بۇرىن جەڭىل-جەلپى وتا جاساعاندا دا پورتالعا كەزەككە تۇرىپ, اۋرۋحانالارداعى ستاتسيونارلاردا بىرنەشە كۇن جاتىپ ەمدەلۋگە تۋرا كەلەتىن. سونىڭ ورنىنا ەمحانالاردا اشىلعان امبۋلاتوريالىق حيرۋرگيا ورتالىقتارى – زاماناۋي مەديتسينانىڭ بولاشاعى زور باعىتىنىڭ ءبىرى. ونى مەديتسينا تىلىندە «ءبىر كۇننىڭ حيرۋرگياسى» دەپ تە اتايدى. شەتەلدە اۋەلدەن دامىپ كەتكەن مۇنداي ورتالىقتار قازاقستاندا 2000 جىلدان بەرى اشىلا باستادى. قازىر ولار استاناداعى 10 ەمحانادا بار.
اتاپ ايتقاندا, №5, 6, 8, 9, 10, 12 قالالىق ەمحانالار مەن «Astana Clinic», «City», «سالاۋاتتى استانا» جەكە ەمحانالارى جانە «ەكسترا كومفورت» ورتوپەديا ورتالىعىندا اشىلعان. وتانى ادام دەنەسىنە كوپ پىشاق تيگىزبەي جاسايتىن, ياعني از جاراقات سالاتىن جانە وتادان كەيىن جىلدام قالىپقا كەلەتىن بۇل جەڭىل حيرۋرگيالى تەراپيا قىزمەتىنىڭ بىرنەشە ءتۇرى كورسەتىلەدى.
– امبۋلاتوريالىق حيرۋرگيا ستاتسيونارلارعا بالاما دەگەننەن گورى, ولارعا قوسىمشا تولىقتىرىپ تۇراتىن قىزمەت دەسە ءجون بولادى. ءبىزدىڭ №10 قالالىق ەمحانانىڭ ءوزى 2015 جىلى اشىلعالى بەرى امبۋلاتوريالىق ورتالىق تا بىرگە قۇرىلىپ, جۇمىس ىستەپ كەلەدى. ورتالىقتا حيرۋرگ, ۋرولوگ, ونكولوگ, گينەكولوگ, وفتالمولوگ, انەستەزيولوگ-رەانيماتولوگ, پروكتولوگ ماماندارمەن بىرگە, مەدبيكەلەردى قوسقاندا, جالپى 13 مەديتسينا قىزمەتكەرى ەڭبەك ەتەدى. حيرۋرگيادا تەرىدەگى, تەرى استى ماي قاباتتارىندا, جۇمساق تىندە ورنالاسقان قاتەرسىز ىسىكتەردى الىپ تاستاۋ وتالارى جاسالادى. ال ۋرولوگتار ەم-دياگنوستيكا ماقساتىندا تسيستوسكوپيامەن جانە قۋىقتىڭ شىرىشتى قاباتىن تەكسەرۋ ءۇشىن نەسەپاعارعا قويىلعان ستەنت كاتەتەرلەردى الىپ تاستاۋمەن اينالىسادى. سونىمەن قاتار ۆاريكوتسەلە, گيدروتسەلە وتالارىن جاسايدى. ونكولوگتار دەنەدەگى ءتۇرلى ىسىكتى, وفتالمولوگتار كوزدىڭ اينالاسىندا ورنالاسقان وسىندىلەردى الىپ تاستايدى جانە ەمدىك ماقساتتا كوزدىڭ استىڭعى قاباتىنا رەتروبۋلبارلى ءدارى ەنگىزەدى. گينەكولوگتار جاتىر موينى مەن جاتىردىڭ شىرىشتى قاباتىنىڭ پوليپتەرىن الىپ تاستاپ, گيستەروسكوپيا جاسايدى. پروكتولوگتار گەموررويلاردى الىپ تاستاۋ, شىرىشتى قاباتىن تىگىپ بايلاۋ وتاسىن جۇرگىزەدى, – دەيدى №10 ەمحاناداعى امبۋلاتوريا-حيرۋرگيا ورتالىعىنىڭ ءبولىم مەڭگەرۋشىسى ابزال زەيدۋللا.
وسىنداي اسا كۇردەلى ەمەس وتالاردىڭ ءبارى بۇرىن اۋرۋحانالاردا جاسالاتىن بولعان. ادامدار پورتالداعى كەزەگىن كۇتىپ, ودان وتا جاساۋ ءۇشىن ءۇش كۇندەي ستاتسيوناردا جاتاتىن. قازىر امبۋلاتوريالىق حيرۋرگيا ورتالىقتارى وسى قىزمەتتى جىلدامداتتى. وتا ءمامس جۇيەسىندە جارنا تولەيتىندەر ءۇشىن تەگىن جاسالادى
وتادان كەيىن ناۋقاستار كەم دەگەندە 20 مينۋت, ءارى كەتسە 1-1,5 ساعات پالاتادا دارىگەرلەر باقىلاۋىندا بولادى, ءبارى دۇرىس بولسا, ۇيىنە قايتارىلادى. وڭالىپ كەتكەنگە دەيىن ۇنەمى ماماندار قاداعالاۋىندا جۇرەدى. اتالعان ورتالىق ەمحانانىڭ بەسىنشى قاباتىندا ورنالاسقان. مۇندا ناۋقاستار وتادان كەيىن دەمالاتىن پالاتالار, وتا جاساۋ بولمەلەرىنىڭ ءبارى سانيتارلىق نورمالارعا ساي جابدىقتالعان.
– وسىنداي اسا كۇردەلى ەمەس وتالاردىڭ ءبارى بۇرىن اۋرۋحانالاردا جاسالاتىن بولعان. ادامدار پورتالداعى كەزەگىن كۇتىپ, ودان وتا جاساۋ ءۇشىن ءۇش كۇندەي ستاتسيوناردا جاتاتىن. قازىر امبۋلاتوريالىق حيرۋرگيا ورتالىقتارى وسى قىزمەتتى جىلدامداتتى. وتا ءمامس جۇيەسىندە جارنا تولەيتىندەر ءۇشىن تەگىن جاسالادى. اتالعان جۇيەدە جوق ازاماتتارعا سول ارقىلى قىزمەت پايدالانۋدىڭ تيىمدىلىگىن ايتىپ تۇسىندىرەمىز, – دەيدى دارىگەر.
16 جىلدىق تاجىريبەسى بار دارىگەر, بىلتىر عانا «دەنساۋلىق سالاسىنىڭ ۇزدىگى» ماراپاتىن العان ابزال زەيدۋللا اتالعان ورتالىقتى 2022 جىلدان بەرى باسقارادى. قاراماعىنداعى دارىگەرلەردىڭ ەڭ ۇلكەنىنىڭ ەڭبەك ءوتىلى 30 جىلدان اسسا, كوبىنىڭ 15-20 جىلدىق تاجىريبەسى بار. ەڭبەك جولىن باستاعانىنا 3-4 جىل بولعان ءبىر-ەكى عانا مامان جۇمىس ىستەيدى. وسى قىزمەتكەرلەردىڭ كۇشىمەن ورتالىقتا 18 جاستان جوعارى قالا تۇرعىندارىنا 2021 جىلى بارلىعى 470 وتا جاسالسا, 2022 جىلى 696, ال بىلتىر 1670 وتا جاسالعان. وسىلايشا جىل سايىن وتا سانىنىڭ كوبەيۋى ورتالىق قىزمەتى مەن ماماندارىنا دەگەن سەنىمنىڭ ارتقانىن دا بىلدىرەدى.
– ءبىزدىڭ دارىگەرلەر ءبىر جاعى ەمحانادا دا قابىلداۋ بولىمىندە قىزمەت اتقارادى. سول كەزدە وزدەرىنە قارالعان ادامدار اراسىنان وتا جاساۋ قاجەتتىلىگى انىقتالعانداردى ورتالىققا اكەلىپ, ءتيىستى ەمىن جالعاستىرادى. نەگىزى, بۇل وتالار اقىلى تۇردە جاسالار بولسا, شامامەن 120 مىڭ تەڭگەدەي قارجىنى قاجەت ەتەدى. ونىڭ ىشىندە ناۋقاسقا كونسۋلتاتسيا بەرۋ, وتادان كەيىنگى باقىلاۋ, جارالارىن تاڭۋ قىزمەتتەرى دە بار. سونىڭ ءبارى مىندەتتى الەۋمەتتىك مەديتسينالىق ساقتاندىرۋ جۇيەسى ارقىلى تەگىن كورسەتىلۋدە, – دەيدى ءبولىم مەڭگەرۋشىسى.
ورتالىق قىزمەتىنە كوبىنە 20-50 جاستاعى ەلوردالىق تۇرعىندار ءجيى جۇگىنەدى. سونىڭ ىشىندە وفتالمولوگيا قىزمەتىن 50-دەن اسقاندار كوپ پايدالانادى. اسىرەسە سوڭعى ءبىر جىلدا وسى قىزمەتتى پايدالاناتىندار قاتارى ارتا تۇسكەن. ودان كەيىنگى ورىندا حيرۋرگتار مەن ونكولوگتاردىڭ ىسىكتى الىپ تاستاۋ قىزمەتىنە كەلەتىندەر تۇر. ءۇشىنشى كەزەكتە گينەكولوگيا وتالارى ءجيى كورسەتىلەدى. سودان سوڭ قۋىققا ەم-دياگنوستيكا باعىتىندا وتا جاساتۋشىلار سانى باسىم. ماماندار قاتەرلى ەمەس ىسىكتەر قاتەرلى تۇرىنە ءوتىپ, اسقىنىپ كەتپەي تۇرعاندا دەرتتى دەر كەزىندە انىقتاپ, حيرۋرگيا كومەگىمەن اۋىر جاعدايدىڭ الدىن الۋ قاجەت ەكەنىن ايتادى.
