استانادا «ەلىمنىڭ تاعدىرى – مەنىڭ تاعدىرىم!» اتتى XVI قازاقستان حالقى دوستىعىنىڭ فەستيۆالى ءوتتى. اسسامبلەيانىڭ 20 جىلدىعى اياسىندا ۇيىمداستىرىلعان مەرەكەلىك بايقاۋعا 19 ۇلتتىق مادەني ورتالىقتىڭ ونەر ۇجىمدارى قاتىستى.
ەلوردادا تۇرىپ جاتقان بارلىق ۇلت وكىلدەرىنىڭ انا ءتىلىندە ەركىن شىعارماشىلىقپەن اينالىسۋعا جاعداي جاساۋعا, تۋعان مادەنيەتكە سۇيىسپەنشىلىك پەن قۇرمەت سەزىمىن تاربيەلەۋگە, ەڭ باستىسى, قازاقستاندىق ءپاتريوتيزمدى ناسيحاتتاۋعا باعىتتالعان فەستيۆالدا ۇمىتكەرلەر جەتى جانر بويىنشا ءوز ونەرلەرىن ورتاعا سالدى. ءداستۇر بويىنشا قالالىق مادەني ورتالىقتاردىڭ ءمۇشەلەرى ءان سالىپ, ۇلتتىق اسپاپتاردا ويناپ, بي بيلەدى.
قالا تۇرعىندارىنا جاقسى تانىس «ستوكروتكا», «لادۋشكا», «ستانيچكي» توپتارى جاڭا باعدارلاماسىمەن تانىستىردى. كوركەمسوز وقۋدان «راديما» بەلارۋس مادەني ورتالىعىنىڭ وكىلى ماكسيم كولچاناۆ, «زلاتا» بولگار مادەني ورتالىعىنان ولگا اندريەۆسكايا, «وبەرەگ» ۋكراين مادەني ورتالىعىنىڭ مۇشەسى الەكساندر باكالياريك ۇزدىكتەر قاتارىنان كورىندى.
قالالىق «ۆوزروجدەنيە» نەمىستەر قوعامىنىڭ وكىلى فەستيۆال جەڭىمپازى كونستانتين ەرمولەنكو اسەرىمەن ءبولىسىپ: «مەن بۇل فەستيۆالعا ءتورتىنشى رەت قاتىسىپ وتىرمىن. فەستيۆال وتە قىزىقتى. ونەر جارىسىنا ەلوردالىق ەتنومادەني ورتالىقتاردىڭ بارلىق وكىلدەرى جينالادى. مەن ءۇشىن اسسامبلەيا – ۇلكەن ءبىر وتباسى, بەيبىتشىلىك, تاتۋلىق پەن ماحاببات ورناعان ۇلكەن ءۇي. ءاربىر ەتنومادەني ورتالىقتىڭ باسقالارعا وزدەرىنىڭ سالت-داستۇرلەرىن كورسەتە الاتىنى وتە قۋانىشتى» دەدى.
فەستيۆال قورىتىندىسىندا بارلىق جەڭىمپازدار مەن قاتىسۋشىلارعا ديپلومدار مەن باعالى سىيلىقتار تارتۋ ەتىلدى.
ايگۇل ۋايسوۆا
