بۇگىن «بايتەرەك» مونۋمەنتى ماڭىنداعى اۋەندى سۋ بۇرقاق الاڭىندا ەل ەگەمەندىگىنىڭ 25 جىلدىعى مەن استانا كۇنىنە ارنالعان «تاۋەلسىزدىك جىرى – استانا» اتتى فوتوكورمە اشىلدى. ەلوردا اكىمدىگىنىڭ تاريحي-مادەني مۇرا وبەكتىلەرىن جانە ەسكەرتكىشتەردى ساقتاۋدى قامتاماسىز ەتۋ جونىندەگى ديرەكتسياسى ۇيىمداستىرعان كورمەگە يگور بۋرگاندينوۆ, ۆيكتور فەديۋنين سىندى باق فوتوتىلشىلەرىنىڭ جانە اۋەسقوي فوتوگراف گەنريح كۋپريانوۆتىڭ 300-گە جۋىق جۇمىستارى قويىلدى.
فوتوكورمەدە ەلوردا دامۋىنىڭ ايشىقتى كەزەڭدەرى قامتىلعان. ماسەلەن, استانا 1999 جىلى يۋنەسكو شەشىمىمەن بەيبىتشىلىك قالاسى اتانعانى, ال 2000 جىلدان بەرى باس قالا استانالار جانە ءىرى قالالار حالىقارالىق اسسامبلەياسىنىڭ مۇشەسى بولىپ كەلە جاتقانى بەلگىلى. مەملەكەت باسشىسى نۇرسۇلتان نازارباەۆتىڭ استانا قۇرىلىسىندا باتىس پەن شىعىس الەمدەرىنىڭ اراسىندا ورتاق ارنا تاۋىپ, ەۋرازيالىق ستيل قالىپتاستىرۋ يدەياسىن اتاقتى جاپوندىق ساۋلەتشى كيسە كۋروكوۆا مەن اعىلشىن ساۋلەتشىسى نورمان فوستەر ىسكە اسىردى. سونىڭ ناتيجەسىندە بەيبىتشىلىك جانە كەلىسىم سارايى, الەمدەگى ەڭ بيىك شاتىرلى قۇرىلىس – «حان شاتىر» ساۋدا-ويىن-ساۋىق ورتالىعى, «استانا وپەرا» تەاترى, قر ۇلتتىق مۋزەيى, «قازاقستان» ورتالىق كونتسەرت زالى, ت.ب. كورىكتى عيماراتتار سالىندى. فوتوكورمەدە سونىڭ بارىنەن سىر شەرتەدى.
ۇيىمداستىرۋشى تاراپتان ءسوز العان تاريحي-مادەني مۇرا وبەكتىلەرىن جانە ەسكەرتكىشتەردى ساقتاۋدى قامتاماسىز ەتۋ جونىندەگى ديرەكتسياسىنىڭ باسشىسى ەرلان ساتتىباەۆ اتالعان كورمەنىڭ ءمان-ماڭىزىن ايتىپ ءوتتى. ونەرتانۋشى كاميللا لي فوتوسۋرەتتىڭ استانا تاريحىندا الاتىن ۇلكەن ورنىنا توقتالدى. كورمەگە قويىلعان فوتوسۋرەتتەردىڭ اۆتورلارىنىڭ ءبىرى, استانانىڭ بايىرعى تۇرعىنى, ماماندىعى دارىگەر بولسا دا, فوتوسۋرەتشىلىك ونەردى جانىنا سەرىك ەتكەن گەنريح كۋپريانوۆ قالا ونىڭ كوز الدىندا وسكەنىن, تەك كولەمى جاعىنان عانا ەمەس, جەرگىلىكتى حالىقتىڭ مادەني-ينتتەلەكتۋالدىق دەڭگەيى دە ارتقانىن اتاپ ءوتتى.
تاريحي-مادەني مۇرا وبەكتىلەرىن جانە ەسكەرتكىشتەردى ساقتاۋدى قامتاماسىز ەتۋ جونىندەگى ديرەكتسياسىنىڭ قىزمەتكەرى نەللي شيۆرينانىڭ ايتۋىنشا, بۇل باستاماسى عانا. «كەلەسى جىلى وسىنداي كورمەنى اۋقىمدى ەتىپ وتكىزەمىز. ونىڭ ۇزىندىعى «حان شاتىردان» باستالىپ, اق ورداعا دەيىن سوزىلادى. ارينە, سول شارامىزدى «ەكسپو-2017» حالىقارالىق كورمەگە ارنايمىز» دەيدى ديرەكتسيا قىزمەتكەرى.
امانعالي قالجانوۆ
