استانا قالاسىندا «قازاقستانداعى ەتيكالىق دونورلىق» اتتى سەمينار ءوتتى, دەپ حابارلايدى astana-akshamy.kz
ونىڭ الاڭىندا ساراپشىلار اعزا دونورلىعى مەن ترانسپلانتاتتاۋدىڭ زاڭدىق جانە ەتيكالىق نەگىزدەرىن, ددۇ-نىڭ باسشىلىق قاعيداتتارىن تالقىلادى, سونداي-اق اعىمداعى جاعدايدى جانە قازاقستانداعى ۇلتتىق ترانسپلانتاتتاۋ باعدارلاماسىن ىسكە اسىرۋداعى نەگىزگى قيىندىقتاردى قاراستىردى.
«ترانسپلانتولوگيانىڭ دامۋ دەڭگەيى دەنساۋلىق ساقتاۋ جۇيەسى مەن مەديتسينالىق قىزمەتتەر ساپاسىنىڭ دامۋىنىڭ وزىندىك ينديكاتورى بولىپ تابىلادى, ويتكەنى اعزالاردى ءساتتى ترانسپلانتاتتاۋ قۇقىقتىق بازا, دايىندالعان ادام رەسۋرستارى, تەحنيكالىق مۇمكىندىكتەر جانە ەلدە قالىپتاسقان دونورلىق مادەنيەت بولعان كەزدە عانا جۇزەگە اسىرىلادى.
ترانسپلانتاتتاۋ سوڭعى ونجىلدىقتارداعى, سونىڭ ىشىندە قازاقستان ءۇشىن دە مەديتسيناداعى ەڭ ماڭىزدى سەرپىلىس بولدى, بۇل پاتسيەنتتەردىڭ ءومىرىن كوپتەگەن جىلدارعا ۇزارتۋعا مۇمكىندىك بەرەدى جانە كوبىنەسە ەمدەۋدىڭ جالعىز ءتاسىلى بولىپ تابىلادى», – دەدى قر دسم مەديتسينالىق كومەك كورسەتۋ دەپارتامەنتىنىڭ ديرەكتورى ۇلىقبەك مەدەۋبەكوۆ.
دەنساۋلىق ساقتاۋ مينيسترلىگىنىڭ وكىلى اتاپ وتكەندەي, قازاقستان اعزالاردى ترانسپلانتاتتاۋ بويىنشا جوعارى تەحنولوگيالىق وپەراتسيالاردى جۇرگىزۋ ءۇشىن دامىعان زاماناۋي ينفراقۇرىلىمعا يە.
وتاندىق ماماندار جۇرەكتى, باۋىردى, بۇيرەكتى, وكپەنى ترانسپلانتاتتاۋدى جوعارى دەڭگەيدە جۇرگىزەدى جانە ترانسپلانتاتتاۋ ناتيجەلەرى الەمدىك ستاندارتتارعا سايكەس كەلەدى.
قازاقستاندا اعزا دونورلىعى مەن اعزالاردى ترانسپلانتاتتاۋدىڭ ءتيىمدى ۇلتتىق جۇيەسىن دامىتۋ ءۇشىن 2012 جىلى ترانسپلانتاتتاۋدى جانە جوعارى تەحنولوگيالىق مەديتسينالىق قىزمەتتەردى ۇيلەستىرۋ جونىندەگى رەسپۋبليكالىق ورتالىق قۇرىلدى.
قازىرگى ۋاقىتتا ەلدە 7 ترانسپلانتاتتاۋ ورتالىعى, 40 دونورلىق ۇيىم جۇمىس ىستەيدى, ولار قايتىس بولعاننان كەيىن دونوردى ترانسپلانتاتتاۋ ماقساتىندا كوپ اعزانى الۋعا دايىنداۋ بويىنشا مەديتسينالىق قىزمەت كورسەتەدى.
بەيىندى ۆەدومستۆونىڭ مالىمەتىنشە, سوڭعى 10 جىلدىڭ ىشىندە قازاقستاندا 2,5 مىڭنان استام اعزالاردى ترانسپلانتاتتاۋ وپەراتسياسى, بۇل رەتتە 83% جاعدايدا ءتىرى كەزىندەگى دونوردان, 17% جاعدايدا قايتىس بولعاننان كەيىنگى دونوردان جۇرگىزىلدى.
«ترانسپلانتاتتاۋ ءومىردى ساقتايدى جانە بالاماسى جوق جەردە ادام ءومىرىنىڭ نەگىزگى فۋنكتسيالارىن قالپىنا كەلتىرەدى. بۇل رەتتە, بار قاۋىپتەردى ەسكەرە وتىرىپ, دونورلىقتىڭ ەتيكاسى مەن قاۋىپسىزدىگىن بارىنشا قامتاماسىز ەتۋ ءۇشىن دەنساۋلىق ساقتاۋ ماماندارىن وقىتۋعا باسا نازار اۋدارۋ قاجەت», – دەدى ددۇ-نىڭ قازاقستانداعى وكىلى دوكتور سكەندەر سىلا.
الەمدە جىل سايىن 115 مىڭنان استام اعزانى ترانسپلانتاتتاۋ جۇرگىزىلەدى. اقش, يسپانيا, حورۆاتيا, يران سياقتى ەلدەردە اۋىستىرىلىپ قوندىرىلعان اعزالاردىڭ كەم دەگەندە 85%-ى قايتىس بولعاننان كەيىنگى دونورلاردان الىنعان.
بۇگىنگى تاڭدا دونورلار مەن رەتسيپيەنتتەردىڭ بىرىڭعاي تىزىلىمىندە 4000-عا جۋىق ادام, ونىڭ ىشىندە 104 بالا اعزانى ترانسپلانتاتتاۋدى كۇتۋدە, ولاردىڭ كوپشىلىگى جاس جانە ەڭبەككە قابىلەتتى جاستاعى ادامدار. رەتسيپيەنتتەردىڭ ىشىندە 3735 ادامعا بۇيرەك, 185 ادامعا باۋىر, 144 ادامعا جۇرەك, 16 ادامعا وكپە ترانسپلانتاتتاۋ قاجەت.
قازىرگى ۋاقىتتا مينيسترلىك ەلىمىزدە ترانسپلانتولوگيالىق قىزمەتتى دامىتۋ ءۇشىن كەلەسى شارالاردى قابىلداۋدا.
حالىقارالىق ستاندارتتارعا سايكەس كەلەتىن ماتەريالدىق-تەحنيكالىق بازا نىعايتىلدى, شەتەلدە جانە ەل ىشىندە ترانسپلانتاتتاۋ ۇيلەستىرۋشىلەرى وقىتىلدى, قر-دا 2023-2025 جىلدارعا ارنالعان اعزا دونورلىعى جانە ترانسپلانتولوگيا قىزمەتىن جەتىلدىرۋ جونىندەگى ءىس-شارالار جوسپارى ازىرلەندى.
بۇگىنگى تاڭدا قازاقستاننىڭ 6000-عا جۋىق ازاماتى قايتىس بولعاننان كەيىن اعزالاردىڭ دونورلىعىنا كەلىسىم ءبىلدىردى.
