الماتى اۋدانىنداعى بالقانتاۋ, 171 مەكەنجايىندا كۇتپەگەن جاعداي تىركەلدى. سالىنىپ جاتقان كوتتەدجدىڭ ەكى قاباتىن جالعاپ تۇرعان ەدەن جابىنى وپىرىلىپ قۇلاپ تۇسكەن.
ناتيجەسىندە ءۇش جۇمىسشى قيراندى استىندا قالىپ قويدى. قۇتقارۋشىلار ءۇيىندى استىنان 1970 جىلعى جانە 1983 جىلعى ەكى ازاماتتى شىعارىپ العان. ارتىنشا قۇتقارۋ قىزمەتى 18 جاستاعى ءۇشىنشى قۇرىلىسشىنى قۇتقاردى. وقىس وقيعادان زارداپ شەككەندەردىڭ دەنساۋلىعىنا قاتىستى استانا قالالىق قوعامدىق دەنساۋلىق ساقتاۋ باسقارماسى مالىمدەمە جاسادى.
– 1 تامىز كۇنى ساعات 19:52-دە جەدەل جاردەم بەكەتىنە بالقانتاۋ كوشەسىندە سالىنىپ جاتقان ءۇي قۇرىلىسىنىڭ قۇلاۋىنان زارداپ شەككەندەر بار دەگەن قوڭىراۋ ءتۇستى. وقيعا ورنىنا شۇعىل جەتكەن جەدەل جاردەم جاراقات العان ءۇش ادامدى №1 قالالىق اۋرۋحاناعا جەتكىزدى. قازىرگى ۋاقىتتا زارداپ شەككەندەردىڭ دەنساۋلىعى ورتاشا, تۇراقتى دەپ ايتۋعا بولادى. مەديتسينالىق كومەك تولىقتاي كورسەتىلدى. زارداپ شەككەندەردىڭ ءبارى اۋرۋحانانىڭ بەيىندى بولىمىندە ەم قابىلداپ جاتىر, – دەدى استانا قالالىق قوعامدىق دەنساۋلىق ساقتاۋ باسقارماسىنىڭ ءباسپاسوز حاتشىسى ايگەرىم ارداق.
قۇرىلىس الاڭىنداعى اپاتتىڭ سەبەبى ازىرگە بەلگىسىز. ال جاراقات العانداردىڭ ءبارى قازاقستان ازاماتتارى ەكەنى انىقتالدى. قالالىق ىشكى ىستەر دەپارتامەنتىنىڭ حابارلاۋىنشا, قازىر وسى وقيعاعا بايلانىستى قىلمىستىق ءىس قوزعالىپ, سوتقا دەيىنگى تەكسەرىس جۇرگىزىلىپ جاتىر. ال زارداپ شەككەندەردىڭ كەلىسىمشارتسىز جۇمىس ىستەگەنى انىقتالىپ وتىر.
