ەسىل اۋداندىق بەلسەندى ۇزاق ءومىر ءسۇرۋ ورتالىعىندا وتكەن تاماشا كونتسەرتتىك باعدارلامانىڭ كۋاگەرى بولدىم. ەلوردالىق «ارقا اۋەندەرى» ءانسامبلى ورتالىقتىڭ زەينەتكەرلەرى مەن قىزمەتكەرلەرىنە مۋزىكالىق باعدارلاما ۇسىندى. ءبىر جارىم ساعاتقا سوزىلعان كونتسەرتتى تاماشالاي وتىرىپ, ۋاقىتتىڭ قالاي تەز وتكەنىن بايقاماي قالدىق.
ءانسامبلدىڭ جەتەكشىسى كەنجەتاي جانۇزاقوۆا ءانسامبلدى العاش رەت 5 اداممەن اشقانىن, قازىر قاتارى 20 ادامعا جەتكەنىن ماقتانىشپەن ايتتى. ايتسا ايتقانداي ەكەن, انسامبل قۇرامىنىڭ الدى سەكسەننەن اسقان, سوڭى جەتپىسكە تاياپ قالعان ونەر يەلەرىنەن قۇرالعان. قازاقستاننىڭ ءار تۇكپىرىنەن كەلىپ, استانادا باس قوسقان ەڭبەك ارداگەرلەرى مەن كوپبالالى انالاردىڭ تامىلجىتا ءان سالىپ, مىڭ بۇرالا بيلەگەنىن كورگەندە, بەينە ءبىر كاسىبي ونەرپازداردان ايىرماشىلىعى جوق-اۋ دەگەن ويدا بولدىم.
انسامبلگە كوركەمدىك جەتەكشىلىك ەتىپ ءارى ديريجەر بولعان كەنجەتاي جانۇزاقوۆانى «سەگىز قىرلى, ءبىر سىرلى» دەسەم ارتىق بولماس. حالىق اندەرى مەن بەلگىلى كومپوزيتورلاردىڭ تۋىندىلارى شىرقالعاندا, زالداعى كورەرمەن سۇيسىنە قول سوقتى. جاسى سەكسەننەن اسسا دا, ساحنا تورىنەن تابىلعان بولات اكەشوۆ پەن ءانشى راحيليا ابدۋكاريموۆانىڭ ورىنداۋىنداعى تاماشا انگە دە كورەرمەن ىستىق ىقىلاسىن ايامادى. كۇيشىلەر بەكسۇلتان تولەپوۆ پەن تەمىرەش كيرەەۆتىڭ ورىنداۋىنداعى حالىق كۇيلەرى قالىڭ كوپشىلىكتىڭ كوڭىلىنەن شىقتى. «ارقا اۋەندەرىنىڭ» بارلىق مۇشەسى جەكە داۋىستا جانە دۋەت, تريو, كۆارتەت تۇرىندە ورىنداۋشىلىق شەبەرلىگى شىڭدالعان ونەرپازدار ەكەنىن پاش ەتتى.
كۇلاش شۇرەنوۆا, ارداگەر ۇستاز,
قر ءبىلىم بەرۋ ءىسىنىڭ ۇزدىگى
