«ارداگەرلەر ۇيىمى» رەسپۋبليكالىق قوعامدىق بىرلەستىگى ەلوردانىڭ 20 جىلدىق مەرەيتويىنا «عاسىر عاجايىبى – استانا» اتتى كىتاپتى تارتۋ ەتتى. اتالمىش ۇيىم جاريالاعان ءتيىستى بايقاۋ جەڭىمپازدارىنىڭ ماتەريالدارى ەنگەن كىتاپتىڭ تانىستىرىلىمى قر قارۋلى كۇشتەرىنىڭ اسكەري-تاريحي مۋزەيىندە ءوتىپ, ۇزدىك اۆتورلار ماراپاتتالدى. سالتاناتتى شاراعا حالىق قاھارمانى مۇحتار التىنباەۆ, استانا قالاسى ارداگەرلەر كەڭەسىنىڭ توراعاسى سانسىزباي ەسىلوۆ, ت.ب. بەلگىلى تۇلعالار قاتىستى.
الدىمەن ءسوز العان «ارداگەرلەر ۇيىمى» قوعامدىق بىرلەستىگى ورتالىق كەڭەسى توراعاسىنىڭ ءبىرىنشى ورىنباسارى ومىرزاق وزعانباەۆ استانانى الاتاۋ باۋرايىنان ارقا توسىنە كوشىرۋ تۋرالى ەلباسىنىڭ ۇسىنعان يدەياسى ارماننان اقيقاتقا اينالعانىن ايتىپ ءوتتى.
«استانا – تاۋەلسىزدىگىمىزدىڭ تىرەگى, ەلباسىنىڭ ىسكە اسقان ارمانى, قازاق حالقىنىڭ عاسىرلار بويعى ارمانىنىڭ سيمۆولى. استانانىڭ 20 جىلدىعىن تاريح قاس-قاعىم ءسات دەپ باعالاعانمەن, ءبىز وسى جىلدار ىشىندە تىندىرىلعان جۇمىستاردىڭ وتە اۋقىمدى بولعانىن سەزىندىك. استانادا بۇل كۇندە 1 ميلليوننان استام حالىق تۇرادى. بايتاق ەلىمىزدىڭ تۇكپىر-تۇكپىرىنەن ەسىلدىڭ جاعاسىنا اعىلعان جۇرت استانانىڭ قۇرىلىسىنا ۇلەستەرىن قوسىپ, ەلوردانى كوركەيتتى. استانا قازىر الەمنىڭ ەڭ وزىق قالالارىنىڭ قاتارىنا كىردى. كىتاپقا «عاسىر عاجايىبى – استانا» دەگەن اتاۋدى بەكەردەن-بەكەر تاڭداعان جوقپىز. ەلوردامىزدى كورگەن شەتەلدىك قوناقتار بۇل كۇندەرى قالانىڭ اسەمدىگىنە تامسانا, تاڭدانا تاڭدايلارىن قاعاتىن بوپ ءجۇر» دەدى ءو.وزعانباەۆ.
بايقاۋعا 270-تەن استام ماتەريال كەلىپ ءتۇستى. بۇل ماتەريالداردى ساراپتايتىن ارنايى كوميسسيا قۇرىلىپ, وسىلاردىڭ ىشىندە 20-سىن تاڭداپ, كىتاپقا ەنگىزدى. وسىلايشا ەڭبەكتە استانا تۋرالى ماقالالار, ەسسەلەر, سۇحباتتار, تولعاۋلار, ولەڭدەر, پوەما, اندەرگە دەيىن توپتاستىرىلدى. اۆتورلار «ۇزدىك شىعارما», «جاڭاشىل ارداگەر», «بەلسەندى ارداگەر» جانە «رۋحانياتقا» ۇلەسى اتالىمدارى بويىنشا ماراپاتتالدى.
