ەلىمىزدە ازاماتتىق حال اكتىلەرىن تىركەۋ ورگاندارىنىڭ قۇرىلعانىنا بيىل 95 جىل تولادى. وسى ايتۋلى شارا قارساڭىندا استانا قالاسى اكىمىنىڭ ورىنباسارى اندرەي لۋكين ءبىر توپ احاج قىزمەتكەرلەرىن قابىلداپ, ەلوردا اكىمى ادىلبەك جاقسىبەكوۆتىڭ اتىنان العىس حاتپەن ماراپاتتادى.
ادام العاش دۇنيە ەسىگىن اشقاندا ونى الدىمەن ارنايى قۇجاتپەن قامتاماسىز ەتەتىن ورگان – احاج. مەملەكەت ىشىنەن جاڭا ءبىر مەملەكەت, ياعني جاس وتاۋ شاڭىراق كوتەرگەندە ولارعا باتاسىن بەرىپ, قۇجات رەتىندە راستايتىن دا وسى قۇزىرلى مەكەمە. سوندىقتان بۇل ورگاننىڭ ايتۋلى مەرەكەسى ەلىمىز ءۇشىن دە ماڭىزدى. سالا قىزمەتكەرلەرىنە قۇتتىقتاۋ لەبىزىن جەتكىزگەن ا.لۋكين وسىعان ايىرىقشا توقتالدى.
ءبىزدىڭ ارقايسىمىز ومىرگە ماڭىزدى قادام جاساپ, شاڭىراق كوتەرگەندە سىزدەردىڭ تاراپىڭىزدان جىلى سوزدەر, قۇتتىقتاۋلار مەن جاقسى تىلەكتەر ەستيمىز. شىنايى نيەتپەن ايتىلعان جاقسى سوزدەرىڭىز قانشاما وتباسىنىڭ بەرىك قالىپتاسۋىنا سەپتىگىن تيگىزدى. جاس شاڭىراقتىڭ العاشقى قادامىن قۇجات رەتىندە راستاۋ دا كاسىبي بىلىكتىلىكتى تالاپ ەتەتىن جۇمىس. سىزدەر ودان وزگە دە كوپتەگەن ماڭىزدى قىزمەتتەردى ابىرويمەن اتقارىپ, الدىنعى بۋىن – ارداگەرلەردىڭ ءتالىمدى تاجىريبەسىن لايىقتى جالعاستىرىپ كەلەسىزدەر. وتباسىلىق قۇندىلىقتاردى ناسيحاتتاۋ , ساقتاۋ باعىتىندا ءسىڭىرىپ جاتقان ەڭبەكتەرىڭىز ۇشان-تەڭىز. سىزدەردى قازاقستاندىق وتباسىلاردىڭ ۇزدىك ءداستۇرىن جالعاستىرۋشىلار دەپ بىلەمىز. مەرەكەلەرىڭىز قۇتتى بولسىن! – دەدى قالا اكىمىنىڭ ورىنباسارى قۇتتىقتاۋ سوزىندە.
احاج قىزمەتكەرلەرىنىڭ كيەلى مىندەتىنىڭ كۋاسىندەي بولىپ, بۇل شاراعا شيرەك عاسىردان استام ۋاقىتتان بەرى جۇپتارىن جازباي كەلە جاتقان ەرلى-زايىپتىلار دا قاتىستى. بيىل قايرات قاراتاەۆ پەن قارلىعاش ءابدىراحمانوۆانىڭ شاڭىراق كوتەرگەندەرىنە 50 جىل تولىپتى. التىن توي يەلەرىنە سول كۇنى قۇتتىقتاۋلار مەن العىستار كوپ ايتىلدى. ال ميحايل سەرگەەۆ پەن ليديا سەرگەەۆانىڭ وتباسىن قۇرعاندارىنا 60 جىل! گاۋھار توي يەلەرى دە قۇرمەت پەن العىسقا بولەندى. قالا اكىمىنىڭ ورىنباسارى ولارعا ەستەلىك سىيلىقتار تابىس ەتتى.
وتباسىلىق قۇندىلىقتىڭ كۋاسى – سىزدەرگە ءبىزدىڭ قۇرمەتىمىز شەكسىز. سىزدەر ىرگەسى بەرىك شاڭىراق كوتەرىپ, بارشامىزعا ۇلگى بولىپ كەلەسىزدەر. ادالدىق, دوستىق, ماحاببات سياقتى ومىرلىك قۇندىلىقتاردىڭ بار ەكەنىن دە ىسپەن دالەلدەدىڭىزدەر. سىزدەرگە زور دەنساۋلىق تىلەيمىن, باقىتتى وتباسىلىق عۇمىرلارىڭىز ۇزاققا جالعاسا بەرسىن! – دەپ اندرەي لۋكين مەرەيتوي يەلەرىنە جىلى لەبىزىن ءبىلدىردى.
بۇدان سوڭ التىن توي جانە گاۋھار توي يەلەرى استانا قالاسىنىڭ مەرەيتوي يەلەرىنىڭ جىلناماسى – قۇرمەت كىتابىنا ەستەلىك قولتاڭبالارىن قالدىردى.
ايتۋلى داتاعا وراي, احاج قىزمەتكەرلەرىن ەلوردانىڭ اۋداندىق اكىمدىكتەرى, قالالىق ادىلەت دەپارتامەنتى, ءبىلىم باسقارماسى, كوشى-قون پوليتسياسى جانە باسقا ۇيىمدار قۇتتىقتاپ, العىس حاتتارمەن ماراپاتتادى.
م. نۇرىمۇلى, astana-akshamy.kz
