نۇر-سۇلتان قالاسى بويىنشا بيىل 6274 وقۋشى مەكتەپ ءبىتىردى. ولاردىڭ اراسىنان 324 تۇلەك «التىن بەلگى» يەگەرى اتانۋعا, 352 ءتۇلەك ەرەكشە ۇلگىدەگى اتتەستات الۋعا ۇمىتكەر بولىپ وتىر.
2018-2019 وقۋ جىلىنىڭ قورىتىندىسى بويىنشا ۇبت-عا قاتىسۋعا 5791 تۇلەك (93,3 پايىز) ءوتىنىش ءبىلدىردى. ولاردىڭ 3711-ءى سىناقتى قازاق تىلىندە, 2068-ءى ورىس تىلىندە جانە 12-ءسى اعىلشىن تىلىندە تاپسىرادى. تۇلەكتەردىڭ ەڭ كوبى №54 مەكتەپتەن – 151 تۇلەك, ودان كەيىن №75 مەكتەپتە 143 تۇلەك وقۋ ءبىتىردى. «التىن بەلگىگە» ۇمىتكەرلەردىڭ باسىم كوپشىلىگى №1 مەكتەپ جانە فيزيكا-ماتەماتيكالىق باعىتتاعى نازارباەۆ ينتەللەكتۋالدىق مەكتەبىنەن – 16 وقۋشى, №48 مەكتەپتەن – 13 وقۋشى, ودان كەيىن №69, 62 مەكتەپتەر مەن «نۇر-وردا» مەكتەبىنەن – 11 وقۋشى, №61 مەكتەپ پەن دارىندى قىزدارعا ارنالعان «ءبىلىم يننوۆاتسيا» ليتسەيىنەن 9 ۇمىتكەردەن بولدى. ال ەرەكشە ۇلگىدەگى اتتەستاتقا ۇمىتكەرلەر قاتارىنا فيزيكا-ماتەماتيكالىق باعىتتاعى نازارباەۆ ينتەللەكتۋالدىق مەكتەبىنەن – 30, قىزدارعا ارنالعان «ءبىلىم يننوۆاتسيا» ليتسەيىنەن – 21, «نۇر-وردا» مەكتەبىنەن – 20, ۇلدارعا ارنالعان «ءبىلىم يننوۆاتسيا» ليتسەيىنەن – 19, №51 مەكتەپ پەن نازارباەۆ ينتەللەكتۋالدىق مەكتەبىنەن (حالىقارالىق باكالاۆريات) – 12 وقۋشىدان, №1, 17, 56, 66 مەكتەپتەردەن 11 وقۋشىدان تىركەلگەن.
