«وبەرەگ» ۋكراين قاۋىمداستىعىنىڭ جاستار قاناتى «چاريۆني دجەرەلا» – وتانسۇيگىشتىككە ۇندەپ, سلاۆيان حالقىنىڭ سالت-ءداستۇرىن كەيىنگى بۋىنعا ۇيرەتۋگە ايرىقشا اتسالىسىپ جۇرگەن ماڭدايالدى جاستار ۇيىمى.
جاستار قاناتىنىڭ مۇشەلەرى تاريحي وتانى – ۋكراينامەن تىعىز قارىم-قاتىناستا. جىل سايىن ودەسسادا وتەتىن «ۆسە مى دەتي تۆوي, ۋكراينا» بالالار جانە جاسوسپىرىمدەر فەستيۆالىنە, قازاق-ۋكراين بيزنەس فورۋمىنا قاتىسىپ تۇرادى. كيەۆتە وتكەن VI دۇنيەجۇزىلىك ۋكراين فورۋمىندا, ەكى ەل اراسىنداعى جاس جۋرناليستەر فورۋمىندا جاستار ساياساتىنا قاتىستى تالقىلاۋلارعا ءۇن قوستى.
جەتەكشىسى اناستاسيا تيموششەنكو-بوروۆيك: «جالپى, بىزدەر جاستار ماسەلەسىنە بەلسەندى ارالاسامىز. مىسالى, ءبىزدىڭ جاستار قاناتىنىڭ مۇشەلەرى قازاقستان حالقى اسسامبلەياسىنىڭ كەڭەيتىلگەن وتىرىسىندا «كونستيتۋتسيالىق رەفورمانىڭ ۇزاقمەرزىمدى مىندەتتەرىن جۇزەگە اسىرۋ – جاستار قىزمەتىنىڭ باسىم باعىتى» دەگەن تاقىرىپتا بايانداما وقىدى. بۇدان بولەك, جاستار ۇلتارالىق تاتۋلىققا, ەلورداعا, جەمقورلىققا قارسى كۇرەسكە ارنالعان ءتۇرلى دەرەكتى فيلمدەر مەن بەينەروليكتەرگە ءجيى تۇسەدى» دەيدى.
«چاريۆني دجەرەلا» جاستار قاناتى اسسامبلەيا ۇيىمداستىراتىن كوپتەگەن بايقاۋلاردا جۇلدەگەرلەر قاتارىنان ءجيى كورىنەدى. مىسالى, ءتول مادەنيەت پەن سالت-داستۇرگە ارنالعان ۇزدىك بەينەتانىستىرىلىم بايقاۋىندا سوڭعى بىرنەشە جىل قاتارىنا 1, 2-ورىن الىپ كەلدى. ال جاستار قاناتىنىڭ مۇشەسى ەكاتەرينا زاحارچۋك بيىل «ميسس اسسامبلەيا» سايىسىندا 3-ورىن الىپ, «كورەرمەن كوزايىمى» سىيلىعىنا يە بولدى.
ۇلكەنگە ىزەت-قۇرمەت كورسەتۋ جاعىنان ۋكراين دوستارىمىز جاراپ تۇر. جاستار استانا قالاسىنداعى قارتتار مەن مۇگەدەكتەرگە ارنالعان مەديتسينالىق-الەۋمەتتىك ورتالىققا, ۇلى وتان سوعىسى ارداگەرلەرىنىڭ ۇيىنە بارىپ حالدەرىن سۇراپ تۇرادى. جەڭىس كۇنىنە وراي ارداگەرلەر, تىل ەڭبەككەرلەرى ءۇشىن ۇيىمداستىرىلعان قايىرىمدىلىق شارالارىنىڭ قاي-قايسىسىنان دا قالىس قالعان ەمەس.
– قازاقستان حالقى اسسامبلەياسىنىڭ XXII سەسسياسىندا ەلباسى نۇرسۇلتان ءابىشۇلى ەل ىشىندەگى بارلىق قايىرىمدىلىق شارالارىن اسسامبلەيا اياسىندا وتكىزۋدى ۇسىنعان بولاتىن. ءبىز وسى باستاماعا ءوز ۇلەسىمىزدى قوسىپ كەلەمىز. اتاپ ايتساق, «چاريۆني دجەرەلا» جاستارى «كاراۆان ميلوسەرديا» «ريزاشىلىق» شارالارىنا اتسالىستى. ودان بولەك, SOS بالالار قالاشىعىنا بارىپ, بالالارمەن كوڭىلدى شارالار وتكىزىپ تۇرامىز, – دەيدى اناستاسيا يۋرەۆنا.
اناستاسيانىڭ ءوزى بالالارعا قولدانبالى-ساندىك ونەرىنەن تەگىن شەبەرلىك ساباعىن وتكىزەدى. سونىمەن قاتار, تۇرمىسى تومەن, از قامتىلعان وتباسى بالالارىن تابيعاتقا, قالاداعى مۋزەي, كورمە ورتالىقتارىنا ەكسكۋرسياعا ءجيى الىپ شىعادى. بۇل رەتتە جاستار قاناتىنىڭ ۇيىمداستىرۋىمەن اتا-اناسىنىڭ قامقورلىعىنسىز قالعان بالالالار ۋكراينانىڭ سۋداك قالاسىنداعى حالىقارالىق «ارتەك», «مولودايا گۆارديا» لاگەرلەرىندە ءارى دەنساۋلىقتارىن تۇزەپ, ءارى دەمالىپ قايتقانىن دا ايتپاي كەتۋگە بولمايدى.
«چاريۆني دجەرەلا» جاستار قاناتى ۇلتارالىق جانە كونفەسسياارالىق تاتۋلىق پەن كەلىسىمدى ۇدايى ناسيحاتتاپ جۇرەدى. مەكتەپ وقۋشىلارىمەن, ستۋدەنتتەرمەن كەزدەسۋ بارىسىندا قازاق حالقى مەن ۋكراين حالقى اراسىنداعى تاريحي بايلانىس تامىرلارى تۋرالى تاعىلىمدىق دارىستەر وقيدى. جىل سايىن حالىقتار دوستىعى فەستيۆالىندە, ۋكراين ۇلتىنىڭ ۇلى پەرزەنتى, كوبزار تاراس شەۆچەنكو اتىنداعى وقۋلاردا ونەر كورسەتەدى; پەتر ياتسيك اتىنداعى ۋكراين ءتىلى بىلىمىنەن حالىقارالىق بايقاۋعا, «25 سلوۆ» ينتەللەكتۋالدىق ويىنىنا, «سونياشنيك» ۋكراينتانۋ سايىستارىنا قاتىسىپ, بىرنەشە مارتە ديپلومدارمەن ماراپاتتالدى.
تەك ۋكراين حالقىنىڭ ەمەس, قازاق حالقىنىڭ مەملەكەت تاريحى مەن مادەنيەتىن تانىتۋعا دا اتسالىسادى. حاركوۆ قالاسىنداعى «بىرلىك» قازاق قوعامىمەن بىرىگە وتىرىپ, ەكى ۇلتتىڭ اراسىنداعى مادەني بايلانىستاردى, دوستىق قارىم-قاتىناستى دامىتاتىن شارالاردى ءجيى ۇيىمداستىرادى.
ادىلبەك جاپاق
