استانا قالالىق ءماسليحاتىنىڭ دەپۋتاتتارى «استانا – جاڭا قالا» ارنايى ەكونوميكالىق ايماعىندا ورنالاسقان ءوندىرىس ورىندارىن ارالادى.
بۇگىندە استانا ەلدىڭ بارلىق ايماعى بوي تۇزەيتىن قالاعا اينالدى. جاڭا ونەركاسىپتى دامىتۋ دا ەلوردادان باستاۋ العان. ءبىز ونى قالالىق ءماسليحاتتىڭ دەپۋتاتتارىمەن يندۋستريالدى-يننوۆاتسيالىق اۋماقتى ارالاعاندا انىق بايقادىق. اتالعان ايماق 2001 جىلى قۇرىلعان. ونىڭ اۋماعى 7 634, 71 گەكتارعا سوزىلىپ جاتىر.
دەپۋتاتتار الدىمەن اتتىڭ باسىن ەلىمىزدەگى جەڭىل ونەركاسىپ ۇزدىكتەرىنىڭ ءبىرى «پيك استانا يۋتاريا ltd» جشس-نە تىرەدى. كاسىپورىن الەمدىك برەند سانالاتىن «ZOJE» تىگىن ماشينالارىمەن جابدىقتالعان. شىعاراتىن ءونىمىنىڭ ساپاسى ەۋروپالىق نەمەسە تۇرىك تەكستيلىنەن ەشبىر كەم ەمەس. اسكەري كيىمدەرگە دە ارنايى تاپسىرىس العان. سونداي-اق, مۇندا قوناق ءۇي, مەيرامحانا, مەديتسينا سالالارىنا ارنالعان بۇيىمدار مەن ۇيگە لايىقتى تەكستيل ونىمدەرى دە دايارلانادى. «بيزنەستىڭ جول كارتاسى – 2020» باعدارلاماسى اياسىندا جۇزەگە اسقان كاسىپورىن قانشاما ادامعا جۇمىس ۇسىنىپ وتىر.
مەملەكەتىمىزدىڭ ۇدەمەلى يندۋستريالدى-يننوۆاتسيالىق دامۋ باعدارلاماسى اياسىندا جۇزەگە اسقان جوبالاردىڭ ءبىرى – «تۇلپار-تالگو» ۆاگوندارى ەكەنى بەلگىلى. قازىرگى كۇندە اتالعان ۆاگونداردان قۇرالعان جۇردەك جولاۋشىلار پويىزى ەلىمىزدىڭ بارلىق ايماقتارىنا قاتىنايدى. بۇگىندە يسپانيالىق كومپانيامەن بىرلەسىپ سالىنعان زاۋىتتا وتاندىق ءونىم 20 پايىزدان اسقان. جىل سايىن بۇل كورسەتكىش جوعارىلاي بەرمەك. نەگىزىنەن, جوبانىڭ قۋاتتىلىعى بويىنشا جىلىنا 150 جولاۋشىلار ۆاگونى شىعارىلادى. بۇگىنگە دەيىن 400-تەن استام جولاۋشىلار ۆاگونى پايدالانۋعا بەرىلگەن.
دەپۋتاتتار «تۇلپار-تالگو» زاۋىتىندا بولعان كەزدە ونداعى مامانداردىڭ جۇمىسىن ءجىتى باقىلادى.
«جالپى, جولاۋشىلار تاسىمالىنا ارنالعان ۆاگونداردىڭ ارتىقشىلىعى كوپ. پويىز ساعاتىنا 200 شاقىرىم جىلدامدىقپەن جۇيتكيدى. پنەۆماتيكالىق جابدىقتالۋ, ەسىكتەردىڭ اۆتوماتتى اشىلىپ-جابىلۋى, جىلدامدىقتان بەلگى بەرەتىن ABS جۇيەسى دە جولاۋشىلاردىڭ جايلىلىعى ءۇشىن قولايلى» دەيدى زاۋىت ديرەكتورىنىڭ ءوندىرىس جونىندەگى ورىنباسارى ۆلاديمير كيسەلەۆ.
قازىرگى تاڭدا «تۇلپار-تالگو» پويىزدارىنىڭ قىزمەتىن ميلليوننان استام جولاۋشى پايدالانۋدا.
«ەلەكتروۆوز قۇراستىرۋ زاۋىتى» – ەلىمىزدەگى ەڭ ءىرى جوبالاردىڭ ءبىرى. ول قازاقستان, فرانتسيا جانە رەسەيدىڭ ءبىرلەسكەن كاسىپورنى سانالادى. ءوندىرىستىك الاڭنىڭ اۋماعى 27 مىڭ شارشى مەتردەن اسادى. جىلىنا 50 ەلەكتروۆوز قۇراستىرۋ جوسپارلانعان. بۇگىندە كاسىپورىن تولىقتاي ءوز قۋاتىندا جۇمىس ىستەيدى. ماماندار شەتەلگە بارىپ, ارنايى كۋرستان وتكەن. بۇگىندە وتاندىق كZ8ا ەلەكتروۆوزدارىن شەت مەملەكەتتەر دە ساتىپ الۋعا قىزىعۋشىلىق تانىتىپ وتىرعان كورىنەدى.
سونىمەن بىرگە دەپۋتاتتار «قازاقستان اسەلسان ينجينيرينگ» جشس-ءنىڭ قىزمەتىمەن تانىستى. قازاق-تۇرىك بىرلەسكەن كاسىپورنى نەگىزىنەن ەلىمىزدىڭ قورعانىس-ونەركاسىپ كەشەنى ونىمدەرى سانالاتىن ەلەكتروندىق-وپتيكالىق قۇرىلعىلار, ەلەكتروندىق پلاتالار مەن لينزا ءوندىرىسى ءۇشىن تەحنولوگيالىق قۇجاتتار, ماتەريالدار مەن جابدىقتار شىعارادى. كاسىپورىن تولىقتاي ۋاقىت تالابىنا ساي جوعارى تەحنولوگيالىق قۇرالدارمەن جاراقتالعان.
ءبىر بايقاعانىمىز, يندۋستريالدىق ايماقتا ورنالاسقان ءوندىرىس ورىندارىندا ەڭبەك ەتىپ جۇرگەندەردىڭ دەنى – جاستار.
تۇيىندەپ ايتقاندا, ءماسليحات دەپۋتاتتارى ءار كاسىپورىننىڭ جۇمىسىمەن جاقىن تانىسىپ, وزدەرىن تولعاندىرعان سۇراقتارىن قويىپ, مامانداردان ناقتى جاۋاپتار الدى.
ازامات ەسەنجول
