قازاقستان پرەزيدەنتى قاسىم-جومارت توقاەۆتىڭ العاشقى جۇمىس ساپارى تۇركىستان قالاسىنان باستالدى.
اۋەلى مەملەكەت باسشىسى «ازىرەت سۇلتان» تاريحي-مادەني قورىق-مۋزەيىنىڭ ارحەولوگيالىق جانە ارحيتەكتۋرالىق ەسكەرتكىشتەرى مەن قوجا احمەت ياساۋي كەسەنەسىن ارالاپ كوردى. قاسىم-جومارت توقاەۆ قالا جۇرتشىلىعىمەن كەزدەسىپ, ءوزىنىڭ ەل پرەزيدەنتى رەتىندەگى العاشقى ساپارىنىڭ تۇركىستان قالاسىنان باستالۋىندا ۇلكەن ءمان بارىن جەتكىزدى.
– تۇركىستان – مەملەكەتىمىزدىڭ التىن بەسىگى. ەلباسىنىڭ بۇل قالاعا ەرەكشە مارتەبە بەرۋ تۋرالى شەشىمى كەزدەيسوق ەمەس. ەجەلگى تۇركىستاننىڭ جاڭعىرۋى مەن جاڭارۋى دامۋ جولىمىزدىڭ دۇرىستىعىن كورسەتەدى. الداعى جۇمىستارىم تۋرالى جانە قوعامدى تولعاندىرعان ماسەلەلەردى شەشۋگە بايلانىستى ويىمدى ءدال وسى جەردە بولىسكىم كەلەدى, – دەدى قازاقستان پرەزيدەنتى.
مەملەكەت باسشىسى ۇكىمەتكە بيۋدجەتتى تەك مەملەكەتىمىزدىڭ دامۋىنا جانە قاۋىپسىزدىك ماقساتتارىنا وراي قايتا بەيىمدەۋدى, سونداي-اق يميدجدىك ءىس-شارالارعا ارنالعان شىعىنداردى ازايتۋدى تاپسىردى.
– مەنىڭ پرەزيدەنت رەتىندەگى نەگىزگى ۇستانىمىم ەڭ الدىمەن – ساباقتاستىق. ساباقتاستىق جوق جەردە تۇراقتىلىق بولمايدى. تەك داعدارىس, ءتىپتى جانجال, قاقتىعىس قانا بولادى. بۇل – بۇكىل الەمنىڭ دالەلدەنگەن تاريحي تاجىريبەسى. ەكىنشى ۇستانىمىم – ادىلەتتىلىك. ادىلەتتىلىك جوق قوعام ەشقاشان دامىمايدى. تەك قانا قيىنشىلىق, تاۋقىمەت, قۇلدىراۋ بولادى. ءۇشىنشى ۇستانىمىم – ىلگەرىلەۋ. قازاقستان باسەكەلەستىككە تولى الەمدە تەك قانا العا جىلجۋدى كوزدەيدى, – دەپ مالىمدەدى پرەزيدەنت تۇركىستاندا سويلەگەن سوزىندە.
