«الاۋ» مۇز ايدىنى سارايىندا شاحمات پەن دويبىدان ەسىل اۋدانىنىڭ زەينەتكەرلەرى اراسىندا جارىس ءوتتى. يگى ءىس-شارا قازاقستان رەسپۋبليكاسىنىڭ ارداگەرلەر قوزعالىسىنىڭ 30 جىلدىعىنا وراي ۇيىمداستىرىلىپ وتىر.
نەگىزى, شاحمات پەن دويبى جاسى ەگدە تارتقان قاريالاردىڭ سۇيىكتى ويىندارىنىڭ ءبىرى بولىپ سانالادى. سوندىقتان دا اۋدان اكىمدىگى دەنە شىنىقتىرۋ جانە سپورت باسقارماسى جانە سپورتتىق-بۇقارالىق ءىس-شارالاردى وتكىزۋ ديرەكتسياسىمەن بىرلەسىپ, يگى ءىس جاسادى. سونداي-اق, جارىستىڭ جوعارى دەڭگەيدە ۇيىمداستىرىلۋىنا اتالعان اۋداننىڭ ارداگەرلەر كەڭەسى اتسالىستى.
جارىستىڭ قورىتىندىسى بويىنشا شاحماتشىلار اراسىندا ت.قادىربەكوۆ, ر.گاليموۆ جانە ۆ.گولۋبەۆ جەڭىمپاز اتاندى. ال دويبىدان ك.جانۇزاقوۆا, ق.راحىمجانوۆ جانە ق.ساتتىبەكوۆا ۇزدىك شىقتى. ۇيىمداستىرۋشىلار تاراپىنان جەڭىمپازدار مەن قاتىسۋشىلارعا ديپلومدار, مەدالدار جانە سىيلىقتار تابىستالدى.
