استانا قالاسى اكىمدىگىنىڭ ۇيىمداستىرۋىمەن حالىقارالىق ايەلدەر كۇنى مەرەكەسىنە ارنالعان «الەمنىڭ جارىعى» اتتى كەش ءوتتى. وعان قالا اكىمىنىڭ ورىنباسارى ەسەت بايكەن, الەۋمەتتىك سالا قىزمەتكەرلەرى, مەديتسينا ماماندارى, ۇستازدار, ەڭبەك ارداگەرلەرى, كوپبالالى انالار, اسكەري قىزمەتشىلەر مەن كوممۋنالدىق قىزمەتكەرلەر قاتىستى.
مىڭنان اسا كورەرمەن جينالعان مەرەكەلىك كەشتە قازاق ەستراداسى مەن ءداستۇرلى ءان ونەرىنىڭ بەلگىلى وكىلدەرى ءان مەن جىردان شاشۋ شاشتى. كونتسەرت بارىسىندا تەك ءان مەن جىر عانا ەمەس, قازاق دالاسىندا عۇمىر كەشكەن, سوناۋ ۇماي انادان باستاپ, دومالاق انا, ماراۋ انا, جۇپار انا, قاراشاش انا, قىز داناي, بوپاي حانىم, ايعانىم شەشە, قارقابات انا سياقتى ادامزات ءۇشىن, ۇلت ءۇشىن ەتكەن ەڭبەگى ەرەن انالاردىڭ ەسىمى اتالىپ, ولار تۋرالى تولىمدى ماعلۇماتتار بەرىلدى.
وسى تۇلعالاردان بولەك, قازاق ۇلتىنان شىققان تۇڭعىش دارىگەر قىز گۇلسىم اسفەندياروۆا, العاش مەكتەپ اشىپ, بالا وقىتقان حان جاڭگىردىڭ ۇرپاعى قۇسني-جامال نۇرالىحانقىزى, ايەل جۋرناليستەردىڭ قارلىعاشى ءنازيپا قۇلجانوۆا, تاعى باسقا اتتارى تاريح بەتى مەن حالىق جادىندا ماڭگى ساقتالىپ قالعان ايتۋلى ارۋلاردىڭ ەسىمى مەن ەل ءۇشىن ەتكەن ەڭبەگى اتالىپ ءوتتى.
كونتسەرتتە تانىمال ءانشى جۇبانىش جەكسەن مەن ۇلى ابيك جەكسەن, ارداق بالاجانوۆا, ءمادينا سادۋاقاسوۆا, داستان ورازبەكوۆ شىرقاعان اندەر, «قورقىت» ەتنو-فولكلورلىق ءانسامبلى ورىنداعان تۋىندىلار ارۋلار مەرەكەسىنە ەستەن كەتپەس شاتتىق تارتۋ ەتتى. جاستاردىڭ ىقىلاسىنا بولەنىپ جۇرگەن قازبەك قۇرايىش, تۇرار, ولجاس قۇرمانبەك, رامينا ساتىبالدى مەن «Bala time» بالالار حورى, ايان بايجىگىت, باعجان وكتيابر, Ayree سەكىلدى جاس ونەرپازداردىڭ ونەرى مەرەكەلىك كوڭىل كۇي سىيلادى. كونتسەرت بارلىق ونەرپازدارمەن بىرگە كورەرمەندەر قوسىلا شىرقاعان ءشامشى قالداياقوۆتىڭ ايگىلى «انا تۋرالى جىر» انىمەن قورىتىندىلاندى.
