جۇرتشىلىقتى ءدۇر سىلكىندىرگەن اقتوبەدەگى لاڭكەستىك وقيعاعا قاتىستى شارالار باقىلاۋعا الىنىپ, ەلىمىزدە تەرروريستىك قاۋىپتىلىكتىڭ «سارى» دەڭگەيى قىرىق كۇنگە دەيىن جاريالاندى. وسى قارالى جاعدايعا بايلانىستى بۇگىن – جالپىۇلتتىق ازا تۇتۋ كۇنى.
5 ماۋسىم كۇنى جەرگىلىكتى ۋاقىت بويىنشا تۇسكى ساعات 14.28-دە اقتوبە قالاسىنداعى «پاللادا» قارۋ-جاراق دۇكەنىنە بەلگىسىز قىلمىستىق توپ شابۋىل جاساپ, دۇكەننىڭ ساتۋشىسى مەن كۇزەتشىسىن ولتىرگەن. وقيعا ورنىنا دەرەۋ جەتكەن «جەدەل كۇزەت» جشس كۇزەت ۇيىمىنىڭ ەكى قىزمەتكەرىنىڭ ءبىرى وققا ۇشىپ, قازا بولسا, ەكىنشىسى جاراقات العان.
«پاللادا» دۇكەنىنە شابۋىل جاساعاننان كەيىن قىلمىسكەرلەر ەكى توپقا بولىنگەن. 6 قىلمىسكەردەن قۇرالعان ءبىرىنشى توپ «پانتەرا» قارۋ-جاراق دۇكەنىنە باسا-كوكتەپ كىرىپ, ءبىر ادامدى پىشاقتاپ ءولتىرىپ, ەكىنشىسىن جاراقاتتاعان. مۇنان كەيىن ولار قر ۇلتتىق گۆاردياسىنىڭ اسكەري ءبولىمىن باسىپ الماقشى بولعان. ول ءۇشىن «MAN» مارشرۋتتىق اۆتوبۋسىن باسىپ الىپ, ونداعى جولاۋشىلار مەن جۇرگىزۋشىنى ءتۇسىرىپ جىبەرىپ, قارۋ-جاراققا قاراي بەتتەگەن. الايدا قاراۋىل كۇزەتشىسى ولارعا قارۋ قولدانىپ, ءبولىمنىڭ اۋماعىنا ءارى قاراي ەنۋىنە جول بەرمەگەن.
بەلسەندى قارۋلى قاقتىعىستاردىڭ بارىسىندا 13 قىلمىسكەردىڭ كوزى جويىلدى, 4 جاراقات العان بولاتىن. ال 7 ماۋسىمداعى مالىمەت بويىنشا 7 قىلمىسكەر ىزدەستىرىلىپ جاتىر. قىلمىسكەرلەردەن ۇرلانعان قارۋدىڭ كوپ بولiگi تاركiلەنگەن. قالعان قىلمىسكەرلەردiڭ كiم ەكەنi انىقتالعان, قازiر ولاردى قۇرىقتاۋ بويىنشا تيiستi شارالار قابىلدانىپ جاتىر.
ال اقتوبە وبلىسىنىڭ ىشكى ىستەر دەپارتامەنتىنىڭ تاراتقان مالىمەتى بويىنشا, قىلمىسكەرلەردىڭ بەسەۋى – اقتوبە, ەكەۋى قىزىلوردا جانە اقمولا وبلىستارىنىڭ تۋمالارى.
ال اقتوبە قالاسىنداعى وقيعا بويىنشا ءالى دە قارۋلانعان بىرنەشە لاڭكەسكە ىزدەۋ جاريالانعان.
قارالى وقيعا سالدارىنان قازا تاپقانداردىڭ ىشىندە پوليتسەيلەر دە, بەيبىت تۇرعىندار دا بار. اتاپ ايتقاندا, ەل قاۋىپسىزدىگى جولىندا وشپەس ەرلىك كورسەتىپ, قازا بولعان اسكەري قىزمەتشىلەردىڭ قاتارىندا 6655 اسكەري ءبولىمىنىڭ جەدەل قىزمەتىنىڭ ساربازى ساپار داسبول ەركىمبەكۇلى, 6655 اسكەري ءبولىمىنىڭ وفيتسەرى مايلىباەۆ دانيەل اقارىسۇلى, 6655 اسكەري بولىمىندە كەلىسىمشارت بويىنشا جۇمىس ىستەگەن قاليەۆ بەرىك ەرلانۇلى جانە بايقاناتوۆ نۇربەك سەرگەەۆيچ بار.
بۇدان وزگە, بەيبىت تۇرعىندار: «پاللادا» دۇكەنىنىڭ ساتۋشىسى اندرەي ماكسيمەنكو. سونداي-اق, شابۋىل جاسالعان ساتتە دۇكەننىڭ ماڭىنان ءوتىپ بارا جاتقان اقتوبە تۇرعىندارى مەرحان تاجىباەۆ, نيكولاي ونيششەنكو, ميحايل ماتروسوۆ قىلمىسكەرلەردىڭ كەزدەيسوق قۇرباندارىنا اينالدى.
اقتوبەدەگى تەررورلىق اكتىنىڭ سالدارىنان قازا بولعانداردىڭ تۋىستارى مەن جاقىندارىنا مەملەكەت باسشىسى نۇرسۇلتان نازارباەۆتىڭ اتىنان كوڭىل ايتتى. ولاردىڭ ارتىندا قالعان وتباسىلارىنا قاجەتتى بارلىق كومەك كورسەتىلەدى. قازا بولعان اقتوبەلىكتەردىڭ وتباسىلارىنا 1 ميلليون تەڭگەدەن بولىنەتىن بولدى. سونداي-اق جەرگىلىكتى بيلىك ولاردى جەرلەۋ شىعىندارىن ءوز مويىندارىنا الادى.
بۇگىندە اقتوبەدە تەرروريستىك قاۋىپتىلىكتىڭ «قىزىل» دەڭگەيى ەنگىزىلدى. مۇندا وڭىرلىك جەدەل شتابى قۇرىلىپ, ىشكى ىستەر دەپارتامەنتىنىڭ جەتەكشىلىگىمەن لاڭكەستىككە قارسى ورتالىق جۇمىس ىستەۋدە. بارلىق قۇقىق جانە ارناۋلى ورىندار تىعىز بايلانىستا جۇمىس ىستەۋدە.
اقتوبەدە جانە جالپى ەلىمىزدە جاعداي تۇراقتى جانە باقىلاۋعا الىندى.
ەل تۇرعىندارىنا ۇندەۋ جاريالاعان «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد ەلدى دۇرلىكتىرگەن وسىناۋ قاندى وقيعانى ۇيىمداستىرۋشىلار زاڭنىڭ بارلىق قاتاڭ تالاپتارى بويىنشا جازالانۋى تيىستىگىن ايتىپ, تۋعان ەلى مەن جەرىنىڭ تاعدىرىن ويلايتىن بارشا جۇرتتى بىرلىك پەن بەرەككەگە شاقىردى.
يا, اقتوبەدەگى وقيعا ەلىمىزدىڭ بىرلىگىن ودان ءارى نىعايتا ءتۇسۋى قاجەت. وتاندى قورعاۋ جولىندا قازا تاپقان ەرلەر ەسىمى لايىقتى دەڭگەيدە ۇلىقتالۋى ءتيىس.
