جىل سايىن اۋقىمى ۇلكەيىپ كەلە جاتقان استانا بيىلعى جىلدىڭ اياعىنا دەيىن تاعى 8719 گەكتارعا دەيىن ۇلعاياتىن بولادى.
بۇل – ەڭ ءبىرىنشى, اۋەجاي ايماعىن كەڭەيتىپ, جاڭا تەرمينالدار سالۋعا بايلانىستى بولاتىن وزگەرىس. قالانىڭ وڭتۇستىگىندەگى اۋەجاي كەڭەيتىلگەندە ەلوردانىڭ اۋماعىنا سول جاقتان 7300 گەكتار جەر بەرىلەدى. بۇعان جانە ەكى جەر ۋچاسكەسى قوسىلادى. وندا جاڭا قورىم ورنالاسادى. وسىلايشا ەلورداعا جاڭادان قوسىلعان اۋماقتىڭ كولەمى 9000 گەكتارعا جەتەقابىل جەردى قامتىعالى تۇر.
استانا قالاسى جەر قاتىناستارى جانە جەردىڭ پايدالانىلۋى مەن قورعالۋىن باقىلاۋ باسقارماسىنىڭ مالىمەتىنە قاراعاندا, اۋەجاي مەن جاڭا قورىمعا بولىنەتىن جەردى تۇپكىلىكتى ءبولۋ وسى جىلدىڭ سوڭىندا اياقتالادى.
– بۇل جوبا كۇنى كەشە عانا قوعامدىق كەڭەستىڭ وتىرىسىندا ماقۇلداندى. كەڭەس مۇشەلەرى تۇگەلگە دەرلىك بۇعان كەلىسىمدەرىن بەردى. ەندى ونى قالالىق ءماسليحاتتىڭ سەسسياسىنا قاراۋعا ۇسىنامىز. سەسسيادا ماقۇلدانعاننان كەيىن ناقتى جۇمىستار باستالادى, – دەيدى جوبا جونىندە اتالمىش باسقارمانىڭ باسشىسى تولەۋعازى نۇركەنوۆ.
مامانداردىڭ ايتۋىنشا, اۋەجايدىڭ اۋماعى كەڭەيتىلگەندە بىرنەشە وزەكتى ماسەلە بىردەن شەشىمىن تابادى. ءبىرىنشىدەن, اۋەجايدىڭ ارتقى جاعىنداعى مايبالىق شاعىن وزەنى رەتكە كەلتىرىلەدى. اينالاسىن قامىس باسقان جابايى سۋ كوزى تازارتىلىپ, تولىققاندى اباتتاندىرىلىپ, تاماشا دەمالىس ورنىنا اينالدىرىلادى. قامىستاردىڭ ورنىنان جاعاجاي جاساقتالادى. ەكىنشىدەن, ەلوردا تۇرعىندارىن جاعىمسىز يىسىمەن شارشاتقان «تالدىكول» سارقىندى سۋ قويماسى ماسەلەسى دە وسىنداي جولمەن شەشىمىن تاپپاق. كولدىڭ اۋماعى تازارتىلىپ, تۇبىندەگى باتپاعى تۇگەل سورىلىپ بىتكەننەن كەيىن, بۇل سۋ قويماسى دا قالالىق دەمالىس اۋماعىنا اينالادى. وسى جوبالار ساتىمەن جۇزەگە اسسا, استانانىڭ اۋقىمى عانا كەڭەيىپ قويماي, تابيعات اياسىنداعى دەمالىس ورىندارى دا كوبەيە تۇسەدى.
مەڭدوللا نۇرىمۇلى
