ەلوردادا Astana IT University اشىلدى. جاڭا ءبىلىم ورداسى EXPO اۋماعىندا ورنالاسقان.
ستۋدەنتتەر مۇندا كريپتوگرافيا, روبوتوتەحنيكا, Big Data, جاساندى ينتەللەكت, ساندىق كريميناليستيكا, باعدارلامالاۋ سەكىلدى سالالاردى ۇيرەنەدى. بيىلعى وقۋ جىلىندا ۋنيۆەرسيتەت قابىرعاسىندا 6 باعىت بويىنشا 613 ستۋدەنت ءبىلىم الادى. جالپى سانى 579 گرانت بولىنگەن.
ۋنيۆەرسيتەتتىڭ اشىلۋ سالتاناتى كەزىندە ءسوز سويلەگەن قر پرەمەر-ءمينيسترىنىڭ ورىنباسارى بەردىبەك ساپارباەۆ پەن قالا اكىمى التاي كولگىنوۆ ستۋدەنتتەرگە جۇرەكجاردى تىلەكتەرىن جەتكىزىپ, وقۋ جىلىنا ساتتىلىك تىلەدى.
عيماراتتىڭ قۇرىلىسى 10 ايعا سوزىلعان. وقۋ ورنى اشىق كەڭسەلەرگە ۇقسايدى. مۇندا بارلىعى 680 بولمە, ونىڭ ىشىندە 140 اۋديتوريا بار. سونداي-اق جاتتىعۋ جانە سپورت زالدارى, كوۆوركينگ-ايماق, تاقىرىپتىق كابينەتتەر مەن كىتاپحانا قامتىلعان. ءتورت جىلدىق باعدارلامانى ستۋدەنتتەر 3 جىل ىشىندە مەڭگەرەدى.
