مەملەكەت باسشىسى ق.توقاەۆ 29 جاسقا دەيىنگى ازاماتتارعا 16 جەلتوقساننان باستاپ نۇر-سۇلتان, الماتى جانە شىمكەنت قالالارىندا پاتەر سالۋدى تاپسىرعان بولاتىن. وسى تاپسىرماعا وراي جۇمىس ىستەپ جۇرگەن جاستارعا ساتىپ الۋ قۇقىعىنسىز جالعا باسپانا بەرىلەتىن بولدى.
ول تۋرالى ورتالىق كوممۋنيكاتسيالار قىزمەتىندە اقپارات جانە قوعامدىق دامۋ مينيسترلىگى (اقدم) جاستار جانە وتباسى ىستەرى كوميتەتىنىڭ توراعاسى ماديار قوجاحمەت ءمالىم ەتتى.
مەملەكەت باسشىسى جاستارعا ارناپ نۇر-سۇلتان, الماتى, شىمكەنت قالالارىنىڭ ارقايسىندا جىل سايىن كەمىندە 1000 پاتەردەن سالۋدى مىندەتتەدى. ەرەجە بويىنشا جالدامالى پاتەر يەلەنۋگە نيەت ەتكەندەر اتالعان قالالاردا كەمى 2 جىل تۇرۋى ءتيىس. جانە جىلجىمايتىن مۇلكى بولماۋى كەرەك. سونداي-اق ۇمىتكەرلەردىڭ باستاپقى جارنانى جيناۋعا قىزىعۋشىلىعى ويانۋى ءۇشىن بانكتەردە جەكە ەسەپشوتى بولۋى شارت.
– جوبانىڭ ماقساتى – جاستاردى باسپانالى بولۋعا ىنتالاندىرۋ, قولداۋ كورسەتۋ. جالدامالى پاتەر العىسى كەلەتىن ازاماتتىڭ قىزمەتتەگى جەتىستىكتەرىن راستايتىن قۇجاتتارى ۇسىنىلسا قوسىمشا جەڭىلدىكتەر بەرىلەدى. ال وتباسىن قۇرىپ, بالاسى بولسا, ارنايى باعالار قاراستىرىلعان, – دەدى اقپارات جانە قوعامدىق دامۋ مينيسترلىگى جاستار جانە وتباسى ىستەرى كوميتەتىنىڭ توراعاسى ماديار قوجاحمەت ورتالىق كوممۋنيكاتسيالار قىزمەتىندە وتكەن جيىندا.
ستاتيستيكاعا سۇيەنسەك, قازىرگى ۋاقىتتا رەسپۋبليكامىزدا 14-29 جاس ارالىعىندا 4 ميلليونعا جۋىق جاس بار. ونىڭ 245 مىڭى – نۇر-سۇلتان قالاسىندا, 700 مىڭى – الماتى قالاسىندا, 260 مىڭى شىمكەنت قالاسىندا تۇرادى. وسى ءۇش قالادا ءۇش جىلدا 9 مىڭ پاتەر تاپسىرىلادى دەپ جوسپارلانىپ وتىر. پاتەرلەر 5 جىلعا جالعا بەرىلەدى. ولاردىڭ جالعا بەرۋ اقىسى ايىنا 10-12 مىڭ تەڭگەنى قۇرايدى. بۇل ەسەپكە كوممۋنالدىق تولەمدەر كىرمەيدى. باعدارلامانى جۇزەگە اسىرۋ ءۇشىن بيۋدجەتتەن 21 ميلليارد تەڭگە ءبولىندى.
– قازىرگى ۋاقىتتا وسى پاتەرلەردىڭ كونكۋرستىق قۇجاتتارى دايىندالىپ جاتىر. جوسپار بويىنشا قاراشا ايىنان باستاپ قۇجاتتار قابىلدانادى. ول ءۇشىن ارنايى ءبىر جەرگە بارىپ كەزەككە تۇرۋدىڭ قاجەتى جوق. قۇجاتتاردى قابىلداۋ Smart Astana پلاتفورماسىندا تولىعىمەن ەلەكتروندى تۇردە ۇيىمداستىرىلادى, – دەدى نۇر-سۇلتان قالاسى اكىمدىگىنىڭ قوعامدىق دامۋ ىستەرى باسقارماسىنىڭ ءبولىم باسشىسى تالعات راحمانبەردى.
جاستارعا ارنالعان جالدامالى تۇرعىن ءۇي باعدارلاماسىنىڭ العاشقى كەزەڭى 2021 جىلعا دەيىن جۇمىس ىستەيدى. ودان كەيىن باعدارلامانى جەتىلدىرۋ جانە ونى ەلىمىزدەگى باسقا قالالاردا دا جالعاستىرۋ شارالارى جۇزەگە اسىرىلادى. ۇكىمەتتەن پاتەر جالعا بەرىلگەن مەرزىم ىشىندە جاستاردىڭ وزدەرىنىڭ جەكە باسپانالارى ءۇشىن ءتيىستى قارجىنى جيناپ الۋعا مۇمكىندىگى بار.
جالعا بەرىلەتىن ۇيلەردى ءبولۋ كەزىندە جاس وتباسىلارعا, نارىقتا نەعۇرىلىم سۇرانىسقا يە 100 ماماندىق يەلەرىنە, جاس كاسىپكەرلەرگە, بيۋدجەتتىك ۇيىمدار قىزمەتكەرلەرىنە باسىمدىق بەرىلەدى. جالدامالى باسپاناعا يە بولۋ ءۇشىن قاجەت قۇجاتتار ءتىزىمى مينيسترلىكتىڭ سايتىندا كورسەتىلگەن.
ەرەجە بويىنشا نەگىزگى تالاپتاردىڭ ءبىرى – ءوتىنىش بەرۋشىنىڭ تابىس كوزى 40 اەك-تەن تومەن بولماۋى كەرەك. بۇل – شامامەن 101 مىڭ تەڭگە. ويتكەنى ءۇي يەلەنۋشى جالدامالى پاتەردىڭ اقىسى مەن كوممۋنالدىق قىزمەت تولەمدەرىنەن باسقا, تابىسىنىڭ بەلگىلى ءبىر بولىگىن اي سايىن ەكىنشى دەڭگەيلى بانكتەردە دەپوزيت جيناقتاۋ ءۇشىن دە سالىپ وتىرۋى كەرەك. جوعارىداعى ەسەپكە سۇيەنسەك, وسى بەس جىل ىشىندە 1,5-2 ميلليون تەڭگە قاراجات جينالادى. وسى باستاپقى جارنا ءۇش قالانىڭ ءۇي نارىعىنداعى باعاسى 7-8 ميلليون تەڭگە بولاتىن ەكونوم ساناتتاعى باسپانالاردىڭ بىرىنە يە بولۋعا جەتكىلىكتى.
