وتكەن دەمالىستاردا «قاناتتىلار» ينكليۋزيۆتى تەاترى قوس پرەمەرا ۇسىندى. ونىڭ العاشقىسى «ەكى تاعدىر – ءبىر ءومىر» اتتى ومىرباياندىق دراما, ەكىنشىسى – «ارمان» مەلودراماسى.
«ەكى تاعدىر – ءبىر ءومىر» دراماسىنىڭ اۆتورى – اقبوتا ەرماحانوۆا. قويۋشى رەجيسسەرى – سۇندەت سارسەن. سپەكتاكل جەلىسى وسى تەاتردىڭ جەتەكشىسى ارنۇر ىسقاقوۆتىڭ ومىرىنەن الىنعان. ياعني وقيعا شىنايى ومىرگە نەگىزدەلگەن.
«ءيا, تاعدىرىم, سەن جەڭدىڭ. ەشتەڭە… مۇلدەم ەشتەڭە بولماعانداي ءومىرىم جالعاسىن تاپپاق. ەشكىمگە ەشقاشان يىلمەگەن باسىممەن ءوزىڭنىڭ الدىڭا بەتپە-بەت كەلىپ تۇرمىن. ءارى قاراي ەشتەڭە بولماعانداي ءومىر سۇرە الامىن با؟ ارينە! تىرىسامىن. ۋاقىت ەمشى, كوندىم. كۇندەر وتەر, ايلار وتەر, جىل جىلجىر… ۇمىت بولىپ قالماسا دا بۇل ءساتىم, ءسال دە بولسا كومەسكىلەنەر كەزى كەلەر, ءساتى كەلەر» دەيدى باس كەيىپكەر.
پرەمەراعا قالا اكىمىنىڭ ورىنباسارى ەسەت بايكەن قاتىستى. ءوز سوزىندە ول «قاناتتىلار» تەاترىنىڭ اشىلعانىنا ءۇش جىل بولسا دا, ساحنالاعان تۋىندىلارى, ولاردىڭ سالماعى ءبىر مۇشەلدى ءجۇرىپ وتكەندەي اسەر بەرەتىنىن, ياعني تاجىريبەسى تولىسقانىن اتاپ ءوتتى. «جاستار» تەاترى جانىندا جۇمىس ىستەيتىن «قاناتتىلاردى» وسى جىلدىڭ سوڭىنا دەيىن جەكە وتاۋ ەتىپ شىعارۋ ماسەلەسى قارالىپ جاتقانىن جەتكىزدى.
«تاعدىر جولى سان تاراۋ. بىردەي ورىلگەنمەن, وزگەشەلىكتەرى جەتىپ ارتىلادى. ءبىرى وتكەنىنە قايتا ورالسام دەيدى, ءبىرى وتكەنىمدى قوقىستان ىزدە دەيدى. وزەكتى ورتەيتىن وكىنىشتى ساتتەرى دە جوق ەمەس. ادامنىڭ تاعدىرى تۋرالى اقبوتا ەرماحانوۆانىڭ «ەكى تاعدىر – ءبىر ءومىر» اتتى اۆتوبيوگرافيالىق دراماسى تەرەڭ ويعا, اسەرگە بولەيدى» دەدى ەسەت بايكەن.
ال «ارمان» مەلودراماسىنىڭ اۆتورى جانە قويۋشى رەجيسسەرى – ديحان ءبيبىاجار. سپەكتاكلدە بالالىق شاقتان ادال دوستىققا سەرت بەرىپ, ارمان قۋىپ ونەر جولىنا تۇسكەن, تاعدىرلارى ءبىر ارناعا توعىسقان ءتورت دوستىڭ باسىنان وتكەن شىتىرمان وقيعالارى باياندالادى.
