قالالىق اكىمدىكتە «ءتىل تازالىعى – بارشاعا ورتاق ءىس» جوباسى اياسىندا ەلوردا اكىمىنىڭ ورىنباسارى ماليكا بەكتۇروۆانىڭ توراعالىعىمەن جيىن ءوتتى.
بۇل جيىندا شاھارداعى ءتىل تۋرالى زاڭنىڭ ورىندالۋى, جارناماداعى قاتەلىكتەردى تۇزەتۋ سەكىلدى ماسەلەلەر ءسوز بولدى.
تىلدەردى دامىتۋ جانە ارحيۆ ءىسى باسقارماسىنىڭ باسشىسى تىلەۋعالي قىشقاشباەۆ ەلوردادا مەملەكەتتىك ءتىلدىڭ اياسىن كەڭەيتۋ باعىتىندا اتقارىلعان جۇمىستارعا توقتالدى.
– بيىل «ءتىل تازالىعى – بارشاعا ورتاق ءىس» اتتى جوبانى باستادىق. جوبا ارقىلى تەك مەملەكەتتىك ورگانداردى عانا ەمەس قالا تۇرعىندارىن دا ءتىلدىڭ تازالىعىن ساقتاۋعا جۇمىلدىرىپ وتىرمىز. وسى رەتتە شاھارداعى رۇقساتسىز ىلىنگەن, زاڭ تالاپتارىنا قايشى كەلەتىن سىرتقى جارنامانى انىقتاۋ, زەردەلەۋ, تالداۋ ماقساتىندا بەس جۇمىس توبى قۇرىلدى. ولار ءساۋىر-مامىر ايىندا 70-كە جۋىق كوشەنى ارالاپ, شاعىن جانە ورتا بيزنەس سۋبەكتىلەرىن سىرتقى جارناماسى مەن كورنەكى اقپاراتتارىنا ساراپتاما جۇرگىزدى. اكتسيا بارىسىندا سارىارقا اۋدانىنان – 350 نىسان, الماتى اۋدانىنان – 500 نىسان, ەسىل اۋدانىنداعى 150 نىساننىڭ سىرتقى جارناماسى زاڭ تالاپتارىنا ساي كەلمەيتىندىگى انىقتالدى. سونىمەن بىرگە زاڭعا سايكەس ەمەس 400-دەن استام جارناما, كورنەكى اقپارات الىنىپ تاستالدى. جانە شاھارداعى جەكەمەنشىك بالاباقشالاردىڭ سىرتقى جارناماسى مەن كورنەكى اقپاراتتارى دا سىن كوتەرمەيدى, – دەدى باسقارما باسشىسى
جيىندا وقىلعان بايانداما مەن ايتىلعان پىكىرلەردى قورىتقان ماليكا بەكتۇروۆا اتالعان جوبانىڭ ەكىنشى كەزەڭىن باستاۋعا جانە بۇعان مەملەكەتتىك ورگاندار باسشىلارى مەن اۋدان اكىمدەرى جاۋاپكەرشىلىكپەن قاراۋدى مىندەتتەدى.
– اۋدان اكىمدەرى ءوز اۋماقتارىڭىزداعى پاتەر يەلەرى كووپەراتيۆتەرى توراعالارىمەن كەزدەسىپ, ءتىل سالاسىنداعى زاڭ نورمالارىن قاتاڭ ساقتايتىن ۋاقىت جەتكەنىن تۇسىندىرۋلەرىڭىز كەرەك. سونداي-اق جەكەمەنشىك بالاباقشالار مەن وقىتۋ ورتالىقتارىنداعى ءتىل ماسەلەسىندەگى كەمشىلىكتەردى ءبىلىم باسقارماسى, تىلدەردى دامىتۋ جانە ارحيۆ ءىسى باسقارماسىمەن بىرلەسىپ تۇزەڭىزدەر. بۇل جۇمىستى ءبىر اي ىشىندە اتقارۋدى جۇكتەيمىن. جولاۋشىلار كولىك باسقارماسىنا قاتىستى دا سىن-ەسكەرتپەلەر كوپ. الەۋمەتتىك جەلىلەر ارقىلى شاعىمدار ءجيى تۇسەدى. وسىعان بايلانىستى قوعامدىق كولىك پەن ايالدامالارداعى قاتەلىكتەر مەن زاڭسىزدىقتاردى تۇزەتۋ جۇمىستارىن شۇعىل قولعا الۋدى تاپسىرامىن, – دەدى اكىم ورىنباسارى.
