قر تۇڭعىش پرەزيدەنتى كۇنى قارساڭىندا ەلورداداعى جالپى ءبىلىم بەرەتىن مەكتەپتەردە وقيتىن 10-سىنىپ وقۋشىلارىنىڭ اراسىندا «ەلوردالىق ءبىلىم بەرۋ مەكەمەلەرىنىڭ كوشباسشى وقۋشىسى» V قالالىق زياتكەرلىك بايقاۋى ءوتتى.
ايتۋلى شارا وسىمەن بەسىنشى مارتە ءوتىپ وتىر. العاشقى سايىستىڭ تاقىرىبى ەلباسىنىڭ داڭعىل جولىنا ارنالعان ەدى. بيىلعى بايقاۋ – الاشتىڭ ارداقتى تۇلعاسى, تاريحشى, پۋبليتسيست ءاليحان بوكەيحاننىڭ 150 جىلدىق مەرەيتويىنا وراي وتكىزىلدى.
سايىستىڭ ماقساتى – جاستاردىڭ بىلىمگە دەگەن قىزىعۋشىلىعىن وياتىپ, ولاردى وتانسۇيگىشتىك رۋحتا تاربيەلەۋ. بايقاۋدا كوشباسشىلىق قابىلەتتەرى مەن شەشەندىك شەبەرلىكتەرى توسەلگەن, قوعامدىق جۇمىستارعا بەلسەندى ارالاساتىن 12 وقۋشى باق سىنادى. كورنەكتى تۇلعانىڭ قايراتكەرلىك قىرى مەن ءومىر جولى تۋرالى سالماقتى ويلار ايتىلدى. پايىمدى پىكىرلەر قوزعالدى. جەتكىنشەكتەر تۋعان ەلىنىڭ تاريحىنان تەرەڭ حاباردار ەكەندەرىن كورسەتتى.
ءۇش كەزەڭگە بولىنگەن بايقاۋدىڭ ناتيجەسى بويىنشا ءبىرىنشى ورىندى ەلورداداعى №64 مەكتەپ-ليتسەيدىڭ وقۋشىسى الان نەسىپبەك يەلەنسە, ال باس جۇلدەنى №8 مەكتەپتىڭ وقۋشىسى ديدار سەيىتحان جەڭىپ الدى.
ازامات ەسەنجول
