ارىپتەستىك اياسى كەڭەيدى
كەشە «Rاdisson» قوناق ۇيىندە ەلباسىنىڭ «قازاقستان – 2050: «ءبىر ماقسات, ءبىر مۇددە, ءبىر بولاشاق» جولداۋىندا كورسەتىلگەن مىندەتتەردى جۇزەگە اسىرۋ ماقساتىندا استانا قالاسى ءبىلىم باسقارماسىنىڭ ۇيىمداستىرۋىمەن «كاسىپتىك ءبىلىم جانە بيزنەس: ارىپتەستەر سۇحباتى» اتتى V قالالىق فورۋم ءوتتى.
«ەلوردالىق كوللەدجدەردە دۋالدى جۇيە بەلسەندى ەنگىزىلىپ جاتىر, وندا وقۋ ۋاقىتىنىڭ 65%-ىن وقۋشىلاردىڭ تاجىريبەلىك داعدىلارىن دامىتۋعا جۇمساۋ كوزدەلگەن. مۇددەلى جۇمىس بەرۋشىلەر ستۋدەنتتەرگە جۇمىس ۇدەرىسىمەن تانىسۋ ءۇشىن وزدەرىنىڭ بازالارىن ۇسىنادى. وتكەن وقۋ جىلىندا كاسىبي داعدىلاردى جەتىلدىرۋ اياسىندا 10500 ستۋدەنت كاسىپورىنداردا وندىرىستىك تاجىريبەدەن ءوتتى. بيىلعى وقۋ جىلىندا 11 مىڭ ستۋدەنت وسىنداي مۇمكىندىككە يە بولماق» دەدى فورۋمدا استانا قالاسى ءبىلىم باسقارماسىنىڭ باسشىسى ەلميرا سۋحانبەرديەۆا.
قازىرگى كەزدە استانا قالاسىنىڭ 34 كوللەدجىندە 28 مىڭنان اسا بولاشاق مامان ءبىلىم الۋدا. تەحنيكالىق جانە كاسىپتىك ءبىلىم بەرۋ جۇيەسى 66 ءتۇرلى ماماندىق پەن 113 كۆاليفيكاتسيانى قامتيدى. استانا قالاسى اكىمدىگىنىڭ قولداۋىمەن سوڭعى ءۇش جىلدا جەرگىلىكتى بيۋدجەتتەن بولىنەتىن مەملەكەتتىك ءبىلىم بەرۋ تاپسىرىسىن ۇلعايتۋدىڭ ەسەبىنەن تەحنيكالىق ماماندىقتار بويىنشا ستۋدەنتتەر كونتينگەنتى 30%-عا ارتقان. 2013 جىلى كوللەدجدەردىڭ ماتەريالدىق-تەحنيكالىق بازاسىن دامىتۋعا 204 ملن تەڭگە, سونىڭ ىشىندە 70 ميلليونى جەرگىلىكتى بيۋدجەتتەن ءبولىندى. بيىل 185 ملن تەڭگە ءبولىندى.
نەگىزى, ارىپتەستىك مەموراندۋمدار مەن جاڭا كەلىسىمدەرگە قول قويۋدى, وقۋ ورىندارى مەن وندىرىستىك كاسىپورىندار اراسىنداعى بايلانىستى تەرەڭدەتۋدى, كاسىپتىك جانە تەحنيكالىق ءبىلىم بەرۋ ۇيىمدارىن دامىتۋدى, ورتا بۋىن ماماندارىنىڭ مارتەبەسى مەن ءيميدجىن كوتەرۋدى ماقسات تۇتقان باس قوسۋعا استانا قالاسىنىڭ اكىمدىگى, ءبىلىم جانە عىلىم مينيسترلىگىنىڭ وكىلدەرى, جۇمىس بەرۋشىلەر, ءماسليحات دەپۋتاتتارى, قوعام قايراتكەرلەرى, ارداگەرلەر, تەحنيكالىق جانە كاسىپتىك ءبىلىم ۇيىمدارىنىڭ قىزمەتكەرلەرى قاتىستى.
فورۋم سوڭىندا تەحنيكالىق جانە كاسىبي ءبىلىم بەرۋ جۇيەسىن دامىتۋعا قوسقان ۇلەسى ءۇشىن الەۋمەتتىك سەرىكتەستەر, بىلىكتى ماماندار دايارلايتىن وندىرىستىك وقىتۋدىڭ شەبەرلەرى استانا قالاسى اكىمدىگىنىڭ العىس حاتتارىمەن, ماداقتامالارىمەن ماراپاتتالدى.
جۇما عازيەۆ