ايتۋلى مەرەكەلەردى ايشىقتادى
ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا سارىارقا اۋدانى اكىمدىگىنىڭ ۇيىمداستىرۋىمەن «ارقا اۋەندەرى» اتتى كونتسەرت ءوتتى. قازاق حاندىعىنىڭ – 550, ۇلى جەڭىستىڭ – 70 جانە قازاقستان حالقى اسسامبلەياسىنىڭ 20 جىلدىعىنا ارنالىپ ۇيىمداستىرىلعان كونتسەرتتە دوستىق جانە مايدان اندەرى شىرقالىپ, ەل تاريحىنان سىر شەرتەتىن كۇيلەر ورىندالدى.
كونتسەرت باعدارلاماسىندا باكىر تاجىباەۆتىڭ «تۋعان جەر», اسان قايعىنىڭ «ەل ايىرىلعان», قادىر مىرزا ءالىنىڭ «قازاق وسى» شىعارمالارى دومبىرانىڭ سۇيەمەلدەۋىمەن ورىندالىپ, «سوعىسقا كەتكەن اعانىڭ قوشتاسۋ حاتى» مونولوگى وقىلدى. قر مادەنيەت قايراتكەرى, «قۇرمەت» وردەنىنىڭ يەگەرى, كۇيشى, كومپوزيتور, ونەر زەرتتەۋشىسى قايىرجان ماقانوۆ حاندار تاريحىنا
شولۋ جاساپ, ارداگەرلەردىڭ ەرلىگىن دارىپتەپ, تىڭ ءمالىمەتتەرىمەن ءبولىستى.
كەش سوڭىندا سارىارقا اۋدانى ارداگەرلەر كەڭەسىنىڭ توراعاسى عابباس احمەتوۆ ءسوز سويلەپ, جينالعان قاۋىمدى
ۇلى جەڭىس مەرەكەسىمەن قۇتتىقتادى. مەرەكەلىك كونتسەرتتى تارتۋ ەتكەن «ارقا اۋەندەرى» ءان-كۇي ۇجىمىنىڭ جەتەكشىسى كەنجەتاي جانۇزاقوۆا اتالمىش شارانى ۇيىمداستىرۋعا قولداۋ كورسەتكەن استانا قالاسى مادەنيەت باسقارماسىنىڭ باسشىسى بولات ماجاعۇلوۆقا العىسىن ءبىلدىردى.
گۇلنار جۇپاربەك,
ل.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ ستۋدەنتى