ۇكىمەت وتىرىسىندا ءسوز سويلەگەن ۇلتتىق بانك توراعاسى دانيار اقىشەۆ ەلباسىنىڭ بەس الەۋمەتتىك باستاماسى شەڭبەرىندە «7-20-25. ءار وتباسىنا باسپانا الۋدىڭ جاڭا مۇمكىندىكتەرى» اتتى باعدارلامانىڭ دايىندالىپ جاتقانىن مالىمدەدى.
«ۇلتتىق بانك وتكەن جىلداردىڭ نەعۇرلىم وڭ تاجىريبەسىن پايدالانىپ, مەملەكەت باسشىسى ايقىنداعان تالاپتارمەن: جىلدىق 7%-بەن 25 جىلعا, 20% باستاپقى جارنامەن «7-20-25» باعدارلاماسىن ىسكە قوسۋعا نيەتتەنىپ وتىر. ەڭ باستىسى, يپوتەكالىق قارىزداردى مىندەتتى تۇردە سەكيۋريتتەۋ تەتىگى ارقىلى ەكىنشى دەڭگەيدەگى بانكتەر ارقىلى يپوتەكالىق نەسيەلەۋدىڭ نارىقتىق قاعيداتتارىن پايدالانۋ كەرەك» دەدى د.اقىشەۆ. ول جىلجىمايتىن مۇلىك باعاسىنىڭ قۇلدىراۋىمەن قاتار, قارىز الۋشىلاردىڭ نەسيەلىك تاۋەكەلىن جەتە باعالاماۋدىڭ يپوتەكالىق قارىز الۋشىلاردى, اسىرەسە, حالىقتىڭ الەۋمەتتىك تۇرعىدان ءالسىز توپتارىن قورعاۋ قاجەتتىلىگىنە اكەپ سوققان جاعىمسىز تاجىريبەنى ەسكەرۋ قاجەتتىگىن اتاپ ءوتتى.
توراعانىڭ ايتۋىنشا, ناۋرىز ايىندا ۇلتتىق بانك باسقارماسى 100 پايىزدىق ەنشىلەس ارنايى كومپانيا – باعدارلاما وپەراتورىن قۇرۋ ماسەلەسىن قاراستىرادى. جاڭا كومپانيانىڭ كاپيتالى ۇلتتىق بانكتىڭ قاراجاتى ەسەبىنەن قالىپتاستىرىلادى. «كاپيتال كومپانياعا بانكتەر 7-20-25 فورمۋلاسى بويىنشا ۇسىنعان جاڭا يپوتەكالىق نەسيەلەردى نارىق تالاپتارىمەن ساتىپ الۋ ءۇشىن قارجى تارتۋعا قاجەت. سەكيۋريتتەۋ تەتىگى دەگەن مىنە, وسى. ودان كەيىن اتالعان كومپانيا قارجىلىق اگەنتتىككە اينالۋى ءۇشىن زاڭناما ءتيىستى تۇزەتۋلەر ەنگىزىلەدى. ونى ناۋرىز ايىندا ۇكىمەت قاراۋىنا جىبەرەمىز» دەپ ءتۇسىندىردى دانيار اقىشەۆ. ول باسپاناعا قاتىستى ەلباسى باستاماسىنىڭ مەملەكەتتىڭ ءساتتى ءبىر قادامى ەكەنىن تىلگە تيەك ەتىپ, ءار ادامعا جەڭىلدىك شارتتارى ۇسىنىلاتىنىن جەتكىزدى. «بىراق بۇل باعدارلاما ماسىلدىققا جول اشپاۋى ءتيىس. باعدارلامانىڭ قارجىلىق شارتتارى بولاشاق قارىز الۋشىلاردىڭ تولەم قابىلەتىنىڭ بولۋىن تالاپ ەتەدى. بۇعان رەسمي تابىسى بار قازاقستاننىڭ ءار ازاماتى قاتىسا الادى. قازىرگى كەزدە بانكتەر ونىڭ كريتەريلەرىن پىسىقتاۋدا» دەدى توراعا.
دانيار اقىشەۆتىڭ ەسەپتەۋى بويىنشا, جاڭا يپوتەكالىق نەسيە قازاقستاندىقتاردىڭ كوپشىلىگىنە قولجەتىمدى بولادى. «مىسالى, تۇرعىن ءۇيدىڭ قۇنى 7 ملن تەڭگە بولعان جاعدايدا اي سايىنعى تولەم 50 مىڭ تەڭگەدەن اسپايدى. 10 ملن تەڭگە بولسا, اي سايىنعى تولەم 70 مىڭ تەڭگەنى قۇرايدى. جۇمىسى بار قازاقستاندىقتار ءۇشىن بۇنىڭ قولايلى ەكەنى انىق. ەلىمىزدىڭ وڭىرلەرىندە باسپانا باعاسى ءارتۇرلى بولعاندىقتان, ءىرى قالالار مەن وڭىرلەر بويىنشا ءۇيدىڭ قۇنىندا الشاقتىق بولۋى مۇمكىن. جەڭىلدىكپەن بەرىلەتىن يپوتەكالىق نەسيەلەر تولىقتاي قامتاماسىز ەتىلگەن جانە قايتارىمدى بولۋى مىندەتتى» دەدى ۇلتتىق بانك باسشىسى.
ايتا كەتەلىك, ەلباسى نۇرسۇلتان نازارباەۆ اعىمداعى جىلدىڭ 5 ناۋرىزىندا «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىن جاريالادى. سول ۇندەۋدە جۇمىسى بار ءاربىر قازاقستاندىقتىڭ 7 پايىزدان اسپايتىن مولشەرلەمەمەن باستاپقى كەزدە باسپانا قۇنىنىڭ 20 پايىزىن تولەپ, 25 جىلعا نەسيە الا الاتىنىن حابارلاعان ەدى.
تولەن تىلەۋباي
