پرەزيدەنتتىككە ۇمىتكەر مەيرام قاجىكەننىڭ ۇگىت-ناسيحات جۇمىستارى سەمەي قالاسىندا جالعاستى. ول الدىمەن «سەمەي ينجينيرينگ» زاۋىتىنا باردى. كاسىپورىن جۇمىسشىلارىمەن كەزدەسۋ بارىسىندا ول ەكونوميكالىق رەفورمالاردىڭ ءبىر بولىگى رەتىندە ەڭ تومەنگى جالاقىنى قالىپتاستىرۋ تاقىرىبىنا تولىق توقتالدى.
«بۇگىنگى تاڭدا ەڭ تومەنگى جالاقىنىڭ قالاي انىقتالاتىنى بەلگىسىز. مەن ونى يندەكستەۋدى اشىق ەتىپ قانا قويماي, ەىدۇ-عا مۇشە ەلدەردىڭ دەڭگەيىنە جەتكىزۋدى ۇسىنامىن. تيىسىنشە ەتج 60 مىڭ تەڭگەنى ەمەس, كەم دەگەندە 150 مىڭ تەڭگەنى قۇرايتىن بولادى» دەپ ناقتىلادى م.قاجىكەن.
ۇمىتكەر ازاماتتىق قوعام تاقىرىبىنا كەڭىنەن توقتالىپ, ونى ءوز باعدارلاماسىنىڭ نەگىزگى ءبولىمى ەكەنىن اتاپ ايتتى.
«مەملەكەت ءاربىر ازاماتقا ءوزىن-ءوزى دامىتۋ ءۇشىن قولايلى جاعداي مەن مۇمكىندىك جاساۋى كەرەك. ازاماتتىڭ ءوزى الەۋمەتتىك سەرىكتەستىك, اتاپ ايتقاندا, كاسىپوداقتار, كاسىپكەرلەر قاۋىمداستىعى, ازاماتتىق قوعام ينستيتۋتتارى ارقىلى ءومىر ءسۇرۋ جاعدايلارىن وزگەرتە الاتىن پروتسەستەرگە قاتىسۋى كەرەك. بۇل – ءبىزدىڭ العا قويعان ماقساتىمىز. وسىلايشا, ۇمىتكەر ءار ادام وزدەرىن لايىقتى جالاقىمەن قامتاماسىز ەتە الادى. بۇل جەردە مەملەكەت پەن جۇمىس بەرۋشىلەردىڭ الەۋمەتتىك قولداۋىنا دا يە بولۋ كەرەك» دەدى م.قاجىكەن.
زاۋىت قىزمەتكەرلەرى ۇمىتكەردىڭ سىبايلاس جەمقورلىققا قارسى كۇرەستى قالاي جۇرگىزۋدى جوسپارلاپ وتىرعانىن سۇرادى.
«ءتىپتى سىبايلاستاردىڭ اراسىندا دوستارىم بولسا دا وتە قاتال بولامىن» دەپ جاۋاپ بەردى ول. م.قاجىكەن قازىرگى ۋاقىتتا سىرتقى قاۋىپتەردىڭ ءتونۋى ماسەلەسى كۇردەلى جاعدايدا, ۇلتتىق قاۋىپسىزدىك, ونىڭ ىشىندە قورعانىس باعىتىن نىعايتۋ وتە وزەكتى ەكەنىن اتاپ ءوتتى.
