قوعام ىزگىلەنىپ, مۇقتاج جاندارعا, مۇمكىندىگى شەكتەۋلىلەرگە ءتۇرلى الۋەمەتتىك كومەك كورسەتىلىپ, ولاردىڭ وقشاۋ ومىرلەرى تۇرلەنىپ, قوعامدا وڭ پىكىر دە قالىپتاسىپ كەلەدى.
ىزگى قوعامدى دارىپتەي وتىرىپ, قامقورلىققا شىن مۇقتاج جانداردى دا, ولاردىڭ قوعامعا قاتىناسىن دا تاربيەلەي ءبىلۋىمىز كەرەك. ولارعا ءبىر كۇندىك جەيتىن «بالىقتان» گورى ونى اۋلاپ الاتىن, ومىرىنە ازىق بولاتىن «قارماقتىڭ» ءتيىمدى ەكەنىن ءتۇسىندىرۋ قاجەت-اق. ياعني, «ماسىلدىق» دەپ اتالاتىن, قوعام دامۋىنا كەرى ىقپالى بار ادەتتەردەن جيرەندىرە بىلگەنىمىز ءجون. ايتپەسە, جاقسى نيەتتىڭ كەرى اسەرى بولۋى ابدەن مۇمكىن.
«ءابجىلان ءادىس» تۋرالى ەستۋلەرىڭىز بار ما؟ ءبىر كەزدەرى كولونيالى بريتانيا وتارىنا العان ءۇندى جەرىندەگى ءابجىلاننان ءبىرجولا قۇتىلماق نيەتپەن ءاربىر ولگەن جىلاننىڭ باسىنا قۇن تولەپتى. «قۇنىققاننان دانىككەن جامان» دەگەن. وڭاي اقشا تاپقىسى كەلگەندەر ءابجىلاننىڭ تۇقىمىن كوبەيتىپ, ەسەلەپ وسىرۋگە كۇش سالىپتى. اقىرىندا قۇردىمعا كەتۋى ءتيىس جاندىكتىڭ سانى بۇرىنعىسىنان دا بىرنەشە ەسەگە ۇلعايىپ, جەردى جىلان جايلاعان كەز بولىپتى. سودان بەرى, «ەففەكت كوبرى» دەگەن ءسوز ءبىر نارسەنىڭ شەشىمىنە تالپىنعان جۇمىستىڭ كەرى اسەرى بولىپ, جاعدايدى ودان سايىن ۋشىقتىرعاندارعا ارنالىپ ايتىلادى ەكەن. مۇنىڭ جاڭعىرىعى كەيدە بايقالىپ قالادى. بۇل ارينە, مادەنيەت پەن پاراسات, قاناعات بولماعان جەردە اشكوزدىك پايدا بولاتىنى بەلگىلى.
اينالاڭىزعا كوز سالىڭىزشى, ەگەر الدەكىم اعات ىسىمەن دە سوزىمەن دە ورىنسىز قىلىعىمەن كوپشىلىكتىڭ نازارىن اۋدارسا, ونى وي سارابىنان وتكىزىڭىز. مۇمكىن جوعارىدا ايتقان جايتتاردىڭ ءبىر شەتى كورىنىپ تۇرعان بولار.
ايگۇل ۋايسوۆا
