كەشە «استانا وپەرا» تەاترىندا كورنەكتى كومپوزيتور, قازاقستاننىڭ ەڭبەك ەرى ەركەعالي راحماديەۆتىڭ «الپامىس» وپەراسى ونەرسۇيەر قاۋىمعا ۇسىنىلدى. وتكەن جىلدىڭ جەلتوقسان ايىندا پرەمەراسى وتكەن ۇلتتىق تۋىندى ليبرەتتوسىنىڭ اۆتورى – قاز كسر حالىق ءارتىسى كاۋكەن كەنجەتاەۆ. قويۋشى رەجيسسەرى – قازاقستاننىڭ مەملەكەتتىك سىيلىعىنىڭ لاۋرەاتى, رەسەي فەدەراتسياسىنىڭ حالىق ءارتىسى يۋري الەكساندروۆ. وپەرانى اتالمىش ونەر وشاعىندا بۇگىن دە تاماشالاۋعا بولادى.
وسى جولى تۋىندىنىڭ باس كەيىپكەرلەرىنىڭ بەينەسىندە جاڭا ارتىستەر كورىنەدى. گۇلبارشىننىڭ پارتياسىندا ساحناعا العاش رەت تەاتردىڭ جەتەكشى سوليستەرى – قازاقستاننىڭ ەڭبەك سىڭىرگەن ءارتىسى جاننات باقتاي مەن ايزادا قاپونوۆا شىعادى. جاۋىز مىستاننىڭ بەينەسىندە تەاتر ءسوليسى ەلەنا گانجا دەبيۋت جاسايدى. وسى كەيىپكەردى گۇلجانات ساپاقوۆا دا سومدايدى.
باستى پارتيا الپامىستىڭ ءرولىن تەاتر سوليستەرى ەرجان سايپوۆ پەن راسۋل جارماعامبەتوۆ ورىندايدى. جەر-انا – سالتانات مۇراتبەكوۆا, تاتيانا ۆيتسينسكايا, تايشىق حان – شىڭعىس راسىلحان, قازاقستاننىڭ ەڭبەك سىڭىرگەن قايراتكەرى جانات شىبىقباەۆ, قاراگوز – قازاقستاننىڭ ەڭبەك سىڭىرگەن قايراتكەرى سالتانات احمەتوۆا, اسەم سەمبينا. جىراۋدىڭ بەينەسىن العاش رەت حايدار مۇستاپين تانىستىرادى. كەيقۋات – ءاليحان زەينوللا, ابىلاي بەكەن, قارامان – بەيىمبەت تاڭارىقوۆ, ال ەكىنشى كۇنى وسى رولدە ەرۇلان كامەل دەبيۋت جاسايدى. ۇلتان – رامزات بالاكيشيەۆ, تازشا – بەيبىت بايانباەۆ, ايان جايماعانبەتوۆ.
«استانا وپەرا» تەاترىنىڭ سيمفونيالىق وركەسترى, حورى, بالەتى مەن ميمانسى ونەر كورسەتەدى. مۋزىكالىق جەتەكشى ءارى قويۋشى ديريجەر – قازاقستاننىڭ ەڭبەك سىڭىرگەن قايراتكەرى ابزال مۇحيتدين.
بايان اسىلبەكوۆا
