ەلوردانىڭ وڭ جاعالاۋىنداعى م.اۋەزوۆ پەن س.سەيفۋللين كوشەسىنىڭ قيىلىسىنداعى ءحىح ع. ءىى-ءشى جارتىسى مەن حح ع. باسىندا سالىنعان عيماراتتا ساكەن سەيفۋللين مۋزەيى ورنالاسقان. ەكى اعاش ءۇيدىڭ بىرەۋى بۇرىن كوپەس كازانتسەۆتىڭ اكىمشىلىك ءۇيى بولعان. ساكەن وسى ۇيگە جۇمىس بابىمەن كەلىپ جۇرگەن. ەكىنشىسى – ساكەننىڭ دوسى, دارىگەر بلاگوۆەششەنسكيدىڭ ءۇيى, مۇراجايدىڭ اكىمشىلىك عيماراتى.
بۇل قارا شاڭىراق اقىننىڭ قامشىنىڭ سابىنداي قىسقا عۇمىرىنان سىر شەرتەدى. مۇندا اقىن ءومىرى مەن قىزمەتىنە بايلانىستى ماتەريالدىق, رۋحاني ەسكەرتكىشتەر مەن ەستەلىكتەر قويىلعان. 1937 جىلى تۇتقىندالعاننان كەيىن ساكەننىڭ قولجازبالارىن, كىتاپتارىن, حاتتارىن, جەكە زاتتارىنا دەيىن تاركىلەگەن. دەگەنمەن اقىننىڭ ادال جارى گۇلباھرامنىڭ ارقاسىندا بۇگىندە ساكەن مۇراجايىندا ونىڭ كوزى تىرىسىندە قولدانعان, ءار كەزەڭدەرىنە قاتىستى جادىگەرلەر جيناقتالىپ, مۇراجاي تورىندە تۇر.
جارى ساكەن اقتالعانعا دەيىن امان-ەسەن ورالار دەگەن ۇمىتپەن, ءبىراز زاتتارىن كوزىنىڭ قاراشىعىنداي ساقتايدى. 1973 جىلى گۇلباھرام دۇنيەدەن وتكەندە ساكەن سەيفۋلليننىڭ زاتتارى الماتى مۇراجايىنا وتكىزىلگەن. سونىڭ ىشىندە, ساكەننىڭ التىن ساعاتى دا بار. 1936 جىلى كەڭىنەن اتالىپ وتكەن س.سەيفۋللينىڭ ادەبي جانە قوعامدىق قىزمەتىنە 20 جىل تولۋىنا بايلانىستى ۇيىمداستىرىلعان شارادا ەل ۇكىمەتى سىيعا تارتقان. جۇبايىنىڭ قولىندا ساقتالىپ, 1960 جىلدارى تسەلينوگراد قالاسىنداعى تاريحي-ولكەتانۋ مۇراجايىنا تاپسىرىلعان. 1988 جىلدان بەرى مۇراجاي جادىگەرلەرىنىڭ قاتارىن تولتىرىپ تۇر.
