استانا كۇنىن ايشىقتاعان جارىستار
استانا كۇنى مەرەكەسىن ەلوردالىق سپورتشىلار قاۋىمى باستاپ كەتتى. ق.مۇڭايتپاسوۆ اتىنداعى ستاديوندا «استانا كۋبوگى» ءتۋرنيرى جالاۋىن كوتەردى.
استانا قالاسىنداعى مەملەكەتتىك مەكەمەلەر قىزمەتكەرلەرى اراسىنداعى مەرەكەلىك جارىسقا 23 كوماندا قاتىسۋدا. ورتالىق ستاديوننىڭ الاڭى تورتكە بولىنگەن. ءبىر ساتتە ءتورت ويىن قاتارىنان وتۋدە. الا دوپقا ءبىر مەزگىلدە 40 ادام اربالىپ ءجۇر. تاماشا كورىنىس! تاماشا اتموسفەرا!
ءبىرىنشى بولىپ الاڭعا ۇلتتىق قاۋىپسىزدىك كوميتەتى مەن قازىناشىلىق دەپارتامەنتى فۋتبولشىلارى شىقتى. ءبىلىم باسقارماسى مەن مەملەكەتتىك كىرىستەر باسقارماسى وسى جارىستىڭ ءفاۆوريتى سانالىپ وتىر.
استانانىڭ 18 جىلدىعىنا وراي ۇيىمداستىرىلىپ وتىرعان جارىستىڭ جەڭىمپازدارى مەن جۇلدەگەرلەرى كەشكە قاراي انىقتالاتىن بولادى.
وسىنداي جارىستار مەرەكەنى ايشىقتاي تۇسەدى عوي. سونداي-اق, سالاۋاتتى ءومىر سالتىن قالىپتاستىرۋعا, مەكەمەلەر قىزمەتكەرلەرى اراسىنداعى ىنتىماقتى نىعايتۋعا اسەر ەتەدى دەپ ويلايمىن. جارىستى ۇيىمداستىرعان استانا قالاسىنىڭ اكىمدىگىنە العىسىمىز شەكسىز, – دەيدى جارىسقا قاتىسۋشىلاردىڭ ءبىرى جاسۇلان سادىقوۆ كوڭىلى مارقايىپ.
سونىمەن قاتار, «قازاقستان» سپورت سارايىندا سۋ دوبىنان دا «استانا كۋبوگى» ءۇشىن حالىقارالىق جارىس ءوتىپ جاتىر. جاسوسپىرىمدەر اراسىنداعى جارىسقا رەسەيدىڭ جانە قازاقستاننىڭ بىرنەشە قالالارىنان كوماندالار قاتىسۋدا. بۇل جارىستىڭ جەڭىمپازدارى 5 شىلدە كۇنى بەلگىلى بولادى.
سونىمەن, استانا كۇنىنە ارنالعان سپورتتىق جارىستار باستالىپ كەتتى. ەرتەڭ «قازاقستان بارىسى» ءتۋرنيرىن كورەتىن بولامىز. «اسىق اتۋ» جارىسىن دا كوپشىلىك اسىعا كۇتىپ ءجۇر.
عالىم قوجابەكوۆ