەسەي «روستەحىنىڭ» حالىقارالىق ىنتىماقتاستىق جانە ايماقتىق ساياسات جونىندەگى ديرەكتورى ۆيكتور كلادوۆ.
جاھانعا قاۋىپ تۋدىرارلىق قارۋ العان ەلگە اقش تاراپىنىڭ سانكتسيا سالاتىنى بەلگىلى. ال رەسەيدىڭ اسكەري-تەحنيكالىق ىنتىماقتاستىق جونىندەگى فەدەرالدى قىزمەتىنىڭ ديرەكتورى دميتري شۋگاەۆ امەريكانىڭ قىتايعا ەش زيانى تيمەيتىنىن جەتكىزدى.