استانا قالالىق اسسامبلەياسى جانىنداعى انالار كەڭەسى – وسكەلەڭ ۇرپاققا ونەگە كورسەتىپ, ومىردەن وگەيلىك كورگەندەرگە قامقورلىق تانىتىپ جۇرگەن ۇيىمشىل ۇجىم.
«دۋسلىق» تاتار ەتنومادەني بىرلەستىگىنىڭ ءتورايىمى ياننات نيزامۋتدينوۆا جەتەكشىلىك ەتەتىن انالار كەڭەسى قۇرامىنا ومىرلىك تاجىريبەسى زور, ءبىر وتباسىن سۇتتەي ۇيىتىپ وتىرعان ايەلدەردىڭ باسىن بىرىكتىرەدى. ولار – ءارتۇرلى ۇلت وكىلدەرىنەن. زەينەت جاسىنا جەتىپ, قولدارى بوساعان نازىك جاندىلار قوعامدىق جۇمىسقا بەلسەنە ارالاسىپ, كورگەن-بىلگەندەرىمەن ءبولىسىپ ءجۇر. ۇيىمنىڭ استانانىڭ ءۇش اۋدانىندا كىشىگىرىم بولىمشەلەرى بار. «اقىلشىم-انام», «اق ورامال», «دۇرىس تاماقتانۋ», زاڭگەرلىك كومەك», «الپىس – تال ءتۇس» اتتى كلۋبتارى جۇمىس ىستەيدى.
ياننات اپايىمىزدىڭ ايتۋىنشا, انالار كەڭەسى و باستا قۇرىلاردا باسقا ۇكىمەتتىك ەمەس ۇيىمداردىڭ قىزمەتىن قايتالاماي, وزدەرىنىڭ قولىنان كەلەتىن بىرنەشە باعىتتى تاڭداپ الىپتى. مىسالى, انالار كەڭەسى استاناداعى داعدارىس ورتالىعىمەن, SOS بالالار اۋىلىمەن, الەكسەەۆكا ەلدى مەكەنىندەگى پسيحونەۆرولوگيالىق ديسپانسەرمەن تىعىز قارىم-قاتىناستا جۇمىس ىستەيدى.
– ادەتتە, ءبىز اتالمىش مەكەمەلەرگە ءۇش ايدا ءبىر-ەكى مارتە بارىپ تۇرامىز. بارعان سايىن سىيلىقتار, تاتتىلەر, كيىم-كەشەك اپارۋعا تىرىسامىز. مازالاعان سۇراقتارىنا قاتىستى ومىردەن تۇيگەنىمىزبەن بولىسەمىز. اسىرەسە, ءالى وڭ-سولىن تانىپ ۇلگەرمەگەن بالالار ۇيىندەگى جەتكىنشەكتەر انا اقىلىنا ءزارۋ. تاعدىردان تەپەرىش تارتقان بالالاردى كورىپ كوزىمىزگە مولتىلدەپ جاس كەلەدى, – دەيدى ياننات نيزامۋتدينوۆا. جالپى, انالار كەڭەسى مۇشەلەرى مەكتەپ, كوللەدج ستۋدەنتتەرىمەن كەزدەسۋلەردە ءوز ومىرلىك تاجىريبەسىمەن ءبولىسىپ, ار-وجدان تاربيەسى, وتباسىلىق-تۇرمىستىق, زاڭ ماسەلەلەرىنە قاتىستى ءتۇرلى سەمينار-ترەنينگتەردى ءجيى وتكىزىپ تۇرادى. اسىرەسە, انالار كەڭەسى قۇرامىنداعى «زاڭدىق كەڭەس» قىزمەتىنە سۇرانىس ايرىقشا. وعان استانا قالالىق ادۆوكاتتار كوللەگياسىنان ارنايى بولىنگەن ادۆوكات تەگىن كەڭەس بەرەدى.
قارتتاردىڭ كوڭىلىن ءجۇر اۋلاپ…
سونىمەن قاتار, انالار كەڭەسىنىڭ مۇشەلەرى قارت ادامداردىڭ زەينەت جاسىن قىزىقتى, ءماندى وتكىزۋىنە ءجيى كومەكتەسىپ تۇرادى. ولار ۇيدە وتىرىپ قالماسىن دەپ ۇلتتىق مەرەكەلەرگە, كونتسەرتتەرگە ءجيى الىپ بارادى نەمەسە سالت-ءداستۇر, ۇلگى-ونەگەگە قاتىستى جاستارمەن كەزدەسۋلەرگە شاقىرادى. مىسالى, «ەكسپو-2017» كەزىندە تىل ەڭبەككەرلەرىنە كورمە قالاشىعىنا تەگىن كىرۋ قۇقىعى بەرىلدى. بىراق جاسى كەلىپ قالعان جاندار ونداي كىسى قاراسى مول جەرگە وزدىگىنەن قالاي بارا قويسىن. وسىنى ەسكەرگەن انالار كەڭەسى سارىارقا اۋداندىق بولىمشەسىنىڭ بەلسەندىلەرى دەرەۋ اۋدانداعى تىل ەڭبەككەرلەرىن ءتورت توپقا ءبولىپ, كورمە ىشىندە ارنايى كولىكپەن وزدەرى الىپ ءجۇردى. تەك قاريالار عانا ەمەس, حالىقتىڭ الەۋمەتتىك جاعىنان ءالسىز ساناتىنىڭ قاي-قايسىسى دا انالار كەڭەسى مۇشەلەرىنىڭ قامقورلىعىنان تىس قالعان ەمەس. ومىردەن وگەيلىك كورىپ, ەڭسەلەرى ەزىلىپ جۇرگەن جانداردى ءبىر ءسات سەرگىپ قالۋ ءۇشىن ءتۇرلى مادەني-كوپشىلىك شارالارعا ۇيىمداستىرىپ العىسقا بولەنىپ ءجۇر.
قايىرىمدىلىققا ايرىقشا ءمان بەرەدى
«قايىرىمدىلىقپەن اينالىساتىن بيزنەسمەندەر بار. ولار وزدەرىنىڭ مەكەمەلەرىنىڭ شاما-شارقىنا قاراي جىلىنا بىرنەشە مارتە قايىرىمدىلىق جاساپ تۇرادى. ال ءبىزدىڭ جۇمىسىمىز وسىنداي ىسكەر جانداردىڭ نازارىن الدەبىر قيىندىققا تاپ بولعان جاندارعا (اسىرەسە اۋىر سىرقاتقا شالدىققاندارعا) اۋدارتىپ, ەكى ورتادا دانەكەر بولۋ» دەيدى ياننات نيزامۋتدينوۆا اڭگىمەنى ارىدەن باستاپ. ماسەلەن, وسىدان بىرنەشە جىل بۇرىن ياننات نيزامۋتدينقىزىنا دياس دەگەن نەمەرەسىنىڭ ەم-شاراسىنا كومەك سۇراپ ءبىر كەمپىر كەلدى. بالانىڭ اناسى 1- توپتاعى مۇگەدەك, ال اجەسى زەينەتكەر ەدى. دياستىڭ ءتۋابىتتى ەكى قولىندا دا ساۋساعى وسپەي قالعان. باسقاشا ايتساق, الدەبىر سۇيەك تومپايىپ شىعىپ كەلە جاتىپ توقتاپ قالعان. سونىمەن قاتار, قابىرعاسى مايىسقان. سۇيەك وسكەن سايىن وكپەسىن قىسىپ تاستاۋى ابدەن مۇمكىن. بالا وزدىگىنەن قيمىل-قارەكەت جاساي المايدى. ياننات نيزامۋتدينوۆا بالاعا قاتتى كومەكتەسكىسى كەلدى. وكىنىشكە قاراي, ءبىزدىڭ مەديتسينا مۇنداي سيرەك كەزدەسەتىن سىرقاتتى ەمدەۋگە قاۋقارسىز ەدى. «دوڭگەلەك ۇستەلدەردىڭ» بىرىندە امەريكادان بىرنەشە حيرۋرگ مامان كەلىپ, بالالالارعا تەگىن وتا جاسايتىنىن قۇلاعى شالىپ قالادى. دەرەۋ ىسكە كىرىسكەننىڭ ارقاسىندا دياستىڭ قابىرعا سۇيەگىنە وتا جاسالىپ, قازىر قاۋىپتىڭ بەتى قايتارىلدى. «كوپ ۇزاماي قازاقستاندىق دارىگەرلەر دياستىڭ قولىنا وتا جاساپ, پروتەزدەۋگە دايىندايدى. وتباسىمەن بىرگە دياستىڭ اماندىعىن تىلەپ وتىرمىز» دەيدى ياننات حانىم.
سول سەكىلدى وتكەن جىلى قاراشا ايىندا قىزىلوردا وبلىسىنىڭ ءبىر اۋىلىنداعى ءۇي تىپ-تيپىل ورتەنىپ كەتتى. اناسى قايتىس بولىپ, ەكى بالا شيەتتەي جەتىم قالدى. سول كەزدە انالار كەڭەسىنىڭ بەلسەندى مۇشەسى, جاسى سەكسەنگە تاقاعان ناديا ءابدىراحمانوۆا ۇيدە بايىز تاۋىپ وتىرا الماي, استانالىق كاسىپكەرلەردىڭ كومەگىمەن ءبىراز كومەك جونەلتۋدى ۇيىمداستىردى. ءتىپتى جينالعان ازىق-تۇلىك, كەرەك-جاراقتى پوشتا بولىمشەسىنە دەيىن ءوزى اپارىپ جونەلتكەن.
جالپىلاي العاندا, انالار كەڭەسىنىڭ بيىلدىڭ وزىندە ۇيىمداستىرعان قايىرىمدىلىق شارالارى 500-گە تارتا جاندى قامتىپتى. ماسەلەن, تۇرمىسى ناشار, كوپ بالالارى وتباسىلارعا, مۇگەدەكتەرگە 1 460 000 تەڭگە, تابيعي اپات سالدارىنان زارداپ شەككەندەرگە 1 350 000 تەڭگە, ەمدەۋ شارالارىنا دەمەۋشىلىك رەتىندە 736 000 تەڭگە كومەك كورسەتىلگەن. ونىڭ ءبىر پاراسىن كەڭەس مۇشەلەرى قالاداعى كاسىپكەرلەردەن جينايدى, ەكىنشى جاعىنان وزدەرى دە قاراپ وتىرماي ءتۇرلى قايىرىمدىلىق جارمەڭكەلەرىندە تاعام ساتىپ قاراجات باسىن قۇرايدى.
انالار كەڭەسى, سونداي-اق, قىز-كەلىنشەكتەرگە, بويجەتكەندەرگە ۇلتتىق سالت-ءداستۇر مەن ادەت-عۇرىپتاردى ۇيرەتەدى. ماسەلەن, «اق ورامال» كلۋبى ۇلتتىق باس كيىم ۇلگىلەرىنىڭ ءسانى مەن سالتاناتىن تۇسىندىرەتىن شاعىن بەينەلەر دايىندايدى, قىز-كەلىنشەكتەرگە اق ورامالعا كەستە تىگۋ, ورنەك سالۋدى ۇيرەتەدى. ال «اناشىم – اقىلشىم», «دۇرىس تاماقتانۋ» سياقتى كلۋبى اياسىندا ۇرپاقتار ساباقتاستىعى مەن سالاۋاتتى ءومىر سالتىن ناسيحاتتايدى
