ساياسي قۋعىن-سۇرگىن قۇرباندارىن ەسكە الۋ كۇنى قارساڭىندا الماتى اۋدانىنىڭ اۋماعىندا تۇراتىن ءبىر توپ جالعىز باستى زەينەتكەرلەر مەن مۇگەدەكتەر استانا ىرگەسىندەگى اقمول اۋىلىنداعى ساياسي قۋعىن-سۇرگىن جانە توتاليتاريزم قۇرباندارىنىڭ «الجير» مەموريالدىق-مۇراجاي كەشەنىندە بولدى.
ءىس-شارا بارىسىندا «الجير» مۇراجايىنىڭ بىرەگەي جادىگەرلەرى» كورمەسى ۇيىمداستىرىلدى. كورمەگە بۇرىن وسى لاگەر تۇتقىندارىنىڭ قۇندى جادىگەرلەرى قويىلعان. قارتتار بولسا وسىنداعى قازاقتىڭ بەلگىلى جازۋشىسى بەيىمبەت ءمايليننىڭ زايىبى گۇلجامالدىڭ, ولاردىڭ قىزدارى ءرازيا مەن گۇلجاننىڭ وتباسىمەن بىرگە تۇسكەن فوتوسۋرەتتەرىن, قۇسني بايعاسكينانىڭ, تاتيانا افونينانىڭ فوتوسۋرەتتەرى مەن مۇراعاتتىق انىقتاماسىن, 1977 جىلعى 8 جەلتوقسانداعى «ەڭبەك ارداگەرى» مەدالى مەن سۇيەكتەن جاسالعان مونشاعىن, سونداي-اق بەلارۋس جازۋشىسى تودور كلياشتورنىيدىڭ ايەلى يانينا گەرمانوۆيچتىڭ فوتوسۋرەتىن, لاگەردە قىزى مايانى وراعان كورپەسى مەن تىككەن بەلبەۋىن, عاليا گايسينانىڭ مۇراعاتتىق قۇجاتتارى مەن جەكە زاتتارىن – كويلەگى, باس ورامالى مەن قول سومكەسىن, اننا مەدياننيكوۆانىڭ مۇراعاتتىق قۇجاتتارى مەن اننا ەندانوۆانىڭ تۇرمىستىق زاتتارىن كورۋگە مۇمكىندىك الدى.
جالپى, اۋدان اۋماعىنداعى جالعىز باستى ارداگەرلەر مەن مۇگەدەكتەرگە ۇيدە الەۋمەتتىك كومەك كورسەتەتىن №1 جانە №2 بولىمشە ۇجىمى قامقورلىققا ءزارۋ قاريالاردىڭ بوس ۋاقىتتارىن ءتيىمدى ۇيىمداستىرۋعا بارىنشا كوڭىل ءبولىپ كەلەدى. بۇل رەتتە قارتتار اتالمىش ءبولىمشەلەردىڭ مەڭگەرۋشىلەرى مەن مەموريالدىق كەشەن قىزمەتكەرلەرىنە العىستارىن ايتتى.
سودان سوڭ «الاش», «الجير», «ازاتتىقتىڭ ازاپتى جولى» اتتى مۇراجاي زالدارى بويىنشا ەكسكۋرسيا ءجۇرگىزىلىپ, «الجير-ءدىڭ» ىزعارلى سۋىعى» دەرەكتى ءفيلمى كورسەتىلدى.
گۇلبارشىن وكەشقىزى
