بەينەلەۋ ونەرىنىڭ بيىك مۇراتىن سۋرەتشىسىز ەلەستەتۋ مۇمكىن ەمەس. الايدا, قازىرگى زاماندا گالەرەيالار اrt-الەمنىڭ بويىنا قان جۇگىرتەر جۇرەك-قولقاسى ەكەنىندە داۋ جوق.
گالەرەيالار – سۋرەتشى, جيداشى (كوللەكتسيونەر) مەن كورەرمەن دەگەن ءۇش تاراپتىڭ اراسىن ەلدەستىرگەن ەلشى, كوپشىلىكتىڭ ونەرگە دەگەن تالعامىن تامتىراتپاي ۇستاپ تۇراتىن ءبىر قاسيەتتى مۇيىسكە اينالدى دەسەك, قاتەلەسپەيتىن شىعارمىز. استاناداعى سانى ءبىر قولدىڭ سالاسىنان اسپايتىن قازىرگى زامانعى ونەر مۇراجايى, «قۇلانشى», «حاس سانات», «شەجىرە», تاۋەلسىزدىك سارايى, نازارباەۆ ورتالىعىنداعى كورمە زالدارى ەلوردانىڭ مادەني ءومىرىن شاما-شارقىنشا ءتۇرلى شارامەن بايىتىپ جاتقانىنىڭ ءوزىن ولجا سانايتىنىمىز جاسىرىن ەمەس. كوش جۇرە تۇزەلەدى. كوپ ۇزاماي استانا جۇرتشىلىعى مەن قوناقتارىنا تاعى ءبىر art-گالەرەيا ەسىگىن ايقارا اشپاقشى. «بەيجىڭ ساراي» بەس جۇلدىزدى قوناق – ۇيىندە ورنالاسقان «ARTTUMAR» گالەرەياسىنىڭ يەسى – بەلگىلى ونەر جاناشىرى گۇلفايرۋز نۇرسكەنوۆا.
– مەن بۇل سالاعا الماتىدا, ونەردىڭ وگەيسىمەگەن ورتاسىنا تاپ بولعاندا قىزىعا دەن قويعام. كاسىبي ونەرتانۋشى بولماسام دا, سول جەردە «ArtNomad» گالەرەياسىن اشىپ, تۋىندىلارىن كوپشىلىككە ءبىز ارقىلى ۇسىناتىن قىلقالام شەبەرلەرىنىڭ ۇلكەن شوعىرىن ءوز توڭىرەگىمدە توپتاستىردىم. ولار – ەكسپرەسسيۆتى مانەردە جازاتىن راشيد قۇلباتىروۆ, اكادەميالىق ءجيۆوپيستىڭ اياسىنان شىعىپ كەتىپ, ۇلتتىق قانىق بوياۋلارىمەن سەزىمگە قوزعاۋ سالاتىن, قازاقتىڭ جانىنا جاقىن, ەتنوگرافيالىق, تاريحي تاقىرىپتاعى كەڭ پولوتنولارعا كوبىرەك باراتىن سۋرەتشى سارسەن ومىشەۆ, نۇربازار قوجين, قۇرمانعازى اقاشەۆ, ەسەنعالي سادىرباەۆتار, يپپيكالىق جانرعا (گرەكشەدەن «hippos» – جىلقى) جاقىن, ياعني, ينتەرەرىندە جىلقى ءجيى كورىنىس تاباتىن جەڭىسبەك ءابدىرامان, قازاقى قوڭىر تۇستەردەن شابىتتاناتىن عاني بايان, «سوntemporary-art» باعىتىندا ىزدەنەتىن راشيد نۇرەكەەۆ سياقتى سۋرەتشىلەرمەن جان-جاقتى شىعارماشىلىق بايلانىس ۇستىندەمىز. «ەندەشە نەگە وسىنداي تالانتتى سۋرەتشىلەردى استانانىڭ مادەني ورتاسىنا تانىستىرماسقا؟» دەگەن وي «ARTTUMAR» گالەرەياسىن اشۋىما تۇرتكى بولدى, – دەيدى گۇلفايرۋز نۇرسكەنوۆا.
ونەر مەنەدجەرىنىڭ ايتۋىنشا, گالەرەيا كونتسەپتسيالىق تۇرعىدان وتاندىق بەينەلەۋ ونەرىنىڭ بەلگىلى-بەلگىسىز «برەندتەرىن» تانىتۋعا, ياعني, تۇراقتى ەكسپوزيتسيالار جاساپ, كاتالوگ-البوم شىعارۋعا جۇمىستاناتىن بولادى. الايدا, زاماناۋي ونەرمەن شەكتەلىپ قالماي, تۋىندىنىڭ ۋاقىت ءوتىپ, تاريحتىڭ تەرەڭ قويناۋىنا سۇڭگىگەن سايىن باعاسى ارتا تۇسەتىن جازىلماعان زاڭدىلىعىنا باعىناتىن كەز كەلگەن گالارەيا سياقتى, «ARTTUMAR» دا سوتسرەاليزم, الپىسىنشى-سەكسەنىنشى جىلدارداعى قازاق بەينەلەۋ ونەرى وكىلدەرىنىڭ جۇمىستارىنان قور جيناقتايدى. سالونداعى سالاحيتدين ايتباەۆ, باحتيار تابيەۆ, نينا گينزبۋرگ, ناعىمبەك نۇرمۇحاممەدوۆ, توقبولات توعىسباەۆ, سابىر مامبەەۆ, ۆەلينينا كۋزنەتسوۆا, نيكولاي ناسەدكين, ت.ب كوپتەگەن اۆتورلاردىڭ سۋرەتتەرىنەن وتكەن ءداۋىردىڭ كورىنىستەرىنە كوز قانىعادى. «ARTTUMAR» ومىردەن وتكەن سۋرەتشىلەردىڭ دە كارتينالارىن تاقىرىپ اياسىندا توپتاستىرىپ, كورمە اشۋدى جوسپارلاپ وتىر.
ادىلبەك جاپاق
