قازاقستان مۋزىكا مەكتەبىنىڭ مايتالمانى, ونەرسۇيەر قاۋىمنىڭ اراسىندا «قازاقستاننىڭ التىن فلەيتاشىسى» اتانعان شەبەر ورىنداۋشى, اقش-تا وتكەن بايقاۋدا جەڭىمپاز اتانعان ءبىرىنشى قازاق فلەيتاشىسى قايروللا جۇماكەنوۆتىڭ ەسىمىن بىرەۋ بىلسە, بىرەۋ بىلمەيدى. امەريكا فلەيتاشىلارى قازاق مۋزىكانتىنىڭ ونەرىن جوعارى باعالاپ, ۇلتتىق فلەيتا قاۋىمداستىعىنىڭ مۇشەلىگىنە قابىلداعان. دارىندى مۋزىكانت – كوپتەگەن شەتەلدىڭ تانىمال ساحنالارىندا قازاقستاننىڭ كەلبەتىن الەمگە ابىرويمەن بەينەلەپ, ۆەنگريانىڭ, پولشانىڭ, فرانتسيانىڭ, امەريكانىڭ, يسپانيانىڭ, قىتايدىڭ, تايۆاننىڭ مۋزىكاسۇيەر تىڭدارماندارىن ونەرىمەن ءتانتى ەتىپ, تاڭداي قاقتىرعان ازامات. كومپوزيتورلار ءادىل بەستىباەۆ, بالنۇر قىدىربەك, ەربولات ءاندوسوۆ فلەيتاشىنىڭ كەرەمەت ورىنداۋشىلىق مۇمكىندىگىن, تالعامى مەن ەرەكشەلىگىن ەسكەرە وتىرىپ, قايروللا جۇماكەنوۆكە ارنايى مۋزىكا جازعان.
قايروللا اكراماشۇلى جۇماكەنوۆ باستاپقى مۋزىكالىق ءبىلىمىن احمەت جۇبانوۆ اتىنداعى رەسپۋبليكالىق مۋزىكا مەكتەبىندە الىپ, ودان ءارى قۇرمانعازى اتىنداعى ۇلتتىق كونسەرۆاتورياسىن جالعاستىردى. وسى وقۋ ورداسىندا 1978-1998 جىلدارى وقىتۋشى, كافەدرا مەڭگەرۋشىسى قىزمەتىن اتقاردى. وسى ارالىقتا ماسكەۋ قالاسىندا پ.چايكوۆسكي اتىنداعى مەملەكەتتىك كونسەرۆاتوريانىڭ اسپيرانتۋراسىن ويداعىداي ءتامامدادى. 1998-2008 جج. قازاق ۇلتتىق مۋزىكا اكادەمياسىنىڭ پروفەسسورى, ۇرلەمەلى جانە سوقپالى اسپاپتار فاكۋلتەتىنىڭ دەكانى قىزمەتىن اتقاردى. ول – استانا قالاسىندا مەملەكەتتىك اكادەميالىق فيلارمونيانىڭ ۇرلەمەلى اسپاپتار وركەسترى مەن فلەيتاشىلار ءانسامبلىنىڭ نەگىزىن قالاۋشى. بۇل انسامبل قازىر مۋزىكانتتىڭ قۇرمەتىنە ارنايى ق.ءا.جۇماكەنوۆتىڭ اتىمەن اتالادى.
قايروللا اكراماشۇلى جاقسى تالىمگەر-پەداگوگ تا بولعان ەدى. بىلىكتى ۇستاز شاكىرتتەرىنىڭ ماماندىق دەڭگەيىن كوتەرۋمەن قاتار ولاردىڭ جەكە تاربيەسى مەن تارتىبىنە دە ەرەكشە ءمان بەرىپ وتىراتىن. «ءبىلىم مەن تاربيە قول ۇستاسىپ قاتار جۇرگەندە عانا شاكىرتتەرىمىز سانالى, مادەنيەتتى ازامات بولا الادى, سوندىقتان دا تاربيە جۇمىسىنا زور ءمان بەرۋ كەرەك» دەپ وقۋشىلارىن ءارتۇرلى قوعامدىق ءىس-شارالارعا – پاتريوتتىق تاربيە, الەۋمەتتىك جوبا, ۆولونتەرلىك جۇمىس, سپورت ەستافەتالارىنا ۇنەمى قاتىستىرىپ تۇراتىن. سونىمەن قاتار ماماندىقتارىنا قاتىستى بايقاۋلارعا دا بەلسەندى دايىندىقتار وتكىزىپ, كوپتەگەن حالىقارالىق, رەسپۋبليكالىق, وڭىرلىك بايقاۋلاردىڭ جەڭىمپازدارىن دايىنداعان. قازىرگى كەزدە ولار دا ۇستازىنىڭ جولىن قۋىپ, بىرەۋلەرى پەداگوگ بولسا, ەكىنشىلەرى مۋزىكانت بولىپ ابىرويلى ەڭبەگىمەن كەڭىنەن تانىلعان ماماندار: ايجان مىرزاليەۆا – ك.بايسەيىتوۆا اتىنداعى دارىندى بالالار مەكتەبىنىڭ وقىتۋشىسى, ەركىن اقباەۆ – سيمفونيالىق جانە ۇرلەمەلى وركەسترلەر ءارتىسى, نينا گريگورەۆا – قازاق ۇلتتىق ونەر ۋنيۆەرسيتەتى پاندىك-تسيكلدىك كوميسسيانىڭ مەڭگەرۋشىسى, وسى ۋنيۆەرسيتەتتىڭ تۇلەكتەرى فاريدا شولاقوۆا مەن الەكساندر تاراسكين دە تانىمال مۋزىكانتتار قاتارىن تولىقتىردى.
شەبەر ۇستازدىڭ قاجىرلى ەڭبەگى ەلەنىپ, لايىقتى باعاسىن الدى. قازاقستان رەسپۋبليكاسىنىڭ مەملەكەتتىك ناگراداسى – «ەرەن ەڭبەگى ءۇشىن» مەدالىمەن, قازاق ۇلتتىق مۋزىكا اكادەمياسىنىڭ (قازىرگى قازاق ۇلتتىق ونەر ۋنيۆەرسيتەتى) 5 جىلدىق مەرەيتويلىق مەدالىمەن, ۇكىمەت پەن ۋنيۆەرسيتەتتىڭ قۇرمەت گراموتاسىمەن, العىس حاتتارىمەن, ديپلومدارىمەن, ءبىراز شەتەلدىك ناگرادالارمەن ماراپاتتالعان.
قايروللا جۇماكەنوۆتىڭ ارتىندا ونەرىن جالعاستىراتىن شاكىرتتەرى, اتى-تەگىن ماڭگىلىك ساقتايتىن سانالى ۇرپاعى – بالا-نەمەرەلەرى, تۋعان-تۋىستارى قالدى. ۇلى ەركەبۇلان – قازاق ۇلتتىق مۋزىكا اكادەمياسىنىڭ ماقتاۋلى تۇلەكتەرىنىڭ ءبىرى, ماماندىعى وركەستر ءارتىسى, جەكە ورىنداۋشى, پەداگوگ. نەگىزگى بىلىمىنە قوسا, قر پرەزيدەنتىنىڭ جانىنداعى مەملەكەتتىك باسقارۋ اكادەمياسىن ويداعىداي اياقتاپ, مەملەكەتتىك جانە جەرگىلىكتى باسقارۋ ماگيسترى عىلىمي اتاعىن العان بىلىكتى ازامات. ءار ۋاقىتتا لاۋازىمدى قىزمەتتەر اتقارىپ, ماماندىعىن شىڭداعان: پرەزيدەنت وركەسترىنىڭ شىعارماشىل توبىنىڭ كوركەمدىك جەتەكشىسى, مادەنيەت جانە اقپارات مينيسترلىگى مادەنيەت كوميتەتى ونەر باسقارماسىنىڭ باستىعى مىندەتىن اتقاردى, قر قورعانىس مينيسترلىگى باس ءانسامبلى توبىنىڭ كوركەمدىك جەتەكشىسى بولدى, تاعى دا باسقا قىزمەتتەر اتقاردى. استانانىڭ تورىندە شالقىپ جۇرسە دە, ەركەبۇلان اتا-بابا قونىسىن, بالا كەزىندە اكەسىمەن ەرىپ باراتىن تورتكول اۋىلىن, كىندىك قانى تامعان تۋعان قالاسى قاراعاندىنى ەسىنە ءجيى-ءجيى الا بەردى. لاۋازىمدى قىزمەتتەردە جيناقتاعان تاجىريبەسى مەن ءبىلىمىن ءوزىنىڭ اتا-باباسى قونىستانعان كيەلى جەزقازعان – قاراعاندى ولكەسىندە ءىس جۇزىندە اسىرۋعا نيەتتەنىپ, ەلىنە قونىس اۋدارادى. قاراعاندىنىڭ وبلىستىق بەينەلەۋ ونەرى مۇراجايىنىڭ ديرەكتورى, جەزقازعانداعى قازاق مۋزىكالىق-درامالىق تەاترىنىڭ جەتەكشىسى بولادى. قازىرگى ۋاقىتتا قازۇوۋ تۇلەگى ەركەبۇلان قايروللاۇلى جۇماكەنوۆ – قاراعاندى وبلىسى قۇجاتتار, مۇراعاتتار جانە مادەنيەت باسقارماسىنىڭ جەتەكشىسى قىزمەتىن ابىرويمەن اتقارىپ جۇرگەن ىسكەر ازامات.
قايروللا جۇماكەنوۆ ارتىنا جارىق ءىز قالدىرعان, ونەگەلى ونەرىن جالعاستىراتىن شاكىرت تاربيەلەگەن, ومىرگە اتىن وشىرمەيتىن سانالى, دارىندى ۇرپاق اكەلگەن, دوس-جارانىنا سىيلى, حالقىنا قۇرمەتتى بولعان, جانى جايساڭ, جايدارى مىنەزدى ەرەكشە تۇلعا ەدى. جارقىن بەينەسى جادىمىزدا ماڭگىلىك ساقتالادى.
گۇلناحيا ءبىرجانوۆا,
قازاق ۇلتتىق ونەر
ۋنيۆەرسيتەتىنىڭ وقىتۋشىسى
