بىرنەشە كۇن بۇرىن «استانا ەكسپو-2017» كورمە كەشەنى نىساندارىنىڭ ءبىر بولىگى حۋسەين بەن تالال كوشەسىندە ورنالاسادى دەگەن حابار تاراتىلدى. قابانباي باتىر داڭعىلىمەن قيىلىساتىن بۇل كوشە اۋەجايعا بارا جاتقان جولدا.
جاقىن كۇندەرى اتالمىش كوشەنىڭ رەسمي تۇردە اشىلۋى دا جوسپارلانۋدا. وسىدان زاڭدى سۇراق تۋىندايدى – حۋسەين بەن تالال دەگەن كىم ەدى, استانادا ونىڭ اتىنا كوشە بەرۋ ماسەلەسى قايدان شىققان؟ راسىمەن, ويلاندىراتىن جاعداي.
ىلگەرىدە ءبىر دوسىمىزبەن تاحا حۋسەين كوشەسىنىڭ تۇسىندا ءجۇرىپ, «بۇل كىم ەدى؟» دەگەن سۇراقتى ءبىر-بىرىمىزگە قويدىق. اقىرى, ەكەۋمىز دە بىلمەيتىن بولىپ شىقتىق. ينتەرنەتتى اقتارىپ, ول مىسىر ەلىنىڭ بەلگىلى جازۋشىسى, ادەبيەتتانۋشىسى جانە تاريحشىسى بولعانىن بىلدىك.
ال, حۋسەين بەن تالال يوردانيانىڭ بۇرىنعى كورولى ەكەن. كەيبىر اقپاراتتىق سايتتارعا جۇگىنسەك, مۇحاممەد پايعامباردىڭ 39-ىنشى ۇرپاعى, اراب ەلدەرى اراسىنداعى بايلانىستاردىڭ دامۋى مەن تاياۋ شىعىس ەلدەرىندەگى شيەلەنىستەردى رەتتەۋگە ۇلكەن ۇلەس قوسقان تۇلعا. 1952 جىلدىڭ 11 تامىزىندا, 16 جاسىندا تاققا وتىرىپ, ەلۋ جىلعا جۋىق, دالىرەك ايتساق, 46 جىل 9 اي بويى دۇنيەدەن وتكەنشە ەل باسقارعان. يوردانيا ەلىنىڭ دامۋى تىكەلەي وسى ەسىممەن بايلانىستى ەكەن. قازىر دە وسى ەلدى ونىڭ بالاسى ابداللا ءىى بەن حۋسەين باسقارىپ وتىر.
ەندى حۋسەين بەن تالالعا استانادان كوشە بەرۋ ماسەلەسىنە كەلەيىك. تىلدەردى دامىتۋ باسقارماسىنان العان اقپاراتىمىزدا بىرنەشە جىل بۇرىن قالالىق ونوماستيكالىق كوميسسياعا قازاقستان رەسپۋبليكاسى سىرتقى ىستەر مينيسترلىگى ازيا جانە افريكا دەپارتامەنتىنىڭ ديرەكتورى مۇرات نۇرتىلەۋوۆتەن استانا قالاسىنىڭ ءبىر كوشەسىنە يوردانيا كورولى ابداللا ءىى بەن حۋسەيننىڭ نەمەسە ونىڭ اكەسى حۋسەين بەن تالالدىڭ ەسىمىن بەرۋ تۋرالى حات تۇسكەنى كورسەتىلگەن. ءوتىنىش 2011 جىلدىڭ 30 قاراشاسىندا قارالىپ, ەسىل اۋدانىندا ورنالاسقان № 27 جوبالاۋ كوشەسىنە حۋسەين بەن تالال ەسىمىن بەرۋ تۋرالى ۇسىنىس قاناعاتتاندىرىلدى.
استانا قالاسىنداعى № 27 جوبالاۋ كوشەسىنە حۋسەين بەن تالال ەسىمىن بەرۋ جونىندە 2012 جىلعى 25 قاڭتاردا استانا قالاسى اكىمىنىڭ №80 قاۋلىسى جانە 2012 جىلعى 25 قاڭتاردا قالالىق ءماسليحاتتىڭ №4/1-V شەشىمى قابىلداندى. وسىدان شامالى ۋاقىت وتكەندە مەملەكەت باسشىسى نۇرسۇلتان نازارباەۆ ابداللا ءىى بەن حۋسەينمەن تەلەفونمەن سويلەسىپ, ونى 50 جىلدىق مەرەيتويىمەن جانە استانادا ونىڭ اكەسىنە كوشە بەرۋ شەشىمىمەن قۇتتىقتاعان.
ايتا كەتۋ كەرەك, قازاقستان مەن يوردانيا اراسىندا ساياسي, ەكونوميكالىق جانە مادەني-گۋمانيتارلىق سالالاردا بەرىك بايلانىس ورنىققان. ەكى ەلدىڭ دە لاڭكەستىكپەن كۇرەستە جانە تاياۋ شىعىستا بەيبىتشىلىك ورناتۋدا كوزقاراستارى سايكەس كەلەدى.
استانا مەن اممان – باۋىرلاس قالالار. ەكى قالا اراسىنداعى ساۋدا-ەكونوميكالىق, عىلىمي-تەحنيكالىق جانە گۋمانيتارلىق سالالاردا قارىم-قاتىناس جاقسى جولعا قويىلعان. 2010 جىلى اممانداعى ورتالىق كوشەلەردىڭ بىرىنە ەلباسى نۇرسۇلتان نازارباەۆ ەسىمى بەرىلىپ, اشىلۋ ءراسىمى سالتاناتتى جاعدايدا وتكەنى بەلگىلى.
امانعالي قالجانوۆ
