استانا كۇنى اياسىندا ەلورداداعى اباي ەسكەرتكىشى الاڭىندا «ۇلى دالا ۇلت مۇراتى, ۇرپاق بولاشاعى جانە ماڭگىلىك ەل – تاۋەلسىز قازاقستان!» اتتى كىتاپ جانە پوەزيا فەستيۆالى ءوتتى. ونى وتكىزۋگە استانا قالالىق مادەنيەت, مۇراعاتتار جانە قۇجاتتاما باسقارماسى, «نۇر وتان» پارتياسىنىڭ استانا قالالىق فيليالى جانە «ورتالىقتاندىرىلعان كىتاپحانالار جۇيەسى» مەكەمەسى ۇيىتقى بولدى.
شارا شىمىلدىعى مەملەكەتتىك سىيلىقتىڭ لاۋرەاتى, كورنەكتى اقىن فاريزا وڭعارسىنوۆانىڭ كوپ تومدىق جىر كىتابىنىڭ تۇساۋكەسەرىمەن اشىلدى. قازاق پوەزياسىندا ءوز قولتاڭباسى بار بىرەگەي اقىن جىرلارىن وقىرماندار ءسۇيسىنىپ وقيدى. اتالعان جيناق تۇساۋكەسەرىندە ەلىمىزگە بەلگىلى ازاماتتار ءسوز الىپ, دارابوز شايىردىڭ ءومىرى مەن اسىل مۇرالارى تۋرالى تەبىرەنىپ سويلەدى. جىپ-جىلى اسەرگە تولى ەستەلىكتەرىمەن ءبولىستى.
سونداي-اق, ق.قۋانىشباەۆ اتىنداعى قازاق اكادەميالىق مۋزىكالىق-دراما تەاتر ارتىستەرى «ابايدىڭ رۋحى» اتتى حاكىم اتامىزدىڭ ءومىر جولى مەن شىعارماشىلىعىنا ارناعان تەاترلاندىرىلعان كورىنىس قويدى. وندا ۇلى تۇلعانىڭ بەكزات بولمىسى ايشىقتى بەينەلەندى.
بيىل الاشتىڭ كورنەكتى تۇلعاسى ءاليحان بوكەيحانوۆقا 150 جىل تولدى. قاللەكي تەاترىنىڭ ارتىستەرى «التى الاشتىڭ ارىسى – ءاليحان» دەپ اتالاتىن ۇلتىمىزدىڭ ۇلى پەرزەنتىنىڭ كۇرەسكەرلىك جولىنداعى قايراۋلى قىلىشتاي جارقىلداپ تۇرعان نامىسىن سومدادى. «ەلدىكتىڭ تەرەڭ تامىرى» اتتى بوكەيحانوۆ وقۋلارى وتكىزىلدى. جەڭىمپازدار جۇلدەلى ورىندارمەن ماراپاتتالدى. سونىمەن بىرگە قازاقتىڭ اقيىق اقىنى مۇقاعالي ماقاتاەۆتىڭ 85 جىلدىعىنا ارنالعان «جىرلايدى جۇرەك» اتتى ادەبي-مۋزىكالىق كومپوزيتسيا قويىلدى. جالىندى جاستار مۇزبالاق اقىننىڭ ولەڭدەرىن وقىدى.
ارينە, فەستيۆال بارىسىندا مەرەكەلىك پوەزيا كەشىن اقىندار اۋلەتى ءدۇر كوتەرىپ اكەتتى. اسىرەسە, الماتىدان ادەيىلەپ كەلگەن, مەملەكەتتىك سىيلىقتىڭ لاۋرەاتى, بەلگىلى اقىن مارفۋعا ايتقوجينا ەلوردالىقتاردى استانا كۇنىمەن قۇتتىقتاپ, ىزگى لەبىزىن ءبىلدىردى. جاڭا ولەڭدەرىن وقىدى. حالىقارالىق «الاش» ادەبي سىيلىعىنىڭ لاۋرەاتى, تالانتتى اقىن سەرىك تۇرعىنبەكۇلى دا باس شاھارعا ارنالعان جاڭا جىرلارىن ۇسىندى. «شابىت» فەستيۆالىنىڭ يەگەرلەرى اتانعان جاس اقىندار دا تىڭدارماندارعا ءوز ولەڭدەرىن سىيلادى.
– ءبىز جىل سايىن استانا كۇنىنە وراي اباي ەسكەرتكىشىنىڭ الاڭىندا كىتاپ جانە پوەزيا مەرەكەسىن وتكىزۋدى داستۇرگە اينالدىردىق. بيىلعى شارانى تاۋەلسىزدىگىمىزدىڭ 25 جىلدىعىنا ارناپ وتىرمىز.
سونداي-اق, فەستيۆال اياسىندا ەلىمىز ەگەمەندىك العاننان بەرگى مەملەكەتىمىزدىڭ قالىپتاسۋى مەن دامۋ جولىن كورسەتەتىن كىتاپ كورمەسى ۇيىمداستىرىلدى.
ازامات ەسەنجول
