ارقادا تۋىپ, التاي اسقان, اقىرى ءدام-تۇزى قىتايدىڭ قۇلجا ايماعىندا تاۋسىلعان اسقان ءانشى-كومپوزيتور, قۇلاشى كەڭ اقىن اسەت نايمانبايۇلىنىڭ تۋعانىنا بيىل 150 جىل تولدى. اسەت تويى ءوزى مەكەن ەتكەن شىعىس قازاقستان وبلىسىنىڭ ءۇرجار اۋدانىندا, تۇركسوي ۇيىمىنىڭ قولداۋىمەن تۇركيانىڭ ىستانبۇل جانە انكارا قالالارىندا تويلاندى. قاراعاندىدا ءانشى اتىندا «ءىنجۋ-مارجان» اتاۋىمەن ءداستۇرلى اندەر بايقاۋى ءوتتى. الماتىدا مۋزىكالىق قويىلىم قويىلدى. ال استانا قالاسىنىڭ مەملەكەتتىك اكادەميالىق فيلارمونياسى جۋىردا ەلورداداعى «استانا» كونتسەرت زالىندا «اسەتتەي سال, ءان سالساڭ» كەشىن ۇيىمداستىردى.
كەشكە ەرجان توقسابانوۆ جەتەكشىلىك ەتەتىن «سارىارقا» حالىق مۋزىكاسى ءانسامبلى قاتىسىپ, فيلارمونيانىڭ حالىق ءانى ءبولىمىنىڭ انشىلەرى اسەم اندەردى اۋەلەتتى.
اسەتتىڭ كەڭ تىنىستى اندەرى كەز كەلگەن ونەرپازدىڭ وڭ جامباسىنا كەلە بەرمەيدى. اسىرەسە, «قىسمەتتى» شىرقاۋ ءۇشىن انشىگە قۋاتتى داۋىس كەرەك. كونتسەرتتى وسى انمەن اشقان دانيار مۇقان كورەرمەندەردىڭ قوشەمەتىنە بولەندى. ءارى قاراي ءانشى وسى قارقىنمەن «اسەت پەن كەمپىربايدىڭ باقۇلداسۋىن» سالدى. كلاسسيكاعا اينالعان بۇل تۋىندىنى دا ورىنداۋشى جاقسى الىپ شىعا ءبىلدى.
«ماقپال» ءانىنىڭ بىرنەشە نۇسقاسى بار. ونىڭ ءبىر نۇسقاسىن قر ەڭبەك سىڭىرگەن قايراتكەرى گۇلزيرا بوكەيحانقىزى, تاعى بىرەۋىن ايگەرىم نارتۋەەۆا تامىلجىتا شىرقادى.
اسەت نايمانبايۇلى اندەرىن ەلگە جەتكىزگەن – كورنەكتى ءانشى, كومپوزيتور, قازاق كسر حالىق ءارتىسى دانەش راقىشەۆ. اسەت مەكتەبىن قالىپتاستىرعان دا سول كىسى دەپ ايتساق, قاتەلەسە قويماسپىز. قازىر دانەشتىڭ شاكىرتتەرى دە اسەتتىڭ اندەرىن شىرقاپ ءجۇر. ايتىپ قانا قويماي, سوڭىنان ەرگەن جاس انشىلەرگە ۇيرەتىپ ءجۇر. سولار شىقتى ساحناعا. قر ەڭبەك سىڭىرگەن قايراتكەرى بيبىگۇل جانۇزاق «ءىنجۋ-مارجان» ءانىن كلاسسيكالىق ستيلدە شىرقاپ, كەشتى تۇيىندەدى.
امانعالي قالجانوۆ
