استانا ىرگەسىندەگى قابانباي اۋىلىندا الامان بايگە ءوتتى. ۇلتتىق سپورت تۇرلەرى قاۋىمداستىعى ۇيىمداستىرعان ءدۇبىرلى جارىس قازاق حاندىعىنىڭ 550 جىلدىعىنا ارنالدى.
ەلىمىزدىڭ بارلىق ايماقتارىنان 100-دەن استام سايگۇلىك قاتىسقان الامان بايگەنىڭ باس جۇلدەسىن جامبىل وبلىسىنان كەلگەن جاس شاباندوز اقجول جۇماتاي جەڭىپ الدى. ونىڭ استىنداعى جۇيرىگى «شامان» باسقالاردى شاڭىنا ىلەستىرمەي مارە سىزىعىن ءبىرىنشى بولىپ كەستى. باس جۇلدەگە 10 ميلليون تەڭگە بەرىلدى. ەكىنشى كەلگەن «بەيبارىس» اتتى سايگۇلىكتىڭ يەسى پاۆلودارلىق مەيىرحان دالەلوۆتىڭ قانجىعاسىنا 5 ميلليون تەڭگە بايلاندى. الماتى وبلىسىنىڭ «جاننۇر» اتتى تۇلپارىن تىزگىندەگەن ولجاس قويشىبەك مارەگە ءۇشىنشى بولىپ جەتىپ, 3 ميلليون تەڭگە ولجالادى. الاماننىڭ مارتەبەسىن يەسكەرگەن ۇيىمداستىرۋشىلار تاعى دا التى شاباندوزعا اقشالاي سىيلىق بەردى.
قازاق حاندىعىنىڭ تورقالى تويىن ۇلىقتاپ, بايگە جولىندا جانكەشتىلىك تانىتىپ, ۇلتتىق ونەرىمىزدى ورگە كوتەرگەن ورەندەردى قر مادەنيەت جانە سپورت مينيسترلىگى سپورت كوميتەتىنىڭ توراعاسى ەلسيار قاناعاتوۆ پەن ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان قۇتتىقتاپ, سىي-سياپاتتار تابىستادى.
تەڭ تۇستىك !
فۋتبولدان 2016 جىلى وتەتىن ەۋروپا چەمپيوناتىنىڭ توپتىق ىرىكتەۋ تۋرنيرىندە ونەر كورسەتىپ جاتقان قازاقستان قۇراماسى كەزەكتى ەكى ويىنىن سىرت الاڭدا وتكىزدى.
الدىمەن پلزەن قالاسىندا چەحيا فۋتبولشىلارىمەن كەزدەستى. بۇل ويىندا ەۋروپا فۋتبولىنىڭ جۇلدىزدارى چەح پەن روسيتسكي باستاعان الاڭ يەلەرى 2:1 ەسەبىمەن جەڭىسكە جەتتى. ءبىر ايتارلىعى, بۇل ماتچتا ءبىزدىڭ قۇراما ءبىرىنشى تايمدا-اق ەسەپ اشقان ەدى, الايدا, ويىن اياقتالۋعا جاقىنداپ قالعاندا چەحيا قۇراماسىنىڭ شابۋىلشىسى شكودا 76-مينۋتتا ەسەپتى تەڭەستىرىپ كەتتى. وكىنىشكە قاراي, وسى فۋتبولشى ويىن سوڭىنا قاراي تاعى ءبىر دوپ سوعىپ, ءوز كومانداسىنا جەڭىس اكەلدى.
رەيكياۆيكتە وتكەن ەكىنشى ويىندا قازاقستان قۇراماسى توپتىڭ كوشباسشىسى يسلانديا قۇراماسىمەن سىنعا ءتۇستى. بۇعان دەيىن گوللانديا, چەحيا جانە تۇركيا قۇرامالارىن تىزە بۇكتىرىپ, سەنساتسيا جاساپ كەلە جاتقان يسلاندىقتار ءبىزدىڭ قۇراماعا قارسى ويىندا بىردەن شابۋىلمەن باستادى. الايدا, وسىنداي جاعدايدىڭ بولاتىنى ەسكەرگەن قازاقستان فۋتبولشىلارى تاسقامال قورعانىس قويدى. ارينە, ءبىزدىڭ جىگىتتەر دە قاراپ قالمادى. ءالسىن-ءالسىن الاڭ يەلەرىنىڭ قاقپاسىنا دا قاۋىپ توندىرە ءبىلدى. وسىلايشا الما-كەزەك شابۋىلمەن وتكەن بۇل ويىندا ەسەپ اشىلمادى. ءبىزدىڭ قۇراما ءۇشىن بۇل وتە جاقسى ناتيجە دەسەك بولادى.
حوككەي
بارەكەلدى «بارىس» !
كونتينەنتالدىق حوككەي ليگاسى چەمپيوناتىنىڭ كەزەكتى تۋرىندا «بارىس» جەڭىسكە جەتتى.
«قازاقستان» سپورت سارايىندا وتكەن ماتچتا استانالىقتار «لوكوموتيۆ» (ياروسلاۆل) كومانداسىن 4:3 ەسەبىمەن جەڭدى. بۇل ويىننىڭ ءبىرىنشى كەزەڭىندە ءتورت شايبا (!) سوعىلدى. الدىمەن قوناقتار قاتارىنان ەكى گول سوققان ەدى. الايدا, استانالىق رومان ساۆچەنكو ءدال وسىنداي شيەلەنىستى تۇستا شەبەرلىگىن كورسەتتى. ول قاتارىنان ەكى گول سوعىپ, ەسەپتى تەڭەستىرە ءبىلدى. سودان كەيىن رومان ساۆچەنكو مەن سەن-پەر مارتەن مەرگەندىگىمەن تانىلىپ, «بارىس» العا شىقتى. ءۇشىنشى كەزەڭدە قوناقتار ءبىر-اق رەت قارىمتا شايبا سوعۋعا جارادى.
بۇگىن «بارىس» ءوز الاڭىنداعى كەزەكتى ويىنىن وتكىزەدى. قارسىلاسى – «لادا» (تولياتتي). ماتچ «قازاقستان» سپورت سارايىندا ساعات 19.30-دا باستالادى.
بوكس
ازيانىڭ الدىندامىز
تايلاند استاناسى بانگكوكتا بوكستان ازيا چەمپيوناتى مارەسىنە جەتتى. بۇل بىرىنشىلىكتە قازاقستان قۇراماسى كوماندالىق ءبىرىنشى ورىنعا يە بولدى.
قازاقستان قۇراماسىنان جەتى بوكسشى جۇلدەگەرلەر قاتارىنان كورىندى. ازيا چەمپيونى اتاعىنا ولجاس ساتتىباەۆ (52 كەلى), دانيار ەلەۋسىنوۆ (69 كەلى), ادىلبەك نيازىمبەتوۆ (81 كەلى), ۆاسيلي لەۆيت (91 كەلى) جانە يۆان دىچكو (+91 كەلى) يە بولدى. زاكير سافيۋللين (60 كەلى) كۇمىس جۇلدەگەر اتانسا, قايرات ەراليەۆ (56 كەلى) قولاعا قول سوزدى.
فينالعا جەتى بوكسشىسى شىققان وزبەكستان قۇراماسى كوماندالىق ەسەپتە ەكىنشى ورىنننان كورىندى. ولاردىڭ ەنشىسىنە ەكى التىن, بەس كۇمىس, ءبىر قولا مەدال ءتۇستى. ال ەكى التىن مەدال يەلەنگەن شارشى الاڭ يەلەرى ءۇشىنشى ورىندى قاناعات تۇتتى.
ەندى قازاقستان قۇراماسى بوكسشىلارى 5 قازاندا كاتار استاناسى دوحا قالاسىندا باستالاتىن الەم چەمپيوناتىنا قاتىساتىن بولادى. بۇل جارىستا 2016 جىلى ريو-دە-جانەيرودا وتەتىن وليمپيادا ويىندارىنا ليتسەنزيالار دا ۇلەستىرىلەتىن بولادى.
دايىنداعان عالىم قوجابەكوۆ
